السلام عليكم ورحمة الله
ترددت كتير فى المشاركة بالمنتدى اخوفى انى مافيدش اخواتى رغم اعجابى الشديد بالمنتدى واهله
يارب اول مشاركة لية تعجبكم وان شاء الله هاحاول افيدكم يا اخواتى العسولات واترككم بقى مع الحواوشى
هو نال اعجاب زوجى بشدة بفضل الله ولو اتزنقتى فى اى وقت فى الاكل مش هاتلاقى اسهل ولا اسرع منه والطعم يجنننننننننننننننننن
المقادير:
400جم لحم مفروم
4 رغيف عيش بلدى او شامى
بصلة كبيرة مفرومة
جبنة شيدرورومى مبشور
بطاطس صوابع محمرة
عودين بقدونس مفروم
فص ثوم صغيرمفروم
بقساط مدقوق حوالى ربع كوب
2 ملعقة كبيرة سمنةسائلة وعليها شوية زيت (والاحسن يكون زيت زيتون)
ملح فلفل كسبرة ناشفة
الطريقة
نخلط اللحم المفروم بالبصل والثوم والبقدونس ونحط البقسماط لحد اما نلاقى اللحم بقى شكله متماسك ونحط الملح والفلفل والكسبرة
نجيب العيش ونفتحة كله ماعدا جزء بسيط زى اللى فى الصورة
ادعك الرغيف بخلطة السمن والزيت من جوة ومن برة
افرد اللحم فى الرغيف لغاية اطرافه(لان اللحمة بعد كدة بتكش جوة الرغيف اما تستوى)
اقفل الرغيف واضغط عليه بايدى كويس
احط طاسة على نار متوسطة وشوية سمن بالزيت صغيرين اوى امسح بيهم الطاسة
احط الرغيف فى الطاسة لحد اما يتمر واقلبه على الناحية التانية
بعد اما نخلص كل الارغفة نحط رغيف فى الطبق ونحط شوية بطاطس وعليهم جبنة وبعدين نحط فوقيهم رغيف تانى ونحط تانى بطاطس وجبنة لحد اما تسيح وبالهنا والشفا
شجعونى وقولولى رايكم
يارب يعجبكم
