حياتي الزوجيه بتنهار وانا مازلت عروس ...هذي اخرتها يا مريم؟؟؟؟

مرحبا
ادري يابنات تقولون مواضيعج زايده هالايام بس لمنو افضفض واتكلم واطلع الي بقلبي غيركم يا احلى بنات بالكون ........( بديت ابيع حجي )........ :)
المهم السالفه ومافيها يا جماعه الخير
ان كتبت موضوع من كم يوم ان ربعي كلهم يبيعوني بدون سبب
وطبعا يابنات الي شافت موضوعي راح تقرا كلامي الحين وينزل عليها مثل الماي البارد
اتمنى انكم تسمعوني وتفتحون قلوبكم لي ......................
انا طالبه جامعيه بالسنه الثالثه ومتزوجه صار لي شهر ونص
طبعا عندي صديقه من اول مادخلت الجامعه كانت صديقتي العزيزه وماكانت تفارقني ابد وانه واثقه من اخلاقها وتصرفاتها لاني اعرفها 14 سنه واعرف اهلها وماعندي عليها ولا نقطه
وانه بالسنه الاولى بالجامعه كان في طالب معانا بس يعني الظاهر انه بتخصص ثاني وايد يلاحقني ويطالعني واذا كنت بدخل محاظره من محاظراتي اشوفه سابقني وواقف لي على الباب وكنت اتسائل شلون يعرف محاظراتي وين (طبعا في قلبي) ......
مرت الايام الجامعيه وهو زايد بحركاته ونظراته وتصرفاته ومطارداته البوليسيه وراي ...................................
ومره من المرات كنت واقفه مع هالبنت ما شوفه الا ياب لي ورده وعطاني اياها انه استغربت وقلت انسان طبيبعي ما يسويها بس انه ماتكلمت ومشيت عنه
طبعا هذا كان بالسنه الاولى وكانت كل هالمواقف تصير وانه ياغافلين لكم الله
يات السنه الثانيه واخونا مستمر في حالته ليحد ماجاء الفصل الثاني بالسنه الثانيه ماشفته وقلت الحمدلله رب العالمين خير وبركه والسنه ايضا الفصل الاول ما شفته .............
وطبعا انه تزوجت بعطله الربيع وايام التسجيل ورحت الجامعه مع زوجي عشان اسجل للكورس الثاني بالجامعه الا اشوفه جدامي قلت سلام قول من رب رحيم هذا من وين طالع صار لي سنه ما شفته ...........
الا يشوفني مع زوجي ويسلم عليه ( طلعو يعرفون بعض )
المهم وهذا الفصل صرت اشوفه وااااااااااااايد ومره بالصدفه شفته بمبنى عندي محاظره فيه وهو عرف وين محاظرتي وصار يوقف لي علي الباب هو وشلته وشقولكم يابنات والله ان شلته لو تشوفونهم يغمى عليكم من اشكالهم واخلاقهم ويطالعوني ويتكلمون ............
طبعا حتى لو كان بيتكلم عني بسوء ما يقدر لاني ماعطيته ويه ولا عبرته لما كان يلاحقني
طافت الايام في هالفصل وهالصبي رايح ياي ويلاحقني اكثر من قبل مع انه عرف اني تزوجت ويعرف زوجي ( شنو هالحقاره )
وانه مو عارفه السبب
نرجع لصديقتي
هالبنت لما تزوجت قطعت علاقتها فيني وتغيرت علي مادري شنو سالفتها بس شكلها فيها حاله نفسيه لانها تكره الزواج وتعتبره تسلط والحريه في نظرها يعني عدم الزواج وانه وايد تأثرت من الي صار فيني منها وكتبت الموضوع هنا
لكن قمت اول البارحه وقلت خلني احاول للمره الاخيره معاها واتصلت بها وقلت لها ابي اشوفج بكره بالجامعه
شفتها امس وقعدنا مع بعض وايد كنا حلوين مع بعض ولا كأنها قاطعتني ولا شي ومره وحده مر هذا الصبي الي قلت لكم عنه جدامنا ................
