حملت بعد ماقرروا اني ماحمل الا بالحقن المجهري والسبب..........

السلام عليكم ورحمة الله وبركاته


قبل لابدا بالموضوع يارب تفرح كل محرومه مثل مافرحتني وتفرجها على الجميع


انا متزوجه لي اربع سنوات من اول سنه سويت التحاليل وطلع معي هرمون حليب واستمريت على علاجه سنتين ينزل ولاتركت العلاج يرتفع ويوصل الى فوق الالف

رحت كل مكان وماخليت دايه ولا علاج ولا نفع وبعدها رحت انا وزوجي للحبيب دخلنا على الدكتوره زينب وسوت لنا التحاليل طلع زوجي معه حركة الحيوانات صفر قالت بكل سهوله وبدون مراعاة لمشاعرنا ماينفع معكم الا الحقن المجهري ماتتخيون صدمتنا بكيت وتعبت نفسينا كم يوم وبعدها حمدت الله وقلت المهم يجونا عيال

قررت اسوي العمليه بس عند الدكتور سعد الحسن بمركز ذريه جتني الدوره واتصلت على المركز قالت لي الدكتور ماخذ اجازه بكيت مره ثانيه وتعبت نفسيتي وتركت حبوب هرمون الحليب لانها تعبتني وبدون فايده قلت دام الحمل لازم بانابيب مو لازم ينزل الهرمون

جتني الدوره للشهر اللي بعده وكان موعدها بالاختبارات وانا معلمه صعب اروح واجلتها قلت دورة شهر ثلاثه اروح

وجاء شهر ثلاثه وقبل موعد الدوره جاني برد مغص وتعب من تغير الجو رحت المستشفى وطلب من الدكتور اختبار حمل قبل العلاج انقهرت منه لاني مابي هالتحليل نتيجته معروفه مافيه حمل وانا مابي اتعب نفسيتي اكثر

سويت التحليل ومن غير مانتظر النتيجه رحت البيت وقلت لزوجي يرجع ياخذها

النتيجه كانت ايجابيه طلعت حااااااااااااااااااااااااااااامل من غير حقن ولا انابيب ولا كلوميد ولا حبوب هرمون الحليب حملت بارادة الله مو بارادة البشر حملت طبيعي بحكم الله مو بحكم زيبنب ابو طالب اللي قالت لي ماتحملين الا بالمجهري ..........

العلاااااااااااااااااااااااااااااااااااااااااااااااااااااج اللي استخدمه زوجي كان بوصف من الدكتور صالح اخصائي مسالك بوليه بمستشفى الحبيب بالرياض قال له جرب هالدواء ثلاث شهور وبعدها حلل يمكن ينفعك

الدواء اسمه بروكسيد عباره عن بودره تذوب بماء مرتين يوميا بصراحه انا مالقيته الا بصيدلية الحبيب بالرياض والقصيم ماعرف انزل صورته بس موجوده بقوقل لاسويتوا بحث

بالاضافه الى هذا الدواء وصف له فيتامين اي وزوجي كان ياخذ من عنده زنك وحمض الفوليك وفيتامين سي

امانه يابنات اي وحده تعرف واحد مصاب بالدوالي وعنده الحركه صفر توصف له هالعلاج الدكتور طلب من زوجي يخلص 6 علب وبعدها يحلل وانا حملت وزوجي يستخدم العلبه الخامسه