حياتي مع حماتي،، من سيء لاسوء

السلام عليكم ورحمة الله
اشتقتلكم واشتقت لكل البنات الي هون وصارلي سنتين غايبة عن المنتدى بس رجعت :)

انا متدايقة ومش عارفة شو احكي، كتبت قبل سنتين موضوع عندكم بالمنتدى عن نفس الموضوع الي جاية احكي فيه اليوم والي هو حماتي هههه
http://forum.hawaaworld.com/showthread.php?t=3453507
انا بدي حل وقبل الحل بدي افضفض لانو انا رح انفجر
بالموضوع الي فوق كنت حاكية عن وضعي معها قبل سنتين بس للاسف ما اتغير اشي بالعكس ايامي معها كل يوم ابشع من التاني
بعد 3 سنين زواج كتير اشياء اتغيرت بحياتي وخلال هالفترة اكتشفنا انو في عند زوجي مشكلة بالانجاب وهالاشي معروف لعيلة زوجي وقررولنا الاطباء انو ما بينفع معنا الا عملية الزراعة، هالحكي كلو معروف عند حماتي بس للاسف هي ما بتفوت اي فرصة لحتى تحسسني بالنقص كيف انو صارلي 3 سنين ما خلفنا مع انو انا مرت الكبير والي بزيد مجاكرتها الي ورمي الحكي هو انو في عندي سلفين اتزوجوا ونسوانهم حوامل،، فحماتي معيشتني بدوامة من المجاكرة ،، اربعة وعشرين ساعة تسميع كلام عن الخلقة والاطفال وبتجاكرني بسلفاتي وهي عارفة انو المشكلة عند زوجي مش مني،، يعني قبل فتره خلتني قاعدة ببيتهم وصارت تحكيلي ،، الاء شوووفي الدلال. ولما اطلعت عليها اشوف عن شو بتحكي لقيتها بتقسم بفواكه وبطعمي بسلفتي بتمها، طبعا هالحركة عملتها باليوم الي عرفت عن سلفتي انها حامل والشعور الي وصلي من هالحركة انها بدها تقهرني وتسم بدني بس انا وقتها ما حكيت اشي انصدمت من الحركة وسكتت وطبعا انا ما بطلع مني اقوللها ابنك هو السبب لانو بالنهاية زوجي انسان محترم وما بقبل اني اهينو قدام اهلو وبالنهاية الاولاد بإيد الله مش بشطارتي ولا بشطارته،، وعسيرة الشطارة،، ااااااااخ يا ربي والله اني مقهورة،، مرة خلتني قدام اهلهها وقعدت تحكيلي شوفي ما اشطر مرت اخوي هيها سبقتك وحملت!! انا وقتها انصدمت وما عرفت شو ارد عليها
والله ما بمر يوم ما ببكي منها،، كل يوم بتبكيني بكلامها ونفسي ارد عليها بس ما بقدر بحكم سنها وبحكم انها ام زوجي،، وسلفاتي التنتين يعني بحسهم ما بسكتولها بردوا عليها رد قوي لو فاتت بحدودهم بس انا بسكت لهيك بحسها بتتفنن بمجاكرتي
قبل يومين خلتني بعزومة عائلية لكل عيلة زوجي،، وكان زوجي يحكي معي بصوت واطي يقولي ليش ما تاكلي،، لانو بعرف اني بستحي عندهم مع اني صارلي 3 سنين عندهم فأنا قلتلو لا انا اكلت وهادا صحن تاني حطيتو،، ففجأه حماتي نطت وقالت: هادا تاني صحن بتاكلو هو انت مش منتبه وضحكت!!! انا وقتها حسيت حالي رح انخنق اطلعت حوالي وما كان بدي حدا ينتبه وقمت عن الاكل،، سمت بدني كتير بكلامها وللأسف انا وصلت لمرحلة اني بكرهها ومش قادره احس انو في امكانية اعرف اتعامل معها

انا فضفضت وحكيت الي عندي،، بس متأكده انو بكرا رح تطلعلي مشكلة جديدة ورح يكون عندي كلام جديد
وعقولة هالواحد هذا غيض من فيض!! يعني المحبوس بنفسي اكتر وكل ما اتزكر هالمواقف بكرهها بزياده
وحاسة انو هي سبب تعاستي بهالدنيا
ساعدوني شو اعمل معها