مبارك عليكم الشهر ...والله يعوده عليكم بصحه وعافيه
بنات انا هالفكره في بالي من زمان بس اتردد اني اكتبها بس صراحه تشجعت لأني ادري ان كل بنات الكويت فيهم الخير سواء كانت ملتزمه او عاديه....كلكم بنات هالديره الطيبة والطيب في دمكم
بصراحه لو كل وحده فينا فكرت جم تصرف كل شهر بينها وبين نفسها وفلوسها تصرفها على شنو....بتلقون ان مبالغ كبيره نصرفها على اشياء كمالية وترفيه
وحرمنا نفسنا من أجر كبيـــــــر ومنزلة عظيمة عند الله سبحانه وعند الرسول صلى الله عليه وسلم
وحرمنا نفسنا من تجربة إنسانية فيها متعه ماتتخيلونها وشعور حلو بلأنجاز والعطاء والرحمة
طبعاً اتكلم عن تجربة كفالة اليتيم......
بنات تخيلوا ان 10 دنانير بس تكفل حياة يتيم ....أكله وشربه والمكان اللي ينام فيه ولبسه ودراسته بـ 10 دنانير
ونفس المبلغ احنا نصرفه بأشياء بسيطه مثل حمره ولا ماسكرا وغيره << فرق كبيــــــــــــــر
بس مادري ليش الدينار اللي نتصدق فيه بعيونا نشوفه وايد وال100 دينار اللي على وناستنا وكشختنا نشوفه شويه
خلونا نبدى حملة إنسانية ونحس بمتعة الأنجاز ...
فكرة الحملة بإختصار .....اذا قدرتي تكفلين يتيم وتقنعين اي شخص ثاني انه يكفل يتيم تكونين حققتي إنجاز كبير وحققتي سعادة شخصين وحميتي طفلين من المرض والجوع...وأمنتي مستقبلهم لأن اذا كل طفل لقى شخص يكفله راح يكمل دراسته ويكون شخص فعال بالمجتمع...
الأجراءات بسيطه جداً وماتاخذ من وقتج اكثر من 5 دقايق وانتي قاعده بالبيت
تتصلين على المندوبه من اي لجنة من اللجان الخيريه بالكويت وياكثر اللجان في ديرة الخير
راح تعطيج المندوبة صور الأيتام ومعلومات عنهم واغلبهم من حفظة القرآن <<فديتهم
تختارين الطفل وراح تعطيج ورقه استقطاع شهري تعبين النموذج مجرد تكتبين اسمج ورقم حسابج وتوقعين واهيا تروح البنك وتكمل الأجراءات وكل 3أشهر بيوصلج ظرف فيه صورة طفلج (اللي كفلتيه) وراح يكتب لج اذا كان كبير ودار الأيتام بتعطيج نبذه عنه طبيعته هادى او نشيط وجذي مع صورة بالدار او بمدرسته وصدقوني شعور عجيييييييب وحلو يسوى الدنيا ومافيها لما يقولون لج ان طفلج حافظ جزئين او 3 اجزاء من القرآن الكريم ويمكن اكثر ...شعور حلو وتحسين بفخر كأنج صج امه
واذا كنتي طالبه ترى ماراح يكون شئ صعب راح تسوين استقطاع من الاعانة الأجتماعية يصير وعسى الله يوفقج بحياتج لأنها بتكون بداية حلوة لج...
وبقولكم قصه اثرت فيني حيـــــــــل...في شاب خليجي طايش ومو ملتزم صادف مره ان لقى لجنه بمكان عام وقاله الشيخ ليش ماتكفل يتيم وقعد يقوله فضل كفاله اليتيم وفعلاً اقتنع الشاب واهو مستعيل ولما خلص من الاجراءات المطلوبه كمل طريجه ونسى سالفه الكفاله وشالها من راسه بعد جم شهر سوى حادث قوي بالسياره ودخل غيبوبه فتره طويله ولما ردت له عافيته يحلف لأهله ان كان يشوف نار تحاوطه من كل مكان وكان في طفل يدور حواليه ويحجب النار عنه كلم شيخ دين وقاله عن اللي كان يشوفه واهو بغيبوبه فقاله الشيخ هل انت كافل يتيم وتذكر الشاب انه فعلاً كفل يتيم وقال اي قاله الشيخ عملك هذا هو اللي حال بينكم وبين النار ويمكن الله عطاك هالفرصه انك تعيش بسبب عملك هذا والشاب هذا التزم الحمدلله......
انا نسيت تفاصيل القصه بس هذا اللي اذكره لأنها صج اثرت فيني
الحين اللي اتمناه منكم انكم تدعمون الحملة خلونا نشجع كل بنات كويتيات ونشجع اهلنا واخوانا وازواجنا على كفالة اليتيم
واتمنى من المهتمين بالموضوع يحطون تواقيع الحمله عشان نشجع غيرنا وردودكم اهيا اللي بتشجع البنات
هذي تواقيع الحمله
أرقام اللجان
جمعية احياء التراث الاسلامي
5339068/9
جمعية الاصلاح الاجتماعي
2544999
بيت الزكاة
5747444-2240255/149
لجنة ساعد اخاك المسلم في كل مكان
5335014
جمعية بيادر السلام النسائيه
2562149
__________________منقول
