والله نفسي شعري يطو ل راضيه لنص ظهري بس يطول ما خليت زيت ما حطيته لكن ....................؟

زيت الحلبه مره روعة

انا بجرب زيت جدايل من عبد الصمد القرشي

من فترة استخدمت لتساقط الشعر
وكانت النتيجة خيااال

والحين بعد اسبوع باستخدم مطول الشعر


وان شاء الله شعري يطول

طبعا

اولا
اقص اطراف شعري يوم 15 من كل شهر يعني لما يكون البدر كامل
وابي اخذ فيتامين للشعر
واستخدم الزيت يوم بعد يوم



؟؟؟؟شرايكم؟؟؟

من وين هالزيت وايش فوايده


وباقى الاخوات همتكم ايش صار عليكم

اهلين حلوين ودي اعلمكم تجربتي وتراها فعلا تجربتي والله شاهد على كل كلمه اقولها

كنت كثيرة الصبغات صبغه ورى صبغه انا شعري طبيعته ناعم وصراحه اي احد يشوفني على طول يلفت انتباهه المهم صبغات وعدم اهتمام ودايم قصير لحد المتن وترويش كل يوم لحد ما الشعر صار عدم انهبلت يوم شفت شعري بهت وصاركانه ليفه وبالصدفه اكلم وحده من صديقاتي عاد هذي البنت عليها شعر وعلى خواتها سبحان خالقة تقول لو يدس عن الناس كان دسيته لانها خافت على نفسها من العين المهم قالت وش اخبارك ياحلوة والله جايبتلك هديه روعه مرة بس انتي اقبليها عاد انا وجهي صدقتها هههههههههه قلت الله يهديك يا ام فلان ليش الكلافه انا تكفيني صداقتس قالت اقول بس من زينك علشان اشتريلك هديه هذي هدية معلومات فقط قلت الله يقطع ابليسك والله اني صدقت قامت العيباتي تقاطر من الفرحه بالهديه ايه لنا الله والله مدري اشلون اضف وجهي عاد انا وياها مابينا ميانه صديقات بالمرة ( اقول هذي بتعلمنا بخلطة او زيت او سوالف صديقتها ) المهم قالت الهديه الله يسلمك استخدمي المايونيز لشعرك واقعد اهاوش اعوذ بالله كيف مانستحي من ربنا نحط الجبن على شعورنا تبين هاليهود يستعمرونا قالت انا لله وش دخل اليهود بشعورنا ومايونيزنا قالت المهم تبين شعر صحي ولامه وناعم هذاني علمتك يالله جاء ابو الشباب يبي القهيوة خلي ابوكم يجيب لك مايونيز

المهم مالكم بالطويله قعدت افكر بكلام صديقتي عاد هي ما شاء الله حرمه سنعه سنعه بكل ماتعنيه هالكلمه يعني ماهي خربوطيه قلت والله ان افلانه ماهي بغاشتني المهم ياطويلات العمر رحنا للبقاله قصدي السوبر وجبنا اكبر علبة مايونيز وقعدت اضيف اشياء من بنات افكاري احلى ياخطير حشى صرت كاني العقاد او طه حسين

هاه قولولي وشن بنات افكارك قلت لبو العيال دور لي سمن بقر اصلي من بقيراتنا مابي بقر بلجيكا وجع ابي بقيرات عنيزة او البدائع قال سمي وبدات احلى مشوار وش سويت نجي للخلطة والله يابنات ثم والله عند اكتمال سنه عل هالخلطة ياطلع علي شعر قسما بالله اني اخاف من زميلاتي في العمل صار هو سالفتهن وش سويتي وش حطيتي وحدة تقولي انتي مسويه توصيل لشعرك من شدة ابهارها لاني ايام العودة كان كاريه قصير نصه اسود ونصه ميش ايفشل ايفشل نجي للخلطة

جيبي حنا اللي يكفي شعرك وحطي عليه ملعقة مايونيز وملعقة سمن بقر شوي محلب مطحون بيضة كامله ملعقة عسل واخلطيهم بالزبادي الماء لايقرب الحنا نهائي الا اذا تكتل حطي شوي علشان يحل عقدة وحطيه على شعرك انا كنت احطة الظهر لاجيت من المدرسه واغسله قبل المغرب يوم وراء يوم طبعا زوجي عنده زوجه ثانيه اذا عند زوجته حطيت حنا اذا عندي طبعا ما احط شي وتعالوا ماكملت اسبوع الا الصحه والعافيه راجعه لشعري ولا كملت سنه الا شعري تحت الارداف شي شي غير عادي

الله يخليكم بنات اذا استفدتم من طريقتي ادعولي ان الله يشفي ركبتي ويصخر لي اعيالي ويجعلهم صالحين مصلحينويصخر لي زوجي ويعافيه ويعطيه الصحه وسلامتكم