السلام عليكم حوائيات .... انا حابة اخبركم عن قصتي
أنا بنت عمري 20 سنة
بس لو تعرفون قبل كيف كنت عايشة من كان عمري 14... كنت أم النفسية كنت أم الكآبة طول وقتي
عايشة بعزلة 24 ساعة في غرفتي و مادة البووز ما أحب أكلم حد ابدا مثلا
اي حد يدخل غرفتي و يحاول يتكلم معي هنا تجيني حالة اقعد اصرخ و اطرد الشخص ما اتحمل
اي آدمي يدخل غرفتي و يقعد معي و كله مشاكل مع امي و اخواني ....
أمي الله يحفظها صدق تعبت تحاول معي تحاول بس انا ما كنت أعطي أحد مجال ...
كانت غرفتي مجمع الافكار و الطاقة السلبية اللي في العالم كله في غرفتي ....
كانت حياتي سودا حتى لبسي اسود ... ما احب اطلع من البيت
اذا طلعت مع اهلي اخرب الطلعة عليهم اخليهم يرجعوني البيت...
حتى حفلات و أعراس و مناسبات ما اروح ....
مثلا عرس خالتي و خالي و عمتي ما رحتهم كنت اذا قرب عرس أحد منهم احاول أمرض اتحجج
بالمرض بس عشان ما اروح لعرس ..
كنت اذا أحد داس لي على طرف أو غلط علي ... و الله ما يجيني النووم بالليل لاااازم انتقم ...
كان لساني طويل وسخ مستعد لأي سبة .. ما كنت احترم احد، حتى المدرسات كانوا
مساكين يتجنبون يكلموني و لو وحدة كلمتني بكلمة رديت عليها مو بعشر لا بألف كلمة ..
اعترف انه كانت فيني خباثة بشكل و كنت اعصب و اضرب و اكسر ... و طبعا الصلاة
كنت اصلي فرض و اخلي عشر و السماعة في أذوني من غنية لغنية و رقص ...
يوم صار عمري 18 قعدت اصيح اصيح اصيح ما اعرف ليش ياني خوووف مو طبيعي حسيت ان حياتي
قاعدة تمر و تمشي و انا ما سويت شي صح .. كنت اشوف البنات يفروح يوم يكبرون و يوم يصير عمرهم18
تميت افكر في كل شي سويته في حياتي و كل ما كنت اتذكر كنت انقهر زيادة على نفسي
ما فيها شي زين ابد .. و بعدها فكرت و فكرت و فكرت و قلت خلاص لازم اتغير
ماراح اضيع باقي عمري على مرض انا سببته لنفسي انا بليت نفسي فيه .....
بعد اسبوع امي دخلت علي الغرفة و كان ويها احمر ... وقالت لي بتكلم وياج بس رجاءا لا تعصبين ...
اكتفيت بس بنظرات اعترف اول مرة احس بخوف من كلام امي اللي راح تقوله ...
اول شي قالت لي في شي مزعلج في شي مضايقج تكلمي حراام عليج ليش تسوين فيني جذي ....
انا من سمعت كلامها بديت اصيح صياح و ارتجف ما اعرف ليش ...
و كانت هي بعد تصيح كانت تقول لي افتحي لي قلبج لا تخافين نحن نحبج بس ما نحب تصرفاتج ....
بالله انتي راضية على نفسج و تصرفاتج تبين اتمين طول عمرج على الحالة ...
بعدين قالت لي ان هي كل ما تروح العيادة لازم تمر على عيادة الاعصاب و المرض النفسي
و كانت تقول لي انها تنهار كل ما تشوف حالة تخاف اصير نفس هالحالات ....
بعدين قلت لها انني ابغى اتغير ابغى اغير نفسي اريد اصير انسانة ثانية ...
هني و الله انها فرحت و قامت تمسح دموعها و قالت لي انها يتوقف معي و بتحاول تغيرني للأحسن..
و مرحلة التغيير كانت :
اول شي سويته مسحت كل الأغاني اللي عندي في الاي بود و الموبايل و الاب توب
و استبدلتها بالقران و الادعية
صرت اواظب صلاتي
كنت كل يوم بعد صلاة المغرب اقرأ سورة يس و اذكار المساء
و يوم انام سورة البقرة لازم تشتغل عند راسي
سرت استغفر ربي و اسبح
وكنت ادعي في صلاتي ان ربي يفرج كربتي و ييسر اموري
و بعد فترة سرت اقدر اقرأ سورة البقرة و سورة يس و سورة النور و سورة نوح
و سورة الملك في يوم واحد مع التعود راح تقدرين تقرين هالسور و تقرين بعد اكثر
غيرت ديكور غرفتي و غيرت ملابسي و سرت اهتم ببشرتي و شعري
و الله يا بنات ان نفسيتي من داخل تغيرت صرت فرفوشة 24 ساعة مبتسمة
سرت اسولف مع الناس و اضحك و سرت نشيطة
الله يحفظ امي و يطول بعمرها طبعا هي سارت صديقتي المقربة اسولف و اضحك وياها
اسراري عندها و اسرارها عندي سارت كل ما تطلع امي لازم اطلع وياها السوق او اي مشوار
بعد ما كنت الانسانة الشريه اللي ماتسامح و لازم تنتقم سرت العكس
اسامح و اطنش و احاول ما اهتم للشي سرت احب الحياة بعد ما كنت اتمنى الموت ..
بنات اعرف اني كلامي طويل و راح تملون وانا ما كتبت هالشي الا عشاني
احبكم و الله و انا ما صار لي مدة في المنتدى انا عضوة يديدة و متصفحة سابقة ...
وانا كتبت تجربتي عشان ممكن احد يستفيد منها و اتمنى ان احد يستفيد منها ...
ولازم تعرفون قوله تعالى في سورة الرعد: إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ .
و بنات لحد يقول صعب لازم تبدين انتي من نفسج من داخلج لازم تقتنعين بفكرة التغير
لو كنتي تبين تتغير بجد و خلو نظرتكم للمستقبل نظرة إيجابية و متفائلة
وانا سميت نفسي وعد العمر ...
لأني وعدت نفسي اكون متفائلة و ما ارجع لحياتي القديمة طول العمر