حملت بحمل عنقودي افيدوني

الله يعوضس خير ان شاء الله. بس وشو الحمل العنقودي اول مره اسمع بوه.

الله يعوضك خير يارب
ولاتخافين انا مثلك بس ثلاث شهور بعد عملية التنظيف ونزل الهرمون للصفر من نفسه مافي شي تسوينه ينزله الا تدعين وتستغفرين وحبوب منع الحمل تفيدك
واخذت مانع المفروض سنة بس انا اخذته ٩ شهور وتركته وحملت بعد دورتين ماشالله والحين عندي ثلاثة الله يحفظهم ويصلحهم يارب
ولاتسمعين حيل للمستشفيات يعطون الموضوع اكبر من حجمه اقصد خذي المانع بس تفائلي خير وربي يرزقك كل خير

الله يجزاك خير
انا ماعرفته الا فيني بس
صار معي نزيف فجاه ورحت سويت اشاعه وقالت الدكتوره هذا حمل مو طبيعي واسمه عنقودي وتكون المشيمه مثل عناقيد العنب وتشوه الجنين ومايعيش ابد ولازم ينزل بسرعه بتخدير كامل وشفط ونسبه الحمل فيه تكون جدااا مرتفعه ويخافون الدكاتره انه يتحول لسرطان فا ينزلونه ويبقى بعد ماينزلونه نسبه هرمون الحمل تتابع بشكل دائم ولازم تنزل لانها اذا مانزلت يخافون ان الخلايات تكاثرت ورجعت فيضطرون يعالجونه بحبوب كيماوي وفي حال كان هالهرمون ينزل ومايرتفع ولا يثبت فان شالله ان الامور طيبه وممنوع الحمل مده سنه او اكثر لانه خطر بهالفتره واذا صار نسبته صفر ممكن بعد كم شهر يكون الحمل طبيعي
ان شالله شرحي واضح
وان شاءالله محد يحمل هالحمل لانه متعب نفسيا بس الحمدلله على كل حال هذي اراده الله واسال الله ان يعوض تعبي وصبري خير يارب

نورا الرايقه

الله يجزاك خير ويحفظ لك عيالك ويصلحهم يارب
انا عندي اطفال ثلاث الصغيره عمرها 3 ونص
انا ماعرف ولا وحده حملت هالحمل ومدري وش اسوي
طيب اذا صارت صفر ماترجع مره ثانيه ترتفع والله الدكتوره هنديه ولالها خلق وماتفهم عربي والنت مالقيت شي عنه

بنت عمتي حملت حمل عنقودي مرتين
الاول عالجت لين رجع الهرمون طبيعي وصار صفر وبعد سنه حملت مره ثانيه ونفس الشي عنقودي
عالجته مارجع الهرمون طبيعي كل ماله يزيد لين تحول لسرطان وشالت رحمها