حملت وانا عندي تكيسات وصغر في البويضات

السلام عليكم ورحمة الله

اخواتي الحبيبات انا بحط لكم تجربتي مع التكيسات للفائده

والله يرزق كل متاخره ويفرح قلوبكم اجمعين

اولا انا كنت استخدم حبوب منع الحمل

وتركتها على اساس احمل لكن تاخرت في الحمل

ولما صار عمر بنتي 4 سنوات قررت اروح اراجع واشوف المشكله الي عندي لان الدوره كانت تلخبط معاي وتجيني الام قبل الدوره

وصار لي 8 شهور من وقت ماتركت حبوب المنع

رحت سويت تحليل هرمونات وفحوصات وقالت لي الدكتوره عندي تكيسات وصغر في البويضات وميلان في الرحم

وبديت العلاج

طبعاً اول شي عطتني حبوب الجلوكوفاج كنت اخذها مرتين في اليوم وكمان حبوب الفوليك اسيد

وكانت الدوره تتاخر عندي لدرجه تتاخر 23 يوم وكنت اتوقع انه حمل اروح افحص مافيه حمل

وقعدت ثلاث شهور اخذ كلوميد ومنشطات وابر تفجيريه وانتظر الحمل بكل شوق بس ماكتب لي ربي الحمل في ذيك الفتره

وكان كل تفكيري في الحمل

بعدها قررت اترك هالمنشطات وخفت من اثرها واضرارها وغير كذا كانت تكلفتها مو هينه

بعدها بديت استخدم الاعشاب وراح اقولكم على الاعشاب الي استخدمتها

استخدمت عشبة المدينه مع الدوره من اول يوم عالريق كنت استخدمها مع حليب مرتين في اليوم

لمدة 5 أيام

طبعاً هالعشبه عجيبه سبحان الله صحيح ريحتها وطعمها شين

لكن والله العظيم كانت دورتي غير لانها تنظف وتشيل الانسدادات ومنشطه للمبايض وموصى بها في الطب النبوي وانظمت دورتي الحمدلله

وكمان كنت استخدم الميرميه نفس الشي من اول الدوره لمدة عشر ايام تقريبا المهم كنت اوقفها قبل ايام التبويض وكمان الميرميه كويسه في علاج التكيسات

كنت استخدم عصير الاناناس والمويه لازم كميه كبيره

واهتم بنفسي وقت الدوره في اللبس والاكل والشرب

والعشبه الي بفضل الله ومنته حملت بعد ماأستخدمتها على طول هي البردقوش

والله العظيم يابنات استخدمتها شهر واحد فقط

من بداية الدوره لمدة اسبوع

واستخدمتها لحالها بدون مااستخدم اي عشبه ثانيه معاها

والشي المهم ان الشهر الي حملت فيه كنت شايله فكرة الحمل من راسي لان كثرة التفكير ممكن تمنع الحمل

زوجي كان مسافر في ايام التبويض وشلت فكرة الحمل مره من راسي

بس سبحان الله اذا ربي كتب شي راح يصير زوجي رجع من السفر على اخر يوم تقريبا

وتاخرت الدوره شهر واسبوع ولا فكرت اروح احلل لاني كنت مستبعده اني اكون حامل

ومره كنت رايحه لموعد بنتي في المستشفى ودخلت الصيدليه واخذت شريط حمل بدون مايدري زوجي

رجعت البيت وسويت التحليل المنزلي والحمدلله طلع لي خطين على طول

واليوم الثاني رحت المستشفى واكدت لي الدكتوره اني حامل

الحمدلله رب العالمين

الله يبلغكم اليوم الي تبشرون فيه بالحمل

نجي للأهــــم

الدعاء والاستغفار اهم شي

وخلو ثقتكم في ربي كبيره والله اني كنت ادعي وانا مؤقنه انه بيجي اليوم الي راح تبشرني الدكتوره بالحمل وكنت ادعي واتخيل فرحتي وفرحة زوجي بالحمل والحمدلله ربي ماخيب ظني له الحمد والشكر

موية زمزم كنت اشربها بنية الله يشفيني من التكيسات وادعي في المويه قبل اشرب

الصدقه يابنات تصدقو لو بشي يسير والله ماراح يخيبكم وتذكرو انه مانقص مال من صدقه

المشي مهم جداً للتكيسات والمويه اشربو كميات كبيره

وانتبهوا للاكل حاولو تقللون من السكريات والمقالي

والله يفرح قلوبكم اجمعين

طرحت تجربتي للفائدهـ لاني مجربه

ادعوا لي الله يثبت لي حملي ويشفي لي بنتي ويفرح قلبي فيها ويعوضني انا وابوها ويفرحنا باللي في بطني