حوامل خميس مشيط وأبها ..تجربتي الأولى بالولاده حبيت افيدكم..

يسعد صباحكم / مسائكم حبيباتي..


هذا أول موضوع ليه بهالمنتدى ..


قبل فتره كنت حامل ..

وولدت قبل ثلاث اسابيع ولله الحمد..

جبت بنوته سميتها ميرال فديت عنونها..

المهم..

كنت ألف وأدور بالنت ادور على أحد يفيدني ..

لأني كنت محتااااره وين أولد !!!!


وقررت بس ربي يقومني بالسلامه راح افيد أخواتي بالتفصيل الممل..




أولاً ..

كنت مو عارفه متى أروح للمستشفى ..

وشو هالطلق اللي يتكلمون عنه..


ثانياً ..

سمعت كثيير عن الولاده وآلامها

كنت ادور على افضل طريقه للولاده بدون ألم..


ثالثاً ..

كنت أسأل عن افضل مستشفى من ناحية الإهتمام والنظافه..




من بداية حملي وانا اراجع بالمستشفى العسكري..

ومع بداية الشهر التاسع قررت اروح لمستشفى خاص


بحثت كثييير في النت ورسيت على مستشفى ابها الخاص..

رغم انه بعيد لأن اهلي ساكنين بالخميس..يعني مشوار..



بس سمعت عن الابره شبه مخدره وقت الولاده ماتحسين

بشي (كأنك بحلم) حسب ماقريت..

وبيوم طلعت من البيت رايحه لأبها الخاص..

وانا دوم استخير وادعي ربي يكتب لي اللي فيه الخير..

المهم الوقت صيف..

والطريق زحمـــــــــــــــــــــــه

أخذت بالمشوار ساعه ونص مع زحمة السير

بديت اتردد

شلون راح اتحمل هالمشوار ..

وخفت اولد بالطريق

<<<على بالها تك وتولد

الوكاد وصلت المستشفى إلا وحوامل الجنوب كلهم فيه..

حاولت أدخل للدكتوره

بس كانت الساعه 9 ومافيه غير دكتوره وحده وعندها 18 حاله

قالتلي موضفة الاستقبال بكره تعالي الصباح..


قلت لنفسي يمكن خيييييره..


طلعت من المستشفى ودايركت على مستشفى الحياه

سبحان الله الخيره فيما اختاره الله..


المهم دخلت فتحت ملف ودخلت عند دكتوره فرحات (هنديه)

كشفت علي وقالت لازم تخطيط للبيبي

سويت تخطيط وكان بقسم الولاده (المخاض)

وكان هذا العيب الوحيد بمستشفى الحياه

ان غرف الولاده جنب بعض يفصل بين كل غرفتين غرفة البيبي

يعني تسمعين صراخ الحريم اللي يولدون

وقتها طار عقلي

وانا من اول مو ناقصه

صرت بس ادعيلهم ربي يهون عليهم..

المهم

سويت التخطيط وقالت كل شي تمام

بس اذا حسيتي بأي ألم أو نزل عليك مويه أو دم

تعالي على طول .. وقالت أكمل التاسع بـ 16 / 8 ..


رجعت البيت

وكنت اقرأ بالنت عن ابرة الظهر

وقررت اني آخذها

سألت الدكتوره عنها قالت موجوده

وكتبت بالملف اني طالبتها



هذيك الايام يجيني مغص ويروح

كذا بالتاسع راح تحسون زي ألم الدوره


وبيوم 16 / 8 بديت أحس ألم غريب أسفل ظهري

استمر من الليل يروح ويرجع

بس كان خفيف مو مره قوي


اتصلت على زوجي الساعه 11 الصباح لأني كنت عند أهلي

ورحنا المستشفى مع اني ماتوقعت ولاده

وصلت قسم الطوارئ

ولما قلت للنيرس اني كملت التاسع واحس ألم

على طول اخذتني على عربيه لقسم الولاده

دخلت حطوني بغرفه لحالي

وكان فيه ثلاث ولادات بنفس اليوم بس اسمع

وقلبي يرجف وادعي ربي يسهل لكل مسلمه..

المهم الدكتوره كانت مشغوله وهي الدكتوره عليا كنت

اسمعها وهي تساعد اللي يولدون ومبين عليها حنونه

ولما ولدوا الثلاث جات عندي

كشفت علي من تحت وقالت الرحم مفتوح 2 سم

وقالت اجلسي نص ساعه اذا انفتح اكثر لازم تنويم

وقتها فرحت وخفت ابي اخلص

تعبت من الحمل

وبنفس الوقت خايفه من امجهول اللي ينتظرني اللي اسمه

ولاده

... بعد نص ساعه جات كشفت وآآآه من ألم الكشف

تدخل يدها من تحت عشان تقيس وانواع الألم..

