حملة لتغيير النظرة تجاه العازبات، ترا مو كل عزباء تعيسه :)،، تفضلوا

السلام عليكم ورحمة الله وبركاته

بعد تمحيص ومعرفة اكتشفت ان المتزوجات ماخذين فكرة سلبيه عن العازبات ومعممين هالفكره عليهم
ويفكرون ان كل عزباء تحس بالنقص والكسر عشانها مو متزوجة للحين.

في الحقيقه مو كل عزباء تعيسه ومو كل عزباء تفكر اربع وعشرين ساعة متى تتزوج
الصراحه احنا عايشين حياتنا مثل البشر الطبيعيين
نت- تلفزيون- افلام- طلعات- صديقات -وناسه- اهل- سفر- وظيفة- دراسه- اقارب -صلاه -صوم -ترتيب بيت -تطوير- شخصية -اكل -نوم -طبخ - رقص- ملابس- سوق- قيام ليل -يوتيوب- تويتر -انستقرام- بر والدين- فاشن -ديكور بيت -علاقات جديدة
وغيرها وغيرها كثير

للاسف بعض المتزوجات من شدة الغطرسة الي هي فيها، تعيب على الي ما تزوجت ونسيت ان الي اعطاها هالنعمه قادر بلحظة انه ينزعها منها.. بموت زوجها او طلاقها منه او زواجه عليها

حبيت اقولك عزيزتي المتزوجة تراك ما جبتي كأس العالم ولا اخترعتي الذرة،،
حتى شغالتنا متزوجة ،، السمرا والبيضا متزوجة الطويله والقصيرة متزوجه
الهندي الي يغسل سيارات حيّنا متزوج
سواقنا سافر بنقلادش و اتزوج و بنجيب له كيكه ونحتفل فيه اذا رجع هههههههههههه
الاعمى والمعاق والاطرش تزوجو كلهم

فبلاش حركات انا عندي وانتو ما عندكم ترا من جد محد درا عنكم ،، والعازبه سعيده وبالعكس تبارك لكل متزوجه ولا عمرها حسدت احد

انا رح اتكلم عن نفسي كل صديقاتي متزوجات واقاربي واخواتي الي بسن زواج متزوجات

وصديقاتي ماشالله تبارك اللله لو اقولكم عن ازواجهم وعن حظوهم عن رجالهم تفلق الصخر والله والله والله على ما اقول شهيد
انا صديقاتي ما خذين رجال ملكين جمال ومناصب،، ومال وعوائل راقيه
(ووحده اخذت واحد كانو يبونه عارض ازياء من جماله)
والله ان بعضهم كشخه وجمال امراء نفس الي تشوفينهم بانستقرام او بالتلفزيون بدون مبالغه
انا نفسي مذهوله من هااشي مره ما كنت اتوقعه

رغم ذلك فرحت لهم اشد فرحه كانهم انا، وحضرت زواجاتهم ورقصت واستانست من كل قلبي والبعض يسأل مين فلانه هذي الي ترقص وانخطب بزواجاتهم، لاني اكون متحمسه وفررحانه لهم ولا يهمني احد
ارقص واضحك من فرح واستمتع لهم ما قد حسيت بالحسد الي تقولونه

يا بنات ترا فيه كثير بنات اسوياء وفيه كثير ناس مسلمه امورها لله وفيه كثير ناس راضيه بنصيببها

يمكن لاني انا شبه مدلعه ببيت اهلي،، وابوي يخاف علي ويهتم فيني فما احس بزعل لما اسمع وحده انخطبت وتزوجت ابد ابد
بالعكس ادعيلها من كل قلبي من يوم ما اعرف بالخبر اللين يخلص زواجها

اصحوا يا بنات كفايه ظن سئ بالاخرين وكفايه تجريح ببنات الناس، على بالكم البنات محتاجين ازواج بشكل يائس مثل البعض

لا والله ربي مغنينا عن العالمين الحمدلله وبقلوبنا قناعة تسع كل متزوجه بعد باذن الله

اختي اصغر مني تزوجت والله اني كنت اقوم الليل وادعيلها ربي ييسر امورها ،، وكنت سعيده بيوم زواجها

واختي الاصغر الاصغر تنخطب الحين وانا اسعى لها بزواجها واكلم امي وابوي يسعوون لزواجها وما حسيت بنقص او زعل الا اشجعها توافق عالزواج..

