حمولتي قلبوا علي

السلام عليكم
اخباركم خواتي
انا متزوجة من فترة كنت باول زواجي اعزم حمولتي واقوم معاهم اذا صارت عندهم عزايم للرجال واهديهم وما ادخل يدي فاضية لكن فجأة بدون مقدمات قلبوا قلبه قوية ماعمرهم عزموني اذا سوا عزايم لحريم خوالهم او عمامهم ! حملت بنتهم ما خبروني الا لما وصلت للسابع خوفا من عيني مع العلم اني اذكر الله .. خططنا نسافر انا وزوجي وهو من النوع مهما قلت له لا تعلم احد يروح يعلم قال لامه وقامت امه تدقني بالحكي لما اجيهم ليه تسافرون خساير وتروح وترجعون للحر والدنيا مافيها امان وانصدمت بعد اسبوع مسافرة هي وبناتها ؟ لا والاشد من كذا مسوين لي تخصيص بسناب عشان ما اشوف صورهم عرفت من عداد سنابهم يمشي وانا ما اشوف ولا صورة لهم ! طيب ليه هالقلبة باول الزواج بنتنا حبيبتنا والحين ابليس قاعد مع العلم اني ما اطلع اخبارهم ولا اسال عن خصوصياتهم ومحترمة نفسي بس تصرفاتهم هذي ماهي طبيعية ولا عندي سلايف عشان اقول قلبوهم علي ! ولاني مالله رزقني بذرية كل مااتشوفني تبدأ تدق بالحكي هي وبناتها انها حملوا وهم يرضعون وانهم يستخدمون اشد الموانع خوف من الحمل ! لا والله بصدق تخيلوا خواتي ام زوجي عمرها بالستين وتقولي استخدم مانع حمل ومنحاشة اخاف احمل !! كيف تحملين والدورة ما تجيك ؟؟؟؟ يعني عشاني ماحملت تسوي فيني هالحركات هذا والتاخير من ولدها مو مني ! ليه كذا
واكلمهم بالواتس اسلم عليهم يقرون ويسفطون حتى ام زوجي ؟
لييييه وش هالقلبة الاليمة وانا ماسويت شي كافة خيري شري حتى زوجي لاحظ يسألني من زمان عن خواتي ما يرسلون لك سنابات قلت لا قال انتم متهاوشين قلت لا ! انا بنفسي عجزت افسر حركاتهم غريبين جدااا مع العلم هم اللي مختاريني لولدهم وفوق هذا خاشيني عن قرايبهم وجيرانهم مدري مستحين مني ؟ مع ان وربي اني البس واكشخ والكل يثني علي ولا في شي يفشل واعرف متى احكي ومتى ما احكي ، مدري هي شخصيتهم بانت على الحقيقة وقبل يجاملون ؟ او غيرة وحسد ؟ او ايش عجزت افسرها !




وش الحل ؟