حياتي متدهورة ولله الحمد , مشاكلي تتطلب الحكمة , أنقذوني

السلام عليكم ورحمة الله وبركاتة
كيفكم يابنات
ببدا بمشكلتي على طول
انا لي سنة و7 شهور متزوجة
كانت فترة الملكة وبداية زواجي مش من العمر
كنها حلم
عشت قصة حب مع زوجي اشبه بنسج الخيال
حتى انه لم يرغب ان احمل بسبب غيرته وخوفه ان انشغل عنه
وربي كنت اشوف نفسي بعيونه
المهم بعد ستة اشهر من زواجنا دخلت عليه في غرفة التلفزيون وهو ماسك جواله
ولمن شافني قفله ورماه
انا تضايقت من الحركة لكن ماشكيت بشي ابد ابد
ونسيت بسرعه لان علاقتنا قويه جدا .. فقلت راح يقول لي وش عنده مع الايام
وبعد كم يوم تكررت الحركة
فقلت يمكن حد مرسل له صورة او شي ومايبغاني اشوفه
لان واحد اخوياه الله يستر عليه ماني مرتاحه له
ولمن نام اخذت الجوال وفتحته ولقيته مسجل في قروب اسمه بنت الجنوب في برنامج اسمه بالرينقو
هنا جن جنوووني بغيت انجللط
مستحيل زوجي حبيبي يسويها
فتحت القروب لقيته عباره عن برود كاست عااادي جدا من الاعضاء
فارتحت شوي
وماواجهته ولا كلمته ابد
ومع الايام تتكرر حركته , خلاص قلبي عورني
ومسكت الجوال مره ثانيه وهو نايم ولقيت رسايل حب بينه وبين وحده
قسم بالله يان بيني وبين الجلطه شعره
انهبلت , صرت انتفض , ضاق النفس علي , ارتفعت حرارتي
ورجولي ماشالتني
وهو وربي موب متغير علي بالعكس رومنسي معي نفس اول
المهم ما واجهته ابد
بس ماقدرت اتقبله ولا اكلمه ولا اجيه
اقوم بواجباتي على اكمل وجه , بس بدون ولا كلمه
هو بدا يسالنس وش فيك ويجيب هدايا يراضيني بس مووو قادرة اطالع بوجهه
حسيته شي مقرف جدا ومنفر
صبرت اسبوع وبعدين انفجرت وواجهته , وهو انجن وانكر وقال هالبنات هم اللي يلاحقوني ومن هالخرط
وراضاني وباس رجولي وبكى بحضني زي الطفل عشان انسى
وسامحته لاني مجنونته
وتمشي الايام واكتشفه من جديد
مع بنات كثيييير , كل برنامج فيه كم بنت
وانواع الغزل والكلام الفاحش جدا
المهم قررت انشغل بنفسي واتركه لله , فكرت بالانفصال بس امي ماراح تتحمل الصدمة
وانا وربي ما خلاني اشيل فكرة الطلاق الا هي , راح تنصدم وتتعب
المهم يا اخواتي تمشي الايام ويبدا يتغير ويبعد ويجرح
ثم يعود لي من جديد
وانا ماتغيرت عليه ابد
اكون جالسه معه وواثقه جدا انه يكلم بنت بس ما احسسه بشي
ثم يتركها ويرجع لي بالهدايا والحب والرمنسيه
مشت الشهور والشهور وخلصت سنه من تارخ اكتشافي له بالخيانه
وطلعت حامل
فرحت جدا لكن قلت هل هذا الرجل هو اللي راح يربي ولدي او بنتي؟
ولمن اخبرته طار من الفرحه وكالعاد جاب هديه ويحاتيني وحريص على مواعيدي جدا
مر شهر ونص على حملي وذهبت لمراجعتي المعتاده فاذابي افاجا ان حملي خارج الرحم والحمدلله
انصدم هو اكثر مني , وتكدر مزاجه جدا .. لان المستشفى طلب تنومي حالا فالامر خطير