ليش الناس يستغربو وما خذين فكرة اننا كلنا يائسات؟؟؟ جد جد انا مستغربه منكم ،،

لو نبي الزواج وميتين عليه كان من زمان تزوجنا اول واحد طق الباب بس احنا الي نرفض ومانبي وكذا مرتاحين
لو مو مرتاحين مع نفسنا كان نتروج اي رجال نشوفه مار بالشارع



لا يا حبيباتي الموضوع اكبر من كذا بكثير،،
هالشي احنا الي اخترناه برضانا،، ،، ومو لقلة الفرص او عدم صلاحيتنا نكون متزوجات
بالعكس انا اشوفها قوة اننا كسرنا القالب وكسرنا عادات المجتمع ورفضنا الزواج لهالسن،.. لان الزواح للان مو مناسب لنا
وانا متاكده في الوقت المناسب رح يجي نصيب كل وحده باجمل ما يكون



من جد على ايش شوفة النفس والهبه بالعرس ترا الزواج امر عادي جداً وشي مكمل لكل بنت مو شي اذا ماسار انتحر
( عادي لان الكل يتزوج، حتى الحيوانات تتزاوج وتكون عيله وتنجب اطفال معليش يعني وين الواااااو في الموضوع)

انا قناعتي: كذا اذا لقت الوحده الشخص الي ترتاح معاه ويريحها،، خلاص الله يوفقها تروح وتتزوج لو هي صغيره مره،، بس ااذا ما لقت عادي تعيش حياتها لين يجي التوفيق من الله. الزواج ماله عمر بس هو استعداد وتسخير من الله بس فيه ناس قليلة ايمان ما تفهم اقدار الله وحكمته بالكون ولا تفهم ان مو كل البنات سوى فيه بنات عندهم اولويات وفيه بنات عندهم خوف من الزواج فيرفضون اي فرصة تجيهم وفيه بنات عندهم مشاكل معينه،، او بعضهم عنده طموح معين مو الكل هدفه الزواج
ياريت تفهمون ان البشر يختلفون

ما يدرون اننا الحمدلله عايشين حياتنا وما نفكر بهالنقطه كثير

فيه واحد سأل الدكتور صلاح الراشد مرة بتويتر هل لازم الواحد يصل سن معين ويكون متزوج،، رد عليه وقاله اذا انت سعيد ومرتاح بدون زواج فانت وضعك طبيعي وعادي اذا مو حاب تتزوج لا تتتزوج ... وهو دكتور وعالم نفس وله اسهامات فاقت الخيال في الوطن العربي

يعني خذوا الكلام من اهل الذكر من اهل العلم لا تاخذونه من ناس غير واعيه...
الزواج رح يتم اذا كانت البنت موافقه ومستعده وراغبه بهالشي...

بس للاسف بعض العازبات نقلوا صورة غلط عننا والله انا عايشه حياتي طبيعي جداً وما افكر بهالموضوع الا وين وين واذا جا ببالي الحمدلله اكون متفائله

ورغم كل هذا انا ما قلت اننا ما نبي نتزوج ونبي نعيش طول عمرنا راهبات لا والله، بالعكس كل وحده فينا تبغا الساعه الي تتيسر امورها وتتوفق فيه،،، مو زواج والسلام عشان محدد يقول يووه مسكينه محد جاها

انا قلت هالموضوع عشان ينتبهون بعض المتزوجات لا ياخذون ذنب غيرهم ويتدخلون بخصوصيات الاخرين ويتدخلون بقراراتهم ويجرحون فيهم لا تنسون الدنيا دوراة وكما تدين تدان
تكفوا شر انفسكم،، وارتقوا باخلاقكم،، الدنيا ما تدوم لاحد،،،


اللهم اكفينا شر انفسنا،، واصلح لنا قلوبنا يارب

ملاحظة : انا ادري بتجي وحده وتفهم كلامي غلط وتقول اني ابي اسير راهبه وما ابي الزواج :)