من زمان مو حاطه شي يديد, كنت بالكويت عند امي و ما فيه وقت بصراحه احط موضوع يديد. لكن الحين خلاص رجعنا الامارات الحمدلله و ابشروا بالشغل ان شاءالله.
ابدي وياكم اليوم بلوحاتي ملوت الرسم على الزجاج. كلكم اكيد الحين خلاص تعرفون الأساسيات. :) احطها باختصار للي ما تعرفها.
1- اول شي اختاري الرسمه اللي ناويه ترسمينها على الزجاج, و اذا محتاجه تكبرينها وديها المكتبه يكبرونها.
2- نظفي قطعة زجاج تناسب مقاس الرسمه بالماي و الصابون و ليس بمنظف زجاج.
3- لصقي الرسمه خلف الزجاج بشريط لاصق علشان تكون ثابته عند رسمها.
4- استخدمي تحديد الزجاج من اي لون على حسب ذوقك يا اختي و ابدي بتحديد خطوط الرسمه كامله, ثم اتركيها لتجف.
5- ابدي بتلوين الرسمه, و اخذي قاعده يا اختي انك لما تبدي اول شي ابدي بالألوان الفاتحه. علشان اذا حابين نخفف اليوم بالتنر او الماي ما يتأثر اذا كان قبله لون غامق.
6- الوان الزجاج نوعين. النوع الأول Water based و النوع هذا يخفف باستخدام الماء و سهل انه يزال بالماء. اما النوع الثاني Solvent Based هذا يخفف بالتنر. و اهي نفس الماده اللي نغسل فيها الفرش طبعا.
7- عند حدوث اي خطأ في الرسمه استخدمي قطن تنظيف الأذن لتصحيح الخطأ.
8- بعد ما تخلصي تلوين الحمدلله اتركيها لتجف لمده يوم مثلا, ثم ضعي عليها طبقه من الورنيش للحمايه.
هذا باختصار شديد و اي سؤال يا خواتي انا حاضره ان شاءالله. و الحين اخليكم و يا الصور. و كل رسمه من عندي راح احط لكم الأصل مالها للي حابه تستفيد و ترسمها اهي بعد. و الله يوفق الجميع ان شاءالله.