شلونكم وشخباركم
إن شاء الله تمام
بعد ما شفت بنات وايد يسألون عن الحمام المغربي وطريقة عمله في البيت
لأن وايد بنات ما يحبون انهم يسوونه بالصالون او أنه وحدة تسويه لهم في البيت
وانتوا عارفين طبعا لازم انتكشف وانبين اجزاء من جسمنا ما يجوز لنا كشفها
وانصير بدال ما نطلع انلق وحلوين وبشرتنا صافية وموحدة عقب الحمام
نطلع بإثم ومعصية لربنا يبين سوادها بوجوهنا واطلق كريم تفتيح ما يوخرها
علشان جذي
حبيت أفيدكم بالطريقة اللي انا اعتمدتها علشان اسويها بالبيت كل اسبوع او اسبوعين على حسب ظروفي
وهالطريقة اهي خلاصة لتجارب وطرق عدة للحمام المغربي
قريت منها بالمنتدى وبمنتديات ثانية
وخذيت من كل طريقة اللي يناسبني واللي يتوفر عندي من مستلزماتها وعدتها المطلوبة
الموهم
مابي اطول عليكم
الأدوات المطلوبة :
1- صابون بلدي مغربي
وهذي صورة لنوع من أنواعه الموجودة في السوق
" مو شرط تستخدمين اللي بالصورة استخدمي اللي متوفر عندج وتقدرين تحصلينه عند الحواج ( العطار ) "
وهذا شكل الصابون ولونه
2- ليفة مغربية
وتلاقينها عند الحواج ( العطار )
3- حنة
4 - عصير ليمونة
5- سكرب مقشر للجسم
" اختاري النوع المتوفر عندج واللي بشرتج ترتاح عليه والنكهة اللي انتي تحبينها "
6 - بلسم للشعر
" هم بعد اختاري النوع المتوفر عندج واللي يناسب شعرج "
7- حجر خفاف ( الصخرة اللي نحك فيها كعب القدم )
8 - صابونة الطاووس
9- ماي ورد
10 - بيبي أويل
" اختاري النوع اللي تحبينه وتحبين ريحته أنا استخدم اللي بالبابونج "
خلصنا المقادير :09:
ندخل على الطريقة :cook:
1- أول شي وأهم شي لازم الحمام وانتو بكرامة يكون فيه بخار
يعني اذا الماي حار عندج مجرد فتحي الدش واملي البانيو بالماي الحار لين تحسين ان الحمام صار فيه بخار.
إذا ما عندج بانيو بالبيت >> زي حلاتي
جيبي سطل او حوض وحطيه تحت الدش >>> مال الحمام مو مال الستلايت خخخخ
وخليه لحد ما تحسين الحمام صار فيه بخار
اذا الماي عندج حار بس ما تحسين انه طلع بخار
ممكن تغلين ماي بجدر كبير
وبعدين تصبين الماي سواء في البانيو اذا موجود عندج
او بسطل او حوض تحطينه بالحمام.
لأن المهم عندنا انا جسمج يتعرض للبخار.
2- غطسي جسمج بالبانيو بالماي الساخن حسب درجة الحرارة اللي يتحملها جسمج
اذا ما عندح بانيو >>> هم بعد زي حلاتي
ممكن تغسلين جسمج بالدش العادي بالماي الساخن.
3- تكونين انتي مجهزة من قبل الخلطة هذي :
الكمية اللي يحتاجها جسمج من الصابون المغربي
2 - 3 ملاعق كبيرة من الحنة
عصير ليمونة
تخلطينهم مع بعض عدل مدل.
تحطين من الخلطة هذي على كل جسمج وتخلينها لمدة 10 دقايق
بالنسبة للوجه حطي له من الخلطة وغسليه وردي حطي منها مرة ثانية وردي غسليه على طول لا تخلينها على ويهج مدة طويلة علشان ما يتحسس.
4- غسلي جسمج بالماي زين ما زين وبعدين جيبي الليفة وفركي جسمج فيها عدل وراح تشوفين الخلايا الميتة شلون راح تطلع من جسمج بالهبل.
5- شطفي جسمج بالماي وبللي شعرج وحطي على شعرج من البلسم وارفعيه بشباصة وحطي على جسمج من السكرب المقشر ووخليهم لمدة 2 - 3 دقايق. وبالنسبة للوجه حطيله من السكرب وغسليه على طول.
6 - بهالوقت انتي جيبي الحجر وفركي اقدامج من تحت عدل مدل علشان تطلع الخلايا الميتة.
7- غسلي جسمج وشعرج وجيبي صابونة الطاووس وفركي فيها جسمج.
8- شطفي جسمج بالماي زين وبعدين جيبي علبة بخاخ ماي فاضية وحطي فيها كمية من ماي الورد وخففيها بشوية ماي ورشي على ويهج وعلى جسمج.
9- وزعي البيبي اويل على جسمج وشوي على ويهج وبعدين جيبي الفوطة وطبطبي على جسمج ونشفيه من الماي شوي شوي.
وحمام الهنا يا قمورات :icon28:
وأي استفسار أنا حاظرة :rolleyes:
شكرا