حملت طبيعي بفضل الله .. قصتي للأمل والتفاؤل

السلام عليكم ورحمه الله وبركاته 




حبيت انقل لكم تجربتي يمكن تكون سلوى لوحده منكم 
يمكن تعطيكم امل وتشوفون مشكلتكم فيني والحمدلله فرج الله قريب 








بقولكم قصتي 




انا متزوجه من 4 سنوات .. من بعد سنه من الزواج بدأت رحله العلاج واول شي اكتشفته ان فيني تكيس مبايض 
وضعف تبويض 
وكنت متساهله وتوقعت بعد فتره بسيطه راح اتعالج لكن الموضوع استمر فتره طويله وانا علاجات وادويه بعدين بدأت اراجع عند اخصائيين عقم 
جربت كلوميد مانفع 
جربت ابر منشطات مانفع 
قالي الدكتور نجرب تلقيح صناعي 
وجربته مرتين ولا حملت 




ماراح اقولكم كميه احباط والم وتعب نفسي واستهلاك مادي وجسدي غير طبيعي 
غير طبعا نظرات الي حولي والكلام والهمز واللمز وزوجي بعد كثير صاروا يسألونه وابوه يقوله اذا تبي تتزوج راح نعينك 
علاقتي انا وزوجي حلوه ومتفاهمين وتحملنا صعاب كثير مع بعض لكن بعد فتره حسيت انه بدأ يطفش ويقول انا مافيني شي ليش انتظر خاصه انه اكبر مني ب 12 سنه وبدأ يجرحني بالكلام فلانه زوجه اخوي تحمل طبيعي وماحتاجون يفلسون عشان يسوون عمليه واختي كذا ومادري ايش 




كان اخر امل عندي الانابيب 
رحت للدكتور محمد بقنه في مستشفى الحبيب وقالي مافي حل عندك الا الانابيب لانك جربتي كل شي 




واخذت ابره تحضيريه قبل العمليه باسبوعين وحددت موعد العمليه راح تكون هذا الشهر وسويت تحاليل لقيت هرمون الحليب مرتفع عندي شوي واعطاني حبوب لمده اسبوعين وكنت خايفه يأجل العمليه لكن قال الارتفاع بسيط ومع الادويه بينحل 




وكانت اعصابي منتهيه انتظر يوم العمليه بفارغ الصبر وقريت عن تفاصيل تفاصيلها 
وانتظرت الدوره تجي عشان ابدأ منشطات قبل العمليه لكنها تأخرت 




تأخرت اسبوع واخذت موعد مع الدكتور عشان يعطيني شي ينزلها خفت هذا الشهر ماتجي لان ماعندي استعداد انتظر اكثر للشهر الجاي 




ورحت شريت فوط صحيه لانها انتهت عندي وانا عند الحساب في شي الهمني اشتري تحليل حمل قبل اجرب شي ينزل الدوره لان كنت ناويه اشرب قرفه اذا رجعت البيت 




اخذت تحليل الحمل ورحت البيت رميته في الدرج واليوم الثاني الصبح حطيت القرفه عالنار وقلت بسوي تحليل حمل ابرئ ذمتي قبل اشرب قرفه وانا جالسه اضحك على نفسي 




سويته وفي اقل من دقيقه طلع خطين واااااااضحه  




انصدمت قلت مستحيل اكيد التحليل نوع سيئ ولا لاني اخذت علاج هرمون الحليب ادري ماله علاقه بس كل شي جا ببالي الا حمل 




رحت لزوجي مصدومه وريته التحليل مافهم شي قلت له التحليل يقول اني حامل !!!! 




انصدم قال خلينا نروح المستشفى نتأكد وقام يهديني يقول عادي لو ماطلع احنا راح نسوي عمليه هالاسبوع 




رحت حللت وفي اقل من ربع ساعه طلع الممرض يبتسم ويبارك لنا !!!!!!!!! 








والله يابنات جلست ثلاثه ايام مصدوووووووووومه كان المفروض اني ابدأ علاج عشان عمليه انابيب 
طيب ليش ماحملت تلقيح صناعي مرتين والحين بسهوله احمل طبيعي ؟؟؟ 








سبحان الكريم 
سبحان الرزاق 
اذا اعطى ادهش 




راح اكتب في نقاط اشياء ممكن تكون ساعدت في حملي طبيعي .. وادعولي يابنات ان الله يتمم لي حملي ويقر عيني فيه 








1- الدعاء 
2- زرت الروضه الشريفه في رمضان ودعيت فيها والحيت علئ الله بالدعاء 
3- دعيت ربي لاتذرني فردا وانت خير الوارثين اربعين مره في السجود 
4- صدقه 
5- كفاله يتيم 
6- استغفار 
7- استمريت على حمض الفوليك اكثر من 4 شهور 
8- نقصت وزني 20 كيلو 
9- استخدمت انا وزوجي حبوب غذاء ملكه النحل 
10- كان فيتامين د ناقص وتعالجت منه وارتفع
11- حسن الظن بالله ( وهذي النقطه بالتحديد لازم اقول ان كان عندي شبه يأس بعد رحله العلاج الحمدلله ماكانت طويله مره لكن كان متعبه فكنت افكر في بنات لهم فتره ماحملوا واقول ليش ماحملوا اكيد انهم سوو كل شي ولا حملوا شكلي راح اكون زيهم .. وصرت اخيل نفسي كبيره ولاعندي اطفال واتخيل زوجي تزوج علي لدرجه كنت ابكي .. سبحان الله تابعت حلقات للدكتور صلاح الراشد رمضان الي فات وكان يتكلم عن حسن الظن بالله وقانون الجذب وكان في حلقه له اسمها ( انت تجذب ماتخاف منه ) وفعلا الظن السيئ بالله يكون كما ظن الشخص وقررت احسن الظن بالله وسويت تمارين موجوده في الحلقه كيف احسن الظن واتخلص من اليأس والحمدلله اول فائده اني ارتحت تمااااااما نفسيا والشي الثاني لما ظنيت بالله انه راح يرزقني رزقني ) 




حلمت اكثر من حلم وكنت افسرها ويطلع تفسيرها ذريه .. مره حلمت اني اكحل عيوني .. ومره حلمت اني لابسه جزمه جابها لي زوجي 
والمره الثالثه كانت بنفس الاسبوع الي حللت فيه ان زوجي حط دجاجه لي في البيت 




 
واولا واخيرا فضل ومنه ورزق من رب العالمين اسأل الله العظيم ان يتمم علي فضله بتمام الحمل والذريه الصالحه 








ويرزق كل محرومه من الذريه عاجلا لا اجلا والله العظيم اني حاسه بكل وحده فيكم لأني كنت زيكم  هم وتعب وعلاج ودموع لكن فرج الله قريب لاتيأسون .. والله ماكتبت لكم الا عشان اعطيكم امل لاني كنت ادخل هالقسم كثير واشوف بنات يقولون حملنا وكنت افرح لهم واقول يارب اسألك من فضلك العظيم ..




ادعولي ربي يتمم علي ويرزقكم جميعا