كل عام والجميع بالف خير:26:
حياكم على سفرتي المتواضعه والصغيرة لاول ايام رمضان المبارك ..
كانت عبارة عن عيش صيادية مع دجاج بدبس الرمان مع دقوس طماط ومعبوج ..
منظر عام للسفرة .. اسمحولي صورتهاا قبل ما ارتبهاا ...
الاطباق ..
عيش " رز " صيادية مع دجاج بدبس الرمان ..
نزلت الطريقة قبل فترة بالمنتدى بس راح اعيدها مرة ثانية ..
نحمس بصلة مقطعه بزيت ونظيف لهاا فصين ثوم مفروم ونظيف دجاجة ونتبلها بـ " بهارات مشكلة -فلفل اسود- كركم - زنجبيل مطحون-كمون " .. وبعدها نحط بهارات صحيحة " هيل - مسمار- ورق غار " .. ونظيف الماي والملح ونخليهاا تطبخ الى ان تستوي الدجاجة ..
بعد ما تستوي الدجاجة نحطها بصينية الفرن ونصب عليها تقريبا نص كوب دبس الرمان على حسب الذوق ونظيف معاها خضار اللي نحب .. انا حطيت بيبي كروت ..
نصفي مرق سلق الدجاجة ونتركه على جنب .. وننقع ثلاث كاسات عيش " ارز " ..
ناخذ حبة بصل ونقصصها شرايح ونحمرها حتى يصير لونها بني غامج ونضيف لها مرق الدجاج اللي صفيناهاا ونحركهاا الى ان تاخذ اللون البني .. ونرجع انصفيهاا مرة ثانية ..
نجيب جدر ونحط فيه شوية زيت ونحط العيش المغسول والمنقع ونرش عليه رشة دارسين مطحون "قرفة " وفلفل ابيض .. ونحط المرقة السابقة ونعدلها ونعدل الملح ان احتاج .. ونتركها تتطبخ الى ان تنضج ..
اتمنى فهمتو شرحي ..
لا تردوون شوي بس ..:26:
المكونات ..
اربع حبات طماط مطحونة .. فصين ثوم مدقوق .. علبة معجون طماط .. بهارات .. كركم .. ملح وفلفل .. ماي ..
الطريقة ..
نحط زيت بجدر ونحمر الثوم ونضيف له الطماط المطحون وعلبه معجون طماط والبهارات والكركم والملح والفلفل ..
نضيف لهم من نص كاس الى كاس ماي على حسب .. كل ماشفنا انا محتاجين نخفف شوي نزيد الماي ..
نضيف لها حبة ليمون سودة عدله من غير ما نثقبهاا .. والليمونة على حسب الرغبة تقدرين تستغنين عنهااا ..
الدقوس ما يحتاج طبخ وااجد .. من يفوح خلاص صار جاهز .. وبالعافية ..
المعبوج ..
ناخذ فصين ثوم نحمسهم بزيت ونضيف لهم قرنين من الفلفل الحار الاخضر او الاحمر ومقطعينهم صغار .. ونضيف علبة معجون طماط ورشة بهار .. وبس ..
تقدرين تسوين منها كمية وتحتفظين فيها بالثلاجة .. اذا احتجتي منهاا بس اتطلعينه واذا شفتيه ناشف سخنيه شوي وضيفي نقط زيت .. وبالعافية ..
شوي لا تردوون ..