@ حمامة السلام بين الخيام ترعى الأغنام @

السلام عليكم ورحمة الله وبركاته:

أخواتي الحبيبات افتقدتكن خلال هذه الأيام القليلة واشتقت لكن جداً الله لا يحرمني منكم..

وكما وعدت بعض الأخوات أحكي لهن عن رحلتي للبر فها انا عند وعدي..

وصلنا ياطويلات العمر-إن شاء الله - للبر ليله الثلاثاء ولقينا جدتي الله يحفظها وخوالي الله

يخليهم مجهزين المخيم وشابين النار وبرغم إنا وصلنا متأخرين الساعة: 1 إلا انهم مجهزين

القهوة والحليب وجلسنا نسولف لحد الساعة:3 ثم نمنا ومع أننا نمنا متأخرين إلا انا استيقظنا

بدري وصلينا ولقينا جدتي مجهزه القهوة والحليب ومسويه خبز بُر وشابه النار وبعد ماأفطرنا

رحنا نتمشى وما شاء الله الأرض خضراء تفتح النفس والأغنام والإبل منتشرة في كل مكان

والمخيمات تزيد يوم بعد يوم والناس من كل مكان من الشرقية والحجاز والكويت والعراق

المهم بعد التمشيه رجعنا وبعد شوي جهزت جدتي الغداء وكان لذيذ جداً لأنها مصلحته على

الحطب (على فكرة جدتي شباب) وبعد الغداء جاسنا نسولف شوي وبعد العصر عزمنا خيمة

الشباب اللي هم خوالي على القهوة وبعدين احلفواعلينا نتقهوى عندهم في خيمتهم بعد المغرب

وحنا ماصدقنا:32: وقلنا تم وصارت هذي طريقتنا القهوة والفطور في الصباح في خيمة

الحريم وبعد المغرب في خيمة الشباب ولازم فيها شبة النار بالسمر وبعد صلاة العشاء نتعشى

ونسولف شوي وتقص علينا جدتي قصص أمي عندما كانت صغيرة :04: وقصص أخرى رائعه

وخوالي كل واحد يقول قصيدة ثم ننام وهذا برنامجنا اليومي ولكن تتخلله بعض الأحداث :-

لقطات من الحفل..:confused: الحمدالله وش حفله قصدي الرحلة ..

1- مره دربنا خالي على قيادة السيارة وكانت متعه وقال هذا الدرس الأول وبكره الدرس الثاني

وجيناكم ما شفنا الدرس الثاني :mad:

2- مره من المرارريت راحوا البنات على بالهم بيدورون ضبان رجعوا بضب صغير ميت من

شدة البرد:44: قاموا صلوا عليه ودفنوه .

3- مره كنا نصلي المغرب وكانت أختي الصغيره (سنتين ونصف) تصلي معانا وخلصنا

وجلسنا وهي تصلي بعد ماخلصت قلنا وش صليتي قالت بطفش صليت كل شيء.

4- احياناً جدتي او اي وحده من خالاتي إذا كان الوقت مناسب يمشونا على الوانيت كلهم

يسوقون بس في البر.

5- في ليلة من الليالي المقمرة كنا راجعين من الغنم قابلتنا امي لابسه فروه ومغيره مشيتها

تبي تخوفنا قمنا نرتجف:08: من الخوف ونكلمها ولا ترد علينا وهي تقرب منا ولما قعدنا

نسمي ضحكت وعرفناها بس وش عقبه بعد مانشف دمنا نحسبها بسم الله.

6- البعرورات الحلوات تتمخطر بين الخيام وخوالي وخالاتي يلعبون معها وحنا اكبر نا امي

نتنافض من الخوف بس شوي شوي صرنا نقرب منها عاااادي.

7- مره كانت الناقة(تبول) اعزكن الله قالت جدتي الشاطره اللي تحط راسها تحتها علشان

شعرها يطول ويكثر هنا تذكرت الحبيبة خادمة الدعوة..طبعاً ولا وحده مناشاطره:p -

8- أهم واحلى شيء أن الحشرات الطائرة والزاحفة تنعم بالسبات الشتوي ..

احس ان موضوعي غير مرتب بس هذا اللي حضرني وأهم شيء لاحظته فعلاً هي نعمة الأمن

فنحن نتمشى وننام في البر ولم نشعر بالخوف وهناك الناس يتحاشون ازعاج بعضهم بل

على العكس يقدمون المساعدة لكل محتاج..فلله الحمد والمنة على هذه النعمه .

اللهم ادمها مننعمة واحفظ البلاد والعباد من كل مكروه:26: :26: :26: