حياتنا بعد وفاة ااااابوي وقطاعه عمي لنا """""

السلام عليكم
بدخل بالموضوع على طول
ابوي توفى واحنا صغار اكبرنا اخوي رابع ابتدائي واصغر خواتي لها شهرين مولوده
امي توظفت لمن مرض ابوي عشان تصرف علينا
ولمى توفى ابوي امي كانت صغيره وحلوه وترملت صغيره وعيالها صغار شالت هم كبيرررررعلى ظهرها مسؤوليه اطفالها وتربيتهم شالت هم مايعلمه الا ربي
قالت جدتي لامي بعد الحداد تعالي اسكني عندنا ( بيتنا كان ايجار )مع العلم فيه جدي وجدتي وخوالي وخالاتي اللي ماتزوجوا وغير الناس الداخل والطالع قالت امي لا انا بجلس ببيتي بربي عيالي واتحمل مسؤوليتهم مابيكم تشيلون همي وهم عيالي وبناتي ويزعجونكم بجلس في بيتي جنب وظيفتي ومدارس عيالي وجلسنا في بيتنا معززين مكرمين
خوالي بالبدايه ماقصروا معنا كانوا يساعدون امي بالاشياء الضروريه بس بعدين انشغلوا بعيالهم وحريمهم وكلن له ظروفه وامي ماصارت تطلب منهم تخاف تثقل عليهم ويخدمونها من غير نفس
امي تقدم لها خطاب وكانت ترفض تقول ابي اربي عيالي واهتم فيهم واخاف اتزوج وزوجي يضرب عيالي او يهاوشهم مابي احد يضايق عيالي ويجرحهم بكرا ربي بيسئلني عن هالايتام صارت تضغط على نفسها وتسوي المستحيل عشاننا الله يجزاها كل خير ويسعدها ويفرح قلبها فينا ولايضيع تعبها يارب عن كل تعب بذلته لاجلنا عوضها به زرعاً وبراداً وقطوفاً دانيه في الجنه "

نجي سالفة عمي " ابوي ماعنده الا اخ واحد واكثر من اخت وكانت علاقه مع عمي حلوه وبدون مشاكل ، عمي هذا متزوج وعنده عيال ومن بعد وفاة ابوي من قبل ١٧ سنه
ولمن كانت امي بالحداد جاب كم مره مقاضي (فواكه وخضروات) ومن بعدها ماشفناه ابد وربي يابنات كانت علاقتنا معه معدومه ماكان يجي يزورنا ولايكلمنا ابد ابد كبرنا وكثرت طلباتنا وهمومنا ومشاكلنا كانت تمر علينا ايام نحتاج رجال يوقف معنا ( ومن المتعارف عليه العم يغطي مكان الاب ) كنا نسئل امي ليه عمي مايسئل عنا تقول والله مادري طيب فيه مشاكل تقول لا وربي مافيه كانت تحس اننا نحتاجه وتقول تبونه ؟ كلموه نقول لا ليه ماكان يسئل عننا وحنا صغار الحين لما كبرنا نروح نذب وجهنا عليه يمكن مايستقبلنا زين يمكن مايحبنا ولا نعتبر بالنسبه له اي شي وبعدين هو مايبينا واللي مايبينا مانبيه ! وربي يابنات لو يشوفنا بالشارع ماعرفنا لدرجه اختي الصغيره تسئل امي عمي وش اسمه !!!!! يالله ياعمي ليتك تسمع بنت اخوك وهي تسئل عن اسمك وهي تحاول تعرفك وانت ماجبت خبرها
طبعا كان فيه اجتماع سنوي للقبيله رجال وحريم كنا مانروح لان امي بعد ماترملت صارت ماتحب تواجه الناس تشيل حزن بقلبها وتحرم نفسها من هالاجتماعات لما كبرنا صرنا نروح بدونها
اخواني يشوفون عمي بقسم الرجال ويسلمون عليه عاد يقول لهم بشوف خواتكم يدقون علينا تعالوا عند الباب اللي بين الرجال والحريم نجي وكلنا شوق نشوف اللي من ريحة اغلى ناسي نسلم عليه وكنت اشوف ملامحه واتذكر ابوي مابي الوقت ينتهي كان يسئل وش اخباركم كيف خوالكم اعجبكم الاجتماع ويعطينا فلوس مبلغ رمزي كأنه يعطي شغالات رواتبهم ومع السلامه اه خمس دقايق او عشر دقايق مرت كأنها ثواني اه احتاجك ياسندنا ب هالدنيا احتاجك ياريحة ابوي
