حياتي كتبتها باختصار …سيزول همك و ستعرفين أنك بنعمه !!

السلام عليكم ورحمة الله وبركاته
بكتب لكم حياتي ب اختصار فقط عشان كل وحده حزينه تقراها ويروح حزنها وتعرف انها بنعمه لان احنا مأمورين نشوف اللي اقل منا وماعتقد في هالعالم احد دعسه الحزن دعس اكثر مني !!

انا انولدت في عائلة ماهي كويسه بيئه غير صالحه للحياه البشريه. كنت انا اصغر العائله وعندي اختين وخمس اخوان … كلام العائله كله غيبه ونميمة وحسد وانتقاص واعراض واكل لحوم البشر وهنا انا كبرت وترعرعت على هذا الشيء وتغلغل كل كياني لدرجة اننا مايقوم واحد من خواتي او اخواني الا نحكي فيه كذب صدق المهم اننا نجيب سيرته وخلاص. النميمة تدور دوران على افراد العائله كلنا ننم في بعض وكلنا بالتالي نكره بعض.
ايضاً انا بما اني الصغيره كنت دائماً اتعرض للتحرش والاعتداأت الجنسيه من اثنين من اخواني واحد متسلط علي سلطه والله العظيم من يوم كنت طفله مادخلت المدرسه وانا بس ادافع عن نفسي وعن شرفي واخبر امي وابوي ولا فيه فايده ولا يهتمون من الموضوع.
كبرت وحلمي اني اهرب من هالبيت اهرب بزواج بموت بحادث المهم اهرب وخلاص …

كنت اكره القذاره اللي تربيت فيها. حبيت اكون ملتزمة وتقربت من الله وحافظت على عباداتي وحاولت اربي نفسي بنفسي

وصل عمري 24 تزوجت واحد من اقربائي للاسف ماقدر اني اعمل معاه علاقه زوجيه كنت اخاف وارجف واهرب تحملني ستة شهور وبيوم صارحني قال هل كنتي تعانين من الاغتصاب او التحرشات وانتي صغيره انتي بجد مجنونه !! بعدين طلقني وكان طلاقي قهر واهانه مابعدها اهانه

بعدها رجعت لمنزل اهلي ومعاناتي اشد وابغض معايير وشماته وكلام بشع وعداوه واضحه …

بعدها تزوجت رجل فقير جداً وغير متعلم ماكان الموضوع يهمني المهم عندي اهرب من بيت اهلي. تزوجت وبدأت حكايتي مع التسول والشحاذه باع كل ذهبي وياخذ اي مبلغ يطيح بيدي وانا ماعندي مشكلة اركض زي المجنونه واحاول ادبر اي فلووس كل هذا خايفه انه يطلقني ويرجعني لبيت اهلي … ماقدرت اعطيه العلاقه الزوجيه فكان يضربني ويهيني وهذا الشي كسرني وكسر نفسي … كملت سنه كامله وانا اعيش اخت لزوجي وبيوم اراد الله سبحانه ان ينهي معاناتي فنحلت العقده وقدرت امارس مع زوجي العلاقه بشكل شبه طبيعي.
مرت السنوات وانا الشحاذه اللي اتسول من خواتي من اهلي من كل مكان. بوقتها قررت اكمل تعليمي عشان اتوظف عشان بس اعطي زوجي راتبي كامل عشان انا تعبت من التسول عند الناس تعبت من الاهانه واهانت نفسي والشحاذه حتى من الاطفال …
كملت تعليمي دخلت الثانوي مع البنات الصغار وبعيون البنات مستغربين اني كبيره بينهم تحملت وكافحت ودخلت الجامعه ونفس الشي كنت انا الوحيده اللي كبيره والجميع صغار وتحملت وكافحت. كنت اخذ مكافأة الجامعه واحطها بيد زوجي. وانا البس ملابس رثه ورديئه ولا اشتري شي من كفتريا الجامعه لان الكافتريا غاليه. كنت اشوف البنات يشترون مالذ وطاب وانا اجيب معاي اشيائي من البيت اشياء بسيطه.
تخرجت وتوظفت وسلمت راتبي كامل لزوجي مااخذ منه ريال واحد فقط عشان ابغي اعيش مابغي ارجع بيت اهلي …
كل هالمعاناة نسيت اقولكم اني عشر سنوات زواج وعقيم عقم تام ماينفع مع عقمي دواء ولا علاج
وايضاً امي انفصلت عن ابوي واخواني تقاطعت معهم وبعضهم تقاطع مع بعض وخواتي تقاطعت معهم ولا عندي احد بهالدنيا غير زوجي … الحين زوجي ماعنده حل غير انه يتزوج عشان هو يحتاج اولاد. وانا ماعدت عارفه ايش هي نهايتي بالظبط.

خلال هذي الايام وخلال هذي السنوات اللي مرت علي من يوم كنت طفله كان عندي حلم واحد بس اني اعيش حياه طبيعيه زوج وبيت وعيال. ماعمري حلمت بقصور ولا تمنيت اسافر ولا تمنيت يكون عندي شغاله واعيش بدلال. تمنيت فقط حياه طبيعيه بعيده عن مستنقع العفن اللي عشت فيه.

اخترت اسامي ل اولادي واخترت اسامي لبناتي. اخترتهم انا وزوجي وقررت ادخلهم تحفيظ قران واربيهم على طاعة الله اخترت وقررت وماكنت متوقعه ان الاسماء راح تسميهم وحده ثانيه واني بيدي راح اسلم زوجي لزوجة ثانيه وان اولادي اللي حلمت فيهم من زوجي راح تنجبهم وحده ثانيه وانا على الهامش مجرد متفرج … !!!

بعد قرأتك لقصتي استحلفك بالله هل مازلتي حزينه او خلاص عرفتي النعمه وقيمة الحياة اللي انتي عايشه فيها !! ملاحظه هذي حياتي ب اختصار جداً جداً