حماتي وزوجي وضياعي

مشكلتي احس بحرقه بقلبي لمن تضرني حماتي واظن دا طبيعي
حماتي تضرني قدام الناس لكن بيني وبينها حبايب
لازم تفشلني
عمرها ماشافت فيني شي عدل
والمشكله انه زوجي يقولي ردي عليها لمن تكلمني
لكن ماقدر
اتخيلوا ارد على وحده كبيره(هي مو كبيره مره هي تعتبر شباب يعني في الاربيعينات)
وانا عارفه نفسي اخد كم يوم وانسى
بس احتاج افضفض
لحد ولو فضفضت لاهلي والله ثم والله ماخلوني دقيقه ببيتي دا
اهلى انا اخر العنقود عندهم ورضيه امي وابوي
ومايستحملو كلمه عليا
خصوصا انه المخربين كتير(= واكيد تسمعو كتر الزن يكسر الجبل=)
كتير يجوا لامي او ابويا ويقولوا له طلقها وعطها لولدي
ويكون طبعا منصب وشي تعرفون اكيد الناس المخربه كيف
وانا والله احب زوجي
هو مو ناقصه شي بالمره
وامي كتير تحبه خصوصا انه يشبه ابوها في شكله وخيلاني كتير يعزوه وهو اصلا جدته ام ابوه تقرب لستي ام امى واتربوا سوا هيا وابو زوجى وابويا يحبه كمان
ماشاء الله عليه ربي يحفظه ليا ومستحمل عيوبي كلها عمره مانقص عليا شي والخناقات يلي بيننا طبيعيه زي اي زوجين
يتخانقوا لاسباب سواء قويه او صغيره ويرجعوا يرضوا
فاجي افضفض له
وهو من نوع الي يعصب ويروح يعصب على امه
والله من كتر مانقهر انه اتخاصم مع امه بسببي
يسير بدل ماتنزل من عيني دمعه الي هي جرحتني بيها تنزل دمعتين
اتخيلوا انا السبب في انه امه تغضب عليه( احس انه في ديك اللحظه ربي حينزل سخطه عليا بسبب غضبها) والمشكله هي ماتصدق بشي الا وعلى طول تغضب عليه
والله مارضاها ليها انه ولدها يخاصمها ويتزاعل معاها بسببي بس شو اعمل
وفي نفس الوقت ابغى زوجي يعرف عشان يقدر لي موقفي عشان يصبر على اهلي
زوجي فين وفين يروح لامي واذا عيد يكون بالغصب انا يقولي خلهم هم يودوكي ويجيبوكي ماعنده مشكله بس هو لا هي مرة يوديني وغير كده تعبان مافيا حيل ومن الكلام دا
بس احتاج لاحد افضفض له
على الي تسويه معايا
ولمعلوماتكم هيدا مو كل شي
اشياء كتير اسكت عليها وماحكيه هيا
والي يصبرني اني اكون بالبيت معاهم اني شايله هم امه وابوه بكبرتهم
لانهم مالهم غير الله وابنهم دا هو وحيدهم
انا بالنسبه لحماتي اقل منها بكتير؟؟؟؟؟؟؟؟؟ ليش ماعرف؟؟؟؟؟
دايما هي واهلها ينظروا ليا بنقص(هم وحريم عيالهم احسن ناس وانا لا)
عشان ماتشرطنا عليهم وسوينا تقل ولا شو. تماحسوا بقيمتي مني عارفه ليش؟
والله كاني حشاته نظراتهم ليا
على قد ماجيب ماركات مايعجبها شي
والسبب انه انا مارضى ادفع مبالغ قويه ادفع ماركات بس المعقول
وبرضوه ماعجبها
استحملوني طولت عليكم
بس محتاجكتم معايا
وتقولوا لي نصايحكم
ساعدوني في حالي دا
اليوم نطقت كلمه عمري ماقصدتها وقلت لزوجي
قوم دور بيت بره نستأجره خلاص مني قادره اعيش مع امك
احنا شقتنا منفصله عنهم لكن بيت واحد
وكل واحد بابه قدام التاني ومافي احد غيرنا بالبيت
انا عندي بنت عمرها 7 شهور
اتخيلوا فرحتهم بحفيدتهم مانفسي احرمهم منها بس والله خلقي سار ضايق
مررره منها وزوجي سار على طول قالب خلقته قدامي
نادرا مايقولي كلمه حلوة او حتى يدلعني
والله حاسه انه لو كمل شهر كمان انه خلاص ماراح استحمل اكتر
ربي يسعدكم قولولي ايش الحل
والله باكتب وانا بابكي وزوجي خرج من البيت وهو زعلان مني
ومن امه اتمشكل معاها بسببي
اتخيلو عيدي من اخر برمضان وهو نكد
فرح اختي نكد
كل شي نكد من كتر الزعل انا ماعندي سكر
بس ارتفع وساير ما ينزل عن 200
وامس حللت وانا عندي اهلي حتى الضغط سار عالي
ووزني كل يوم بكيلو
وحليبي مرره قل ومسكينه بنتي سارت ماتشبع مني
والله حاسه الدنيا قفلت بوجهي
لااله الا الله محمد رسول الله
واخر كلامي استغفر الله والحمدلله