لقته زاد صار 2 ونص


قالت تنويم بس راح تطولين لأنك بكريه..

قلتلها انا طالبه ابرة الظهر

قالت ليه

قلت خايفه من الألم

قالت حرام الحوض حجمه كويس والجنين مناسب له

وكل شي تمام

واذا عطيتك الابره مارح تقدرين تدفعين

ويثبت الجنين داخل ونضطر نعمل قيصريه

وانا وقتها جنيت من اصوات اللي كانوا يولدون

قلتلها بأخذها على مسؤليتي

قالت مارح اعطيك ومشت وخلتني

وقتها حقدت عليها

بس الحين ادعيلها

لو غيرها بمستشفى خاص مارح تصدق

الابره لحالها بألف

بس جزاها الله خير



نقلوني غرفه ثانيه وحطولي جهاز التخطيط على بطني

بعد ما بدلت ملابسي ولبس روب من عندهم..

بعد ساعه تقريباً رجعت كشفت لقته صار مفتوح 3 سم

وكان يجيني مغص خفيف يالله احسه

وقتها يمكن الساعه 4 العصر

وجلس 3سم الى الساعه 8 مساءً

بدأ المكان يهدأ لأن الدوام ينتهي الساعه 9

وانا على السرير

تعذبت من الجهاز اللي حاطينه على بطني

بدأ الطلق يزيد

كان يشد علي بأسفل ظهري

بس أنا من قبل كنت أقرأ عن تمارين التنفسوقت الطلق

كانوا معطيني اوكسجين..

وكل ما بدأ الألم استنشق بسرعه من انفي واطلع من فمي

واحاول اضغط على ظهري بمكان الأم حتى تروح الطلقه

وهذي الطريقه ساعدت بعد الله على تخفيف الألم..

الله يجزيها الجنه اللي افادتني فيها

وهي اخت بأحد المنتديات مااعرفها بس الله يكتب أجرها..

المهم لما صارت الساعه 8 بالليل جات الدكتوره المناوبه

وكانت مصريه لقت الرحم انفتح 4 سم..

ومن وقت مادخلت المستشفى الصباح ماعطوني غير شربه

وسوائل عشان وقت الولاده

المهم وقف الرحم على 4 سم لين اليوم الثاني

وبهالوقت كان زوجي معاي بالمستشفى بس مو بالقسم

لأنو ممنوع دخول الرجال

بس كنت اقابله من الباب كل شوي

مليت من الجلوس والألم مع الوقت يزيد

عشان كذا نصيحتي لكل بكر ماجربت الولاده

(لاتروحي المستشفى إلا إذا حسيتي ألم قوووووي )

لأنهم راح يتعبونك بالكشف وبجهاز التخطيط ومغذيات

بالبيت أريح لك تنامين

تمشين شوي

تسولفين مع أهلك

حتى لو فيه ألم بس رهبة المستشفى تزيد التعب..


المهم كنت بالليل امشي بالممر وشوي أرجع تركبلي جهاز

التخطيط

وكانت كل ساعتين تقريباً تجي تكشف وتقول 4 سم

ويضيق صدري خلاااااص تعبت ابي اولد

وكانت تقول عااادي لأنك بكريه اصبري شوي..

المهم بقى من الساعه 8 الليل للساعه7 الصباح على 4 سم

بس الساعه 7 كنت تعبااانه من الطلق اللي صار يجي

سريع ورا بعض

وكنت مواصله من اليوم اللي قبل يعني تعب ونوم وجوع..

قالت الدكتوره هو 4 سم بس جدار الرحم صار رقيق

يعني لو طلقتين حاميه راح تولدي

وفيه بعضهم 7 سم بس الجدار يكون سميك ويطولوا أكثر..

طمنتني شوي..

وع الساعه 11 الصياح بدأ الجد..

