السلام عليكم .... انا والده من اربعين يوم في مستشفى الوصل .. والله شو اقولكم .... الوحده تولد في البيت احسن من اتسيرلهم ... ما توقعت معاملتهم بهاي الطريقه ونحن مواطنين كيف اذا كنا غير مواطنين ... (تصدقون انه الدكتوره وانا في غرفة الولاده ما مرت عليي ... الا يوم سمعت صوتي وانا بولد واتقولي لا تعلين صوتج عيب يعني لا تصارخين ....يعني كانت تفتن عليي ... وعقب ما ولدت وخلصت المفروض يخيطولي بعد الولاده على طول ... تخيلو تميت ساعتين وانا اتريا .. واخر شي بدون بنج ولا شي ... والدكتوره اللي يالسه تخيطلي كانت تفاتن عليي لاني كنت اتألم وايد وكانت تتأفف ... ومع كل هذا ما كملت يوم الا وانا كاتبيلي رخصه .. حتى ما كنت اقدر امشي أو انش من الفراش ودمي كان نازل وايد ..... والله انصح كل وحده انها ما تسير لانه كل وحده ويا حضها في الدكتوره اللي بتحصلها وانصحج اختي ياسمين انج ما تعيدين الكره لانه معاملتهم تغيرت من المده اللي انتي ذكرتيها ........والله على ما اقول شهيد

خوفتيني !!! مع إني ناوية عندهم!!

حرام عليكم خوفتونني


انا اراجع في الوصل كل شهر يدخلونني على دكتورة واخر مرة دخلوني على دكتورة بعمري- 25 سنه - والله استغربت قلت اكيد هاي متدربه

والله ااخاف تجيني يوم الولاده وتعذبني ؟؟؟؟


وانتوا خوفتونني اكثررررر :( :( :(

بصراحه انا معرسه بس ماعندي عيال الى الان وانشاءالله اذا فكررررررررت بالعيال مب سايرره الوصل عقب اللي استوا في اختي العووووده سوولها خرم في الرحم بغت تموووووووت ونسووا الثقل في بطنها وسافررت بمبي وسوولها عمليه ثااااااااانيه وردت الحمدالله بخير

والله على ماقووول شهيد والله يرحمنا برحمته

صباح الخير يا أحلى بنات ،،،
الموضوع هذا كنت أبغي أكتب فيه من فترة لكن ما كان عندي وقت للكتابة
ياريت يا عروس الشرق تكونين ويانا الحين علشان تقرين الموضوع هذا لأنه
أكيد يهمج ، وأكيد إنتي محتارة مثلي .
وما دامكم فتحتوا الموضوع فبقولكم رأيي ، أنا من اول ما حملت كنت مفكرة
أولد في الخاص ، ودايم أراجع عند دكتورة في الخاص وكنت مرتاحة لها وايد
، ولأن الشهر اللي فات دكتورتي سافرت وكنت أحس بألم في أسفل البطن
رحت مستشفى الوصل وكنت جالسة أنطر دوري الله لا يراويكم أخروني وايد
ولوعوا جبدي وأنا أتريا دوري ، وشفت لكم حالات عجيبة أشوف نسوان
بيولدون ويالسات ويانا يتريون دورهم مع إن كل وحدة فيهم فاتح عندها ما لايقل
عن 4 سانتي قلبي عورني عليهم والنسوان مساكين يصيحن من الألم ولكن ولا حد
معبرهم ، بعدين اكتشفت إن الحرمة اللي يالسة تتويع مب مواطنة يمنية علشان جيه
كانو مطنشينها ، أما الثانية فكانت مواطنة بس من النوع اللي هي وأهلها محترمين
مب من النوع اللي يضاربون وساكتين وعلشان جيه بعد مطنشينهم وفي الأخير اليمنية
وايد تعبت وقالوا لها ما شي سرير فاضي ، وسرت أنا ورزيت ويهي في السالفة وحرجت
على الممرضات وخليتهم يسدحون الحرمة في الحجرة اللي يم حجرة الدكتورة مسكينة
ماكانت رايمة تيلس لأنها تحس بثقل الراس من تحت .
وبس هاذي تجربتي وهذا اللي شفته بعيوني في مستشفى الوصل ، بصراحة أسير مستشفى
خاص وأتعامل مثل الملكة وأصرخ على كيف كيفي ولا يفتن علي حد ولا يحرجون علي ولا شي
أنا دافعة فلوس وكيفي بباغم على راحتي وبتم في المستشفى على الأقل يومين ثلاثة مب يوم
واحد ويروغوني مثل مستشفى الوصل وبأخذ لي أحسن وأكبر غرفة في المستشفى (جناح)
ولا غرف مستشفيات الوصل تقولين قرقور ، وأستقبل كل حد أباه في أي وقت بدون ما يقولون
ممنوع الزيارة في أوقات معينة ولا شي ، وخلاص اقتنعت لا مستشفيات حكومية بعد اليوم .

وسلامتكم
أم عــيـــــــــــون فـــتــــــــــانــــــــــــــــة