حياتي الزوجية واطباع زوجي😔

السلام عليكم حبيباتي..
شلونكم ان شاء الله الكل بخير وصحة يارب

بنات ابي احاول اختصر كثر ما اقدر 
مادري اذا فيكم من يقدر يساعدني بس انا ابي أشكي ابي اقول الي بقلبي ..

انا متزوجة من سنه وعشر شهور راح اكمل سنتين وسنه الى 
شوي مالجة يعني اعرف زوجي من تقريبا ثلاث سنوات. امهاتنا قرايب وتزوجنا يعني خطبه أهل 
بس شفنا بعض شوفه شرعيه وتكلمنا وتمت الموافقه.
المهم ... مشكلتي انو حياتي مع زوجي كلها مشاكل في مشاكل وانا عندي ولد يعني مو متحمله مسؤلية ومشاكل. مادري الغلط فيني ولا في زوجي. ما اقول اني ملاك بس والله ما ابدا بالغلط.
زوجي عمره 25 وانا 23.. حياتي كلها مشاكل من كلشي بمعنى الكلمة .. يعني مثلا زوجي ما عنده ليسن انا عندي احنا قي بلد أوروبي يعني اسوق عادي بس انا محتاجة انو هو يسوق. وعدني مليون مرة ياخذ رخصه السياقه وما ينفذ وعده ... 
صار كسلان جدا. قبل الزواج كان نشيط ويحب الشغل وحرك ما شاء الله. هلحين صار يشتغل شغله العادي ويصرف فلوسه بعضهم على توافه. 

كثير من وقته يخلصه على الابتوب ما يسولف معي وقته شغل ونوم ولابتوب يلعب ألعاب الشباب .. وزوجي مع الأسف ما يصلي. حاولت معاه وما فإد. مو تزوجته صرت انسانه فاشله وتغيرت نفسيتي وتعبت وصرت ما استحمل وعصبية بعد ما كنت شاطره وذكية واحقق نجاح بعد نجاح الحمدلله. 
مادري وش اقول .. مرات افكر بالطلاق ومرات اقول تحملي.. زوجي أسلوبه بالكلام همجي وغير حضاري يعني يغلط عليه كلام يجرح او يقول سكري حلقك او وانتو بكرامة اكلي تبن وهالفترة صار يتفل عليه او يرفع الجوتي بويهي انو يبي يطقني. انا ادري انو لسانه طويل وفي كلام يقوله عمره ما راح يسوي بس يخوفني مثلا يحلف والله بتزوج عليكي واحنا في بلد ممنوع يتزوج في ثانيه الا يطلقني. وَيَا بنات زوجي من يجرحني عمره ما يتأسف او يراضي يزعل ويجرح ويرد يكلمني عادي كانو ما صار شي اذا أقوله زعلانه منك او مابي أكلمك يقولي بالطقاق أو اضربي رأسك بالطوفة.. 
قاعدين تحسون فيني ؟؟ يعني انا بعدني زغيره بس ما احس بشبابي وما احس اني متزوجة ما احس ب اونوثتي .. ما اسمع منه كلمة حلوة احس ما عنده احساس ما احسه يحبني ابد أبد .. 
وزوجي ابد ابد ما يطلعني يطوف شهور ما يوديني مكان ابد انا اطلع السوق مع امي وخواتي وزوجي يكذب اذا اضطر اذا واجهته وسالت ليش يقول عشان لا تتضايقين.

وعنده أغلاط ما احب اذكرها .. 
ما آدري شنو الحل .. علاقتنا فاشله ما فيها لا حب ولا احترام ولا اي شي حلو مرات احس نفسي اكره من يجرحني ومرات يكسر خاطري .. بعض الأحيان افكر بالطلاق بس بيت اهلي ما يساعد انو اردله ابوي صعب جدا وبيت اهلي مافي مكان الي ولولدي يعني ما احس لي مكان في بيت اهلي .. وانا احمل اهلي بالذات امي مسؤلية هالزواج لانها مدحته هو وأمه وطلعو مو كفو وكذبو ب أمور وأيده حتى نرضا فيهم. نفسيتي تعبانه ما انام بدون ما ابكي من تزوجت للحين ما مو اسبوع ما بكيت فيه زوجي يجرحني وما يحترمني احس اني حزينة ومحتارة نسيت طعم الراحة والسعاده والله ..  😔