وكانت الممرضه قبل توريني على جهاز التخطيط

تقول هذي الطلقات

كانت طلقتين كل عشر دقايق

تقول لازم تصير خمس طلقات قويه عشان يطلع البيبي

المهم من بعد الساعه 11 صار الألم قوي و

بدأ ألم قوي

بس سبحان الله ثواني وكأن مافيكي شي

ويبدأ الألم يتغير ويصير كأنك تشدين زي لما يكون عندك

امساك الله يكرمكم

بس هالشد يجي غصب عنك

يعني مو بكيفك

بس لما تقولك الدكتوره شدي تشدين

وتحاولين تبقين شاده وتاخذين نفس وانتي شاده يعني

ماتفكين نفسك

وكانت بهالوقت بس الممرضه والقابله معاي

ولما اشتد الألم

جات الدكتوره فرحات

وكشفت لقت الرحم انفتح 10 سم

دخلت يدها ومعاها انبوب طويل

دخلته وكأنه شي انفجر داخلي

وطلع مني مويه كثييييييره

سبحان الخالق العظيم

وصغر بطني شوي

خفت

سألتها مايضر الجنين اذا طول بعد نزول المويه

قالت لا ان شاء الله

جلست تقريباً ساعه ألم قوي

والدكتوره تقولي إذا جاء ألم شدي

وكنت أشد وأدعي ربي لي ولوالدي

الله يكتب الأجر


ولما قرب البيبي يطلع عطتني ابره بالفخذ

ماحسيت بالتوسيع ولا حسيت بالبيبي لما طلع بس شفتها

لما شالتها الممرضه والدكتوره كانت تقول برافوا عليك

يعني الحمد لله

كثير يقولون خروج رأس الطفل هو الموت

أنا ماحسيته أبد

لله الحمد والشكر

المهم ياحبياتي


كنت أشد بقوه والساع 1 وربع طلعت أحلى ميرال للدنيا

ربي يحفظها ويخليها ليه

اخذتها الممرضه لغرفه جنبي

كان فيها استشاري اطفال يتأكد من صحتها

وأنا بدأت الدكتوره تضغط على بطني عشان تطلع المشيمه

وكمان ماحسيتها من فضل ربي

وبدأت الدكتوره تخيط

حسيت وخز خفيف

بس وقتها انهد حيلي

بس خياطتها رائعه

الحمد لله ماحسيتها ابد لين طاحت الخيوط

ولا تألمت منها

وكنت وقت الولاده انام بين كل طلقه والثانيه لأنهم اذا

اشتد الألم يعطونك اوكسجين مخدر

يخفف الألم

المهم

بعدماخلصت الدكتوره الخياطه

جابولي بنوتتي

بس بوستها واخذوها للحظانه

وكانت هذي أحلى لحظه بحياتي

نسيت الألم والتعب

فديت روحها والله يعطي كل محرومه

بعد الولاده يجي نوم مو طبيعي

نظفت الممرضه المكان وعطتني ابره مسكنه

وغطتني

وبعد محاولات دخل زوجي بس ثواني تطمن علي وطلعوه


ونمت بنفس الغرف

ساعتين تقريباً

وصحيت اناظر حولي وكأن اللي عشته كله كان حلم

سبحان الله على كثر ألم الولاده إلا انه شي وقتي

ويمر ولا كأنه صار

المهم

بعد ماصحيت

جات الدكتوره شافت الجرح

وكانت تضغط بطني بقوووه وتسوي مساج

وكنت احس الدم يطلع مني كثير

وقتها تألمت بس كانت تقول عشان يروح الدم

ومايجيك نزيف بعدين

وفعلاً ماعرفت معنى كلامها الا بعدين

مانزل مني دم الا كم يوم

والباقي خفيييف...


جابولي أكل

ودخلت الممرضه ماما وبابا لاعدمتهم

بس تطمنوا علي وطلعوا

بعدين ساعدتني الممرضه دخلت الحمام اكرمكم الله

و بدلت ملابسي وهي معاي

حتى الشبشب الله يعزكم

هي لبستني

طلعت لي كلوت من عندهم وركبتلي الفوطه

ولبستني

وعطتني كريم مضاد ادهن فيه الجرح

وبعدين جلستني بالعربيه واخذتني لقسم التنويم

وكانت غرفتي جاهزه

واهلي ينتظروني

وغرفهم مرررره حلوه

بوياتها روعه كانت غرفتي اورنج

لوحات وابجوره كأنك بفندق

راح احول انزل صور الغرفه

وكانت الولاده بـ 3500ريال

بس لأن امي باتت معاي

المرافق 200 ريال الليله

طلعت 3700

والبيبي طبعاً بالحضانه مايطلعونه

ومايدخل الا الاب والام

واللي يبي يشوفه غيرهم من ورا القزاز بس

ولازم لما ندخل الحضانه نعقم ايدينا ونلبس ستره

يعني اهتمامهم حلو بالمواليد

والا تبي ترضع طفلها تروح للحضانه فيه غرفه

تاخذ البيبي وتجلس فيها

هذي حكايتي من الألف للياء

ويشهد الله ماكتبتها الا للفائده

وبي منك الدعاء لي ولوالدي

وان الله يسخرلي زوجي ويحفظ بنوتتي





وأي سؤال أنا حاضره..


دمتم بصحه وعافيه..



اختكم..


pink