أولا : شاي كرك
المقادير :
ابريق (غوري)
ماء - تقريبا أربع أكواب
شاي سايب (بودرة) يعني مب أكياس .. ممكن ريد ليبل أو ليبتون و حق المقاطعين .. ممكن شاي الوزة .. و اللي عنده شاي هندي pure يكون أحسن
حليب أبوقوس السائل
فنجان وربع من السكر طبعا يكون الفنجان مال القهوه .. أو حسب الرغبة
الطريقة :
نصب الماء في الابريق و انحط فيه السكر و نغليهم ويا بعض تمام ..
و ثم أضيف بودرة الشاي بمقدار ملعقتين طعام كبار .. و اتركه يغلي ..
بعدها اضيف الحليب واتركه على نار هادئه يغلي..
طبعا أحط عيني على الابريق و انتظر الشاي يغلي أو "يفور" بس انتبه إنه ما ينصب على بره .. و اخف شوي على النار و أخليه يغلي من جديد لمدة 10 أو 15 دقيقة تقريبا .. لين ما يصير كرك .. يعني "ثقيل"
تخليه يغلــي وتطفي عنه كذا مره
الحين الله يسلمك تجيبون مشخاله وتشخلون الكرك بالدله
و هذا كل شي ..
ملاحظة :
ممكن تحطون فيه هيل إذا حابين بالدله وبعدها تشخلون الكرك فوقه :)
الـ "جباتي"
المقادير:
مقادير بسيطة و نستخدمها في كل أنواع الخبز
طحين القمح
ملعقة طعام ملح
ملعقة طعام سمن
1\2 كوب ماء
الطريقة :
وايد سهلة و بسيطة ..
طبعا اللي بنسويه هنيه إنا بنحضر عجينة متماسكة و لينة و سهلة التشكيل .. كل اللي علينا انسويه أولا إنا انحط كمية من الطحين في طاسة أو على صينية مفرودة و نبدأ نكون عجينة مكوناتها هي المقادير اللي ذكرتها فوق .. و بتم أدلكها و أعجن لين تصير العجينة عندي ناعمة و لينة .. و أحط في بالي أني ما أزيد كمية الطحين لأن مقدار الماي اللي عندي قليل .. عشان جذي أنا ما حددت كمية الطحين ..
الحين نترك العجينة لساعة كاملة و لا أنسى أغطيها بقطعة مبللة عشان ما تنشف
بعد الساعة .. أبدأ أقطع العجينة اللي عندي لأجزاء صغيرة .. أشكلها على شكل كور صغيرة .. يعني تقريبا أصغر من المتوسطة شوي ..
الحين بعد ما شكلت قطع العجينه اللي عندي .. ابدأ أخبز .. أول شي لازم يكون عندي .. صحن و أحط فيه طحين و أريد بعد " الشوبك " اللي بفرد بواسطته العجينة و السطح الخاص بخبر الجباتي .. و هذا متوفر في السوق .. ليش هذا بالذات لأن يسهل عملية الخبز و فرد العجينة و توزيعها بيكون بشكل متجانس و بسمك ومقاس محدد و لا أنسى إنه مصنوع من الخشب و هذا أهم شي ..
الحين باخذ أول كورة عندي و أغمسها شوي في الطحين الجاف و بعدها افردها شوي بيدي و أحطها على السطح الخشبي اللي عندي و أبدأ افرد العجينة بالشوبك بحركة دائري و أراعي إن حركة يدي تكون خفيفة.. لين أشكل الخبزة
طبعا أكون محطية في بالي أني بسوي الخبزة عي النار .. فعشان جذي بكون محضرة القلاية العادية أو الخاصة بالخبر "التاوة".. و تكون على نار هادية..
أحط الخبزة اللي سويتها على "القلاية و ادهنها بشوية سمنه أخليها أقل من دقيقة لما أشوفها بادية تستوي .. أو تنفخ و أبدأ أحركها و أقلبها لين أشوفها أحمرت شوي .. بتصير مثل " شكل الخبز الهندي اللي انشوفه" و أقلبها على الويه الثاني و أضيف سمن أكثر إذا حابة.. طبعا بعد ما تستوي ارفعها و أحطها في صحن التقديم أو الطاسة اللي أنا محضرتها ..
باقي المقدار من الكور أسويه بنفس الطريقة لين أنتهي من كل الخبز. و طريقة التقديم لج و كل وحدة و ذوقها ..
و هذا كل شي .. هني و عافية و إن شاء الله إني ما عقدت الأمور و شرحي كان واضح ..
_________
بالنسبة للكيمة :
المقادير :
2 كيلو لحم مفروم و اللي ما يحب اللحم ممكن يعوض بالدجاج عادي .. مع إن الكيمة لازم تكون لحم .. بس مو مشكلة كل واحد و حسب ذوقه.
3 ملاعق طعام من زيت الخضار أو زيت الذرة
3 بصلات كبيرة
كوب من الملفوف .. مقطع قطع صغيرة
كوب من الجزر .. مقطع قطع صغيرة .. و كوب من البازلاء الخضراء الطازجة
2طماطم متوسطة
كوب كزبرة خضرة مفرومة
ورقة غار (حسب الرغبة)
ملعقتين أكل من الزنجبيل المبروش .. يفضل الزنجبيل الأخضر مش البودرة
نص ملقعة طعام من الثوم المبروش أيضا و يفضل إنه يكون طازج
ملعقة طعام من الكركم و بهارات مشكلة و ملح
و قرنين من الفلفل الاخضر الحار .. (هذا حق اللي يحب الحار) و اللي ما يريد الفلفل الحار ممكن يعوض بالفليفلة الحلوة بس عشان النكهة
ملعقة طعام معجون طماطم
الطريقة:
نرفع القدر اللي بنطبخ فيه على النار و تكون النار هادية .. أحط هنيه مقدار الزيت اللي عندي .. اتريا لين يدفى شوي و أحط فيه مقدار اللحم المفروم و أبدأ أخلطه مع الزيت لين أشوفه اتماسك و استوى "نص سوا" .. (يعني مش مطبوخ تماما)
الحين أقطع البصل إلى قطع صغيرة و أضيفها للحم .. و أضيف مقادير الخضرة اللي عندي .. الملفوف و الجزر و الكزبرة و البازلاء و الزنجبيل و الثوم و الفلفل ..
أخلط المقادير مع بعض جيدا و هنيه أضيف لها مقدار الملح على حسب الرغبة و اتركها فترة تستوي تقريبا 5 دقايق و على نار هادية جداً
الحين احط الطماطم المقطع مع المعجون و أخلطهم مع بعض و أتركه نص دقيقه تقريبا.. بعدها أرفع الطبخة من على النار و أحطها في صحن بايركس أو أي صحن خاص بالفرن و أدخلها الفرن على درجة حرارة هادية لمدة تقريبا 30 إلى 45 دقيقة لين تستوي الطبخة بشكل تام..
و بعدها أقدم الأكلة بطريقتي و بزخرفتي الخاصة ..
و هني و عافية مرة ثانية ..
يعطيك العافيه