السلام عليكم
كيفكم حبيباتي الموضوع مثل ما انتوا شايفين عن حماتي ام زوجي
هي انسانة غريبة جدا استغرب من تصرفاتها انا متزوجة من عشر سنوات والله لو اقعد اكتب لكم عن تصرفاتها ما راح تصدقوا
ابداء مثلا اول ما تزوجت كانت بلمة زوجي وسلافي تقعد معهم وتقعد تحرضهم عينك عينك وقدامي تقلهم اضربوا زوجاتكم ليش ابوكم كان يضربني واخوي يقله اضرب تسلم يدك بصراحة انفجعت من كلمتها طيب انت انظلمتي ليه تتمني الظلم لغيرك بصراحة حزنت عليها وانقهرت منها حزنت لانه حسيت انها انظلمت وما لقت سند وانقهرت انها تحرض زوجي واخوانه على ضربي وضرب سلافاتي
موقف ثاني مصدومة منه كنت عروس وزوجي راح اشترا لنا فيديو وهو طبعا كان مستلف من ابوه مبلغ ومتفقين على موعد انه يرده بس الموعد ما جى فلما عرفت بالجهاز اللي اشتراه قعدت تعبي راس حماي ابو زوجي قدامي وتقله ولادي ما يسالوا فيي واذا حد فيهم رجع البيت ومعه اغراض يركض عبيته خوف ما اشوف ايش جاب معه (ووالله هالكلام مو صحيح )المهم حماي عصب وطلعت معه وهجم على زوجي بالبيت وقعد يسبه ويقله رجع لي الفلوس واطلع برا البيت وهجم على الغرفة اللي انا قاعد فيها يبي يطردني لكن زوجي رده وقفل علي الباب وقله اطلع انت ومرتك وحنا كنا ساكنين بشقة ملك لحماي وقعد زوجي يهدي بابوه لحد ما نزل وراح لبيته
موقف ثاني ربنا يسر لزوجي شغل في بلد ثاني وسافرنا المهم زوجي حب انه يساعد اخوانه ربنا فتحها عليه واخوانه بصراحة بعض منهم حالته الله يعينه عليها قام شاف واحد من اخوانها عليه دين وهو طبعا متهاوش مع حماتي ورحل من عندهم حتى يريح راسه من القال والمشاكل زوجي سد دين اخوه وقله اذا نقص عليك شي خذ مني بدون دين يعني ما يبي يسده سلفي فرح كثير المهم الكلام وصل لحماتي ويوم عرفت انه زوجي سد دين اخوه انتظرت لحد ما نزلنا اجازة ومسكتني وقعدت تفسد فيي وتقلي لا تخلي زوجك يعطيه هو رحل عشان يرضي مرته يستاهل يقعد بالدين وقولي لزوجك لا يساعده استغربت انا اعرف انه السلافات يقطعوا الاخوان من بعض مو الام معقولة حتى تقهر زوجة ابنها ترضى لولدها الدين والهم؟؟؟ المهم زوجي قعد يقنع اخوه ارجع عند اهلك احسن لك وبيصبروا عليك وولادك يتربوا بالعيلة واخوه وافق ورجع وليته ما رجع ما عتقت مرته مشاكل وتسبها وتسب اهلها والله الحرمة صابرة لكن قلبها قوي يعني قاطعت حماتي ساكنة بنفس البيت وصارلها اكثر من سنة ما نزلت ولا شافتها حماتي احيانا الومها ومرات اقول لو مكانها ما اقدر اصبر حماتي تزودها تقعد تدعي على سلفي يموت قدام مرته وتدعي على اولاده وبناته والله لو دعت عاولادي بنجن وما بحتمل المهم كل ما زوجي ينزل تقعد تفسده على سلفي لحد اخر مرة تكلمت فيها مع زوجي بقله مرة اخوك ما شاء الله جابت ولد تعرفوا ايش رد علي؟؟؟ يقلي ما يستاهلون هي لئيمة وزوجها مو رجال موقادر يمون عمرته تنزل عند امي صارلها اكثر من سنة مقاطعتها انصدمت كان كثير يحن عاخوه انصدمت بكلامه قلت له استغفر ربك هو اللي يعطي و ما تقدر تقول فلان يستاهل او ما يستاهل عطية ربنا لكن ما دافعت عن سلفتي وحاسة بتأنيب الضمير احس اني شيطان اخرس يعني بصراحة حماتي هي بلشت معها الهوشة وقامت تدعي عولدها وزوجها ومع ذلك نزلت لها وقامت بهدلتها وطردتها وبعدها قاطعتها المشكلة زوجي مو شايف هالكلام بس يسمع من امه ويحزن عليها وهي تبكي وترا هي موبس عولد واحد عكل اولادها تعمل نفس الشيء حتى انا بس زوجي بعيد ما تقدر تعمل لنا مو مثل اللي ساكن بنفس البيت
فيها تناقضات عجزت افهمها تموت بالمشاكل وتقهر اولادها وتطردهم من البيت وانا انطردت منها من البيت فوق العشر مرات ويوم زوجي اشترا بيت وكنا بنرحل قطعت نفسها بكى وتترجاه لحد ما رجع وخلى بيتنا مسكر وفاضي واثاثنا عندها طردت سلفتي وكانت سلفتي متاخرة بالحمل ويوم طلعت هي وزوجها من البيت قطعت حالها عياط ما جاب نتيجة مع سلفي قامت وقفت عالشباك واخذت تدعي باعلى صوتها ربي يقطع خلفك وما تشوفه ابد والله والله قدامي دعتها ويوم ما حملت سلفتي فرحت ؟؟؟؟اتقاتلت مع سلفتي الكبيرة وكانت عندها 5 بنات بدون اولاد نزلت من عندها اتوضت واستقبلت القلبة ودعت ربنا ما يعطيها الولد ويوم جابت سلفتي ولد فرحت ؟؟؟؟؟؟؟؟؟ سلفي الصغير زوجته ما شاء الله عليها متدينة ومنقبة عملت لها مشاكل وتسببت بحردها اكثر من مرة تبيها تشلح النقاب طيب ايش لك فيهاويوم حردت سلفتي ابوها ما تحمل ولدها ورماه لسلفي قامت تترجى الجيران اقنعوا ابوها يرجعها؟؟؟؟ لي سلفة ساكنة بمدينة ثانية جت عندها على العيد وهاوشتها ليش جيتين متاخرة قالت لها الزحمة والطريق واتهاوشت معها ومسكت زوجها وتهاوشت معه وقعدت تقله مرتك هاوشتني وغيبت قدامه ومن خوفه عامه مسك مرته وودها لاهلها بالعيد مسكينة قضته حردانة بدون ذنب ويوم سلفي صالح زوجتها زوجته رفضت تنزل بيت حماتي وقعدت شهرين مقاطعيتها كانت كل يوم تتصل عزوجي وتبكي وتقله اخوك ما دخل بيتي هو ومرته من شهرين وزوجي يحزن عليها ولا اللي يقهر قعدت تحلف قدام جاراتها انه عمرها ما تدخلت بزوجات اولادها والله يومها رفعت فنجان القهوة وشرقت وصارت تكح وانا قلت الحين بتموت وهي حالفة يمين كذب اللهم عافينا لكن ربنا سترها
انا كتبت جزء من افعالها والله لو اقعد اكتب لاحتاج اكثر من موضوع
حابة اعرف شلون اخلي زوجي يعرف انه مو كل كلامها صحيح مو حابة اكون لئيمة اكرهه بامه ومو حابة يكره اخوانه بسبب هواش حريم
الله المستعان سامحوني افكاري مو مرتبة بس والله انصدمت من كلمة زوجي انه اخوه ما يستاهل وما عرفت اناقشه ايش الحل؟؟؟
مريم جهاد @mrym_ghad
محررة
يلزم عليك تسجيل الدخول أولًا لكتابة تعليق.
بريداويه عسل
•
قولي لزوجك الغيبه والنميمه حراام وأن الله بيعاقبنا....
الصفحة الأخيرة