حياتي واقفه

بنات اقسم بالله اني كارهه نفسي وحياتي
والله العظيم اني اخاف من الله على كلامي وسخطي احيانا تجي ببالي كلمات زي الله ليش خلقني؟ انا ليش بهذا الابتلاء ليش غيري حياته ماشيه وانا مثبته من عشرين سنه!!
انا ليش مالي حظ انا ليش فيني وفيني
مشكلتي باختصار باقي شهرين
واكمل٣٢
حياتي باختصار واقفه من ٢٠ سنه لدرجه احس
انها مثبته!!
كل الدي بعمري من اقارب من صديقات
تغيرت حياتهم من عشر سنين اللي توظفت واللي تزوجت واللي عندها عيال
الله يوفقهم الا انا
الله ماوفقني بدراستي الجامعيه

مع اني اكرف واتعب واحاول اجتهد لكن مالي حظ دخلت قسم مالي اي رغبه فيه تحطمت
مشيت بالقسم بالدف وخلصت على كبر تخرجت
بعمر٢٧ تقريبا لي سنين اقدم واقدم
على وظايف مافي اي شي بدرجه صارو الناس
يتمسخرون ان بنات اقسامهم مرغوبه ماحصلو
بتحصلين انتي؟؟
مشت السنين وكان فيني شي وضعي مو طبيعي كان فيني سحر عمر احد هذا اللي خلاني اشك
ان فيني شي عمر احد
ماخطبني لين وصلت هالعمر ادري انه نصيب
لكن صرت اشك بشكلي صرت اشك بجسمي
صرت اشوف نفسي شينه واقول عشان كذا
ماحد يبيني صرت اشوف جسمي شين
لكن لما اشوف اللي حولي اشوف بعضهم شكلهم اشين مني جسمهم اشين مع كذا متزوجات من سنوات
يعني الزواج مو عشان الشكل!!
اجل وش مشكلتي بالضبط؟؟
المصيبه وين
اني بكل طلعه اقولها بالفم المليان
انا لو اوصل خمسين مستحيل اخذ متزوج
او مطلق عنده عيال مستحيل ابني سعادتي
على تعاسة وحده ومستحيل اتحمل عيال الناس يعني مطلق عنده عيال فما بي اتحمل ذنبهم
لكن انواع التحطيم يجيني انتي كبيره
انتي مب جميله وصغيره تتشرطين
انتي مب موظفه ولا تاجره ولا بنت مليونير
عشان تتشرطين
بنات بعمر العشرين اخذو مطلقين واخذو
متزوجين وانتي متعديه الثلاثين وتتكلمين
سوالي
ليش الرجل يصك ٥٠ و٦٠ ويدور بنت بالثلاثين
ولًااحد يقوله كبير وشايب والبنت اول ماتوصل
٣٠ يحسسونها انها وصلت سن الياس
واللي يقهر جد
اللي يحسسها بهالموضوع نفس جنسها الحريم
هم اول مايشوفون بنت عمرها تعدى الثلاثين
خلاص يبدون يحطمونها اقسم بالله
اني اقول الحمدلله الرزق بيدين الله مو بيدين الخلق
انا احس راح عمري وجالس يروح على الفاضي
احس اني عايشه بس بالاسم
مالي اي حظ او نصيب بالدنيا
عمري جالس يمشي ويضيع كذا