واليوم التالي اجريت عمليتي .. وكان هو وامه معي ماتركوني ابد
كنت احس بخوفه الشديد .. والخنقه اللي بصوته وده يبكي
لانه حس انه ممكن يفقدني
شالوني ع غرفة العمليات وكان معي لين باب الغرفه ثم سكرو بوجهه الباب وقالو له ساعه ونص بالكثير
تم تخديري ولم اصحو الا بعد اربع ساعات
لان حصل معي نزيف قوي ولله الحمد
اول مافتحت عيوني لقيته قدامي يبوسني ويكلمني وعيونه تلمع
وماتركني ابد لين طلعت من المستشفي في اليوم التالي
نسيت اخبركم من قبل العمليه باسبوع وانا موطايته ابد ابد
مو عارفة وش السبب ,, يمكن تماديه بالخيانه ,, يمكن انشغاله يمكن ويمكن
بس ما ابييه خلاص واستمريت على كذا حتى بعد العملية
المهم بعد العملية بعشرة ايام
كنت منسدحه وهو عالجوال ثم التفت عليه وهو مو منتبه
ليقته يكلم بنت على البي بي
وشفت اغلب محادثتهم
بعدين التفت علي وخاف وحاول يمشي الموضوع عادي كنه واحد من اخوياه وكمل سواليفه مع البنت
ثم فتح القران وقرا شوي وسكره ونام ,, وانا نمت
وتمر الايام اعامله طبيعي ولاكني شفت شي
الحين انا ما ابييه ابد ,, وربي كرهته خلاص
بس امي ماراح تتحمل .. وابوي انسان مطوع الله يحفظه ودايم كلمته لنا انا وخواتي (أصبري وربي بيؤجرك)
بس انا مشكلتي مختلفه عن خواتي وماعندي اطفال مثلهم واحس ماعندي شي باخسره لو تركته
ومالي نية اتزوج اصلا ..
بس انا ساكنه بالرياض واهلي في مكه
وادرس بالجامعه وعشان انقل دراستي لممكه راح اتعب كثير وممكن اخسر هالترم
مو عارفة وش اسوي
قسم بالله ماعنده سبب يخليه يخون .. كل شي اسويه له حتى وانا كارهته
شخصيتي قوية معه .. وافرض عليه احترامي ومصروفي من خلال اسلوبي وانوثتي
دلع ومساج واهتمام باكله وصحته وملابسه ومظهره امام الناس
والشي الاهم حياتي الجنسيه معه من افضل مايكون وبشهادته والحمدلله ومجنون علي من هالناحية
كل شي اسويه له حتى امه تعترف لامي .. تقول لها بصراحه ما احب بنتك تزوركم لان ولدي خلاص مايستغني عنها .. ومحد يسوي له اللي هي تسويه .. حتى اطفال العايله يقولون لمن تروحين لاهلك محمد يصير زعلان ووده يبكي
وانا اسوي له كل شي عشان ما اكون زوجه مقصره معه لا اكثر .. لان هذي تربية امي وابوي ربي يخليهم لي
الحين ياحكيمات وش رايكم بالتصرف الصحيح معه؟
تعبت خلاص .. مب قادرة افكر اساسا
اتركه ؟ .. ولا اصبر عليه ..
ودي اصبر عليه .. بس المشكلة شافني لمن شفته يكلم البنت .. واخاف يقول هذي خايفه تواجهني
للعلم الحين زعلان علي ..يقول صار لك فترة مو طايقتني ..ولمح لي انه اذا ماتبيني فانا ماراح اجبرك علي وراح اوديك لاهلك .. ثم رجع وحضني
وش هالحب حقه .. احس الخيانه تجري بدمة .. أحيان احس وده يترك هالبنات بس مو قادر
طولت عليكم بس وربي اول مره في حياتي افتح الموضوع لاحد