الا قلت لها السالفه انه يعرف زوجي ومن تزوجت وهو حركاته زايده
الا قامت تضحك
وقالت لي بقولج شي بس لاتعصبين
قلتها شنو
حلفتني ان ماعصب وانه حلفت قالت لي انها مره كانت داخله شات وتعرفت على صبي من جامعتنا وضافته بالمسنجر وقامت تكلمه وقالها ابي اشوفج وقام يكرر الطلب وهي رافضه واخر شي رضت وقالت له باجر في المبني الفلاني الصف الفلاني اوقف راح تشوفني وانه عندي فايل ازرق ولابسه شال احمر ( لان كانت ايام الشتاء ) عاد نسيت اقولكم انه وهي كنا نلبس بالشتاء نفس الوان الشال وهي اتصلت فيني ليلتها وقالت لي باجر راح نلبس شال احمر وانه لسبت اليوم الثاني احمر وهي لبست بيج بس انه ماقلت لها شي قلت يمكن نست
فاهمين هالشي يعني شنو؟؟؟؟؟؟؟؟؟
يعني قالت له مواصفاتي وانه اشوفها ذاك اليوم قالت لي خلنا نوقف شوي عند الباب ونتأخر دقيقين على المحاظره يعني عشان يشبع من شكلي .................
والمشكله ان المحاظره كانت في مكان تقريبا في زاويه يعني محد يجي هالجهه الا الي عنده محاظره يعني عرفت شكله
وعلى قولتها انه قبيح من جذي تمت اسبوعين زود تكلمه وتركته
ااااااااااه يابنات تخيلو هالطعنه من اقرب الناس لي صدييقتي الي اقرب لي من اختي .................. الله يلعنها هالدنيا الي ما منها امان
مع الاسف مادري شنو مصلحتها وانه غير الخير ماياها مني
وخساره اني ماكتشفت حقدها علي الا متأخره
المهم
الايميل الي ضافته عليه هو ايميل قدييييييم عندي من زمان مادخلت عليه يمكن من سنتين بس كان عندي من ايام الثنوي وطبعا هي تعرف كلشي حتى كلمه المرور فيه والايميل عنوانه باسمي
يابنات كلشي يدينني وانه بريئه
تخيلو هالصبي يروح يقول لزوجي وانه بريئه
زوجي ما يتلاعب بهالمواضيع وانه سالته اجس نبض لو انه مسويه شي من قبل شنو تسوي قالي على طول بيت هلج واطلقج
والله ياناس انه بريئه
شنو هذا تييك التهايم وانت نايم
شسوي ؟؟؟؟؟؟؟؟؟؟؟؟؟؟؟؟؟
اقول لزوجي ؟؟؟؟؟؟؟؟؟؟؟؟؟؟؟؟؟؟؟؟
اكلم اهل البنت ؟؟؟؟؟؟؟؟؟؟؟؟؟؟؟؟
شسوي ؟؟؟؟؟؟؟؟؟؟؟؟؟؟؟؟؟؟؟
اقول لأمي ؟؟؟؟؟؟؟؟؟؟؟؟؟
البنت خلاص انه الي صرت ماكلمها وقطعت علاقتي فيها وقلت لها انسى انج تعرفين وحده باسمي واحسها فرحت لانها تبيها من الله
والله نفسيتي تعبت من التفكير
الصبي يعرف اسمي وانه من وين وكلشي عني وشكله ناوي بالشر من وقفاته ونظراته وربعه الي ييون معاه
قولو لي يابنات شنو اسوي والي ماعندها حل تدعي لي ارجوووووووووكم
والله احب زوجي واموت فيه لو يخيروني بين الموت او الحياه بلاه اختار الموت