كنت اطلع واجلس مع الحريم وانا منب معهم بعالم ثاني مع نفسي متضايقه اكلم نفسي ليش هو قاطع فينا ليه توه يتذكر يشوفنا ليه طلب يشوفنا قدام الناس وبعلمهم يعني يبي يبين لهم انه سنع او وشو طيب ماظلمه ! ابي تفسير لتصرفه ' احنا مانحتاج فلوس اقول يابنت الحلال الله يجزاه خير ! بس الفلوس موب منه ( من الصندوق الخيري للقبيله للاسر المحتاجه ) يعني موب من جيبه ومتاكده من هالشي اه كلام يوديني وكلام يجيبني
وصار كل سنه بالاجتماع يسوي نفس الحركه ونفس المدة ! مرت السنوات وانطردنا من بيتنا ونقلنا لبيت ثاني بعد 7سنوات من وفاة ابوي ولما كملنا سنة ب هالبيت دق عمي على اخوي قال بجي الحين اني مريت من حارتكم وقلت اسير عليهم طبعا ماصدقنا وطرنا نلبس ونتجهز جاء وجلس معنا كلنا تعرف علينا كل وحده وش تدرس ووش راح تتخصص وتعرف على ملامحنا من تشبه ومن يشبه وهكذا كانت الجلسه حلوه وضحكنا وانبسطنا خلص الوقت وراح
كنت فرحانه وقلت الحمدلله بيصير يزورنا ورحت ابشر بنات خالتي وصديقاتي ان عمي جانا وماكنت ادري انها اول واخر زياره
مرت السنوات ومقر الاجتماع السنوي احترق وبنوا لهم مكان ثاني مكان الحريم مستقل عن الرجال يعني مايقدر يشوفنا هناك
الى يومكم يابنات ماشفناه يالبنات الاولاد يشوفونه بعزا او زواج او بالاجتماع نفسه او عيد وكان يقول تراني اسئل عنكم من بعيد ( ليه احنا يهود ماتسئل عننا من قريب وتكلمنا وتتطمئن علينا)
طبعا عمي المصون ذا ماشفناه من 10 سنوات كان اخر لقاء في بيتنا
عمي هذا اجتماعي بدرجه كبيره مايخلي عرس او عزاء او مريض او مناسبه مايزورها لدرجه انه يوجب اللي بمدينه ثانيه مرض شايب يقرب لنا من بعيد موب بالرياض وراح له يزوره
كلن يعرفه وكلن يذكر نشاطاته سواء بالاجتماع او بغيره طيب ياعممممي اعتبرني عجوز وتعال زرني :(
سنه من السنوات رحنا نعايد خوالي المهم واحنا عندهم قالوا جو رجال سووا قهوه دخلت انا واختي نسوي قهوه جاء خالي قال عمكم فيه تبون تسلمون عليه قلنا لا اذا طلب منك قلنا قال طيب طبعا ننتظر احد يدخل علينا يقول تعالوا مر الوقت وراحوا الرجال دخلت غرفه الحريم وجلست اصيح لاحول ولاقوه الا بالله تجي تزور جدي اللي مايقرب لك وعيال اخوك ماتجيهم حتى ماتسئل اذا احنا فيه عشان تشوفنا
حقدنا عليه وصار مايهمنا شوفته كانت امي تقول كلموا عمكم سلموا عليه او زوروه نقول لا هو مايبينا ! بعدين ليه نزوره احنا كثار وهو واحد اخف مننا ! بعدين يمكن زوجته ماتبينا طبعا زوجته ماكانت تجي بالاجتماع يعني ماقد شفناها الا بالصدفه مره بزواج
اختي انخطبت عاد امي تقول مادري نكلمه نعزمه ع الملكه او لا ؟ مع العلم الملكه عندنا مختصره اهل العروس واهل المعرس فقط والزواج يكون مكبر
احنا يالبنات نقول لااااااا مايستاهل اللي مايسئل عننا ولايهتم لاخبارنا مايستاهل التقدير والاهتمام ليه نعزمه ونحسسه انه مهم بحياتنا ويصدق نفسه وخلوه يسمع خبر ملكتها من الناس يمكن يستحي على وجهه
واخواني مترددين كل يوم لهم راي مره يقولون لا ومره ايه '
وش رايكم بتصرف عمي معنا وهل يستاهل نعزمه ؟