حياكم لموضوعي اللي عجزت أحصل له عنوان !!

بسم الله الرحمن الرحيم

السلام عليكم ورحمة الله وبركاته




عزيزاتي موضوعي ما حصلت له عنوان صراحه

لكن هو يخص بعض النسوان اللي صراحه المشاعر و الرحمه

و الذوق و الأدب منزوع عندهم تماماً



والدي توفي قبل شهر رحمة الله عليه

وفي العزاء صدرت تصرفات من بعض الناس وربي مررره قهرتنا ومو بس بعزاء والدي

كثير ناس تشتكي من هذي التصرفات وقت العزاء يعني اللي مو شايفه نفسها محترمه و لا راح

تراعي مشاعر أهل المتوفي لا تعزي مشكوره تجلس ببيتها أحسن لها من أنها تجي و تورينا تصرفاتها

اللي تبين و بكل صراحه أنها يا خبله يا مريضه يا شمتانه


أنا والدي لما توفي ما كان مريض كان بصحته وعافيته و كان طالع للبر مع أخواني الصغار و توفي

معهم بالسياره فجأه و ماكان رحمة الله عليه كبير بالعمر أنا أكبر أولاده عمري 27 سنه

يعني وفاته رحمة الله عليه جداً فجعتنا و مو ناقصين ناس مريضه تزيد علينا

من التصرفات الي شفتها و نفرتني بعزاء والدي و من أول يوم بالعزاء

المكياج و اللبس و العبايات المطرزه بألوان و أشكال و كأننا في حفله مو عزاء

وكمان كل وحده ماسكه جوالها و تبادل مقاطع و أصوات و صور وضحك و سوالف و حش و غيبه

حتى أنه و الله في ثاني يوم من العزاء وحده فاتحه مقطع أغاني وترقص عليها قدام البنات !!!

كمان خدمة أهل المتوفى

ليش الناس تجي إذا ما فيها خير ولا راح تخدم أهل المتوفى تجي بس علشان تأكل ؟

يعني مو معقوله حتى المويه نجيبها و نوزعها على الناس و المفروض أحنا أهل الميت ننخدم مو نخدم

و كمان الأطفال يعني الواحد مو قادر على أطفاله بمثل هذي الظروف

ليش الوحده تجي من الظهر هي و أطفالها و تجلس لنص الليل أزعاج و حوسه و تخريب

اللي عندها أطفال تتركهم عند أحد تجي تسلم ومع السلامه مو تجي تجرهم معها و تقلبها

ساحة عرض لها و لأنجازات أطفالها طول الوقت ولدي سوا و فعل و ماشاء الله على ولدي ذكي

و ما شفت بالأطفال مثله و رح يا ماما سلم على خاله فلانه وعلى خاله علانه و كأننا

فاضين لها هي و بزرانها

أنا لما توفي والدي تركت عيالي أسبوعين عند جدتهم وعماتهم ماني رايقه لأطفالي

حتى أروق لأطفال غيري




وكمان الأسئله اللي مالها داعي كل وحده تحترم الناس و مشاعرهم ماله داعي الأسئله

السخيفه اللي كلها مليانه غباء و شرافه و حب أستطلاع

مثلاً

كم عمرك كم معك أولاد منين متزوجه وإيش وصلتي بالدراسه و كأنه وقتها هالأسئله

و أعجب سؤال غبيه سألت أمي فلانه إيش صار على شعرك للحين طويل أو قصيتيه

بالله هذا سؤال ينسأل بعزاء ولمين للزوجه اللي فقدت زوجها ؟!


هذا غير اللي شغال أسأله و أستطلاع للتركه و الورث و الورثه

ويحاول يحصيها قد ما يقدر

البيت ملك لكم !

البيت قرض !

السيارات كاش أو قرض !

و هذا غير أساليب التصبير العجيبه

أحمدو ربكم يا زينها من موته

أحمدو ربكم ما عذبكم

أحمدو ربكم ما تركم بحاجة أحد

أحمدو ربكم ترك لكم خير

أحمدو ربكم عندكم عيال

و تطول العجائب ........................... و يازينكم ساكتين



و في الاخير العزاء ثلاث أيام بس

والدي له شهر متوفي و الناس لحد الأن تجي تعزي !!!





أخواتي اللي ما تعرف تتكلم تروح وتسكت مو لازم تتكلم واللي تحس نفسها ما راح تحكم تصرفاتها

و نفسها تجلس ببيتها أحسن للجميع مو تروح وتزيد الطين بله

راعو مشاعر غيركم لأن صدقوني بيجي يوم وتمرون بنفس الظروف





أخر حاجه شرايكم بهالموقف لا تلوموني لما أقول عن بعض الحريم نفسيه

أنا داخله بقروب وتس أب مع مجموعه من بنات أقاربي و معارفي و الصراحه فيه كم وحده أحس

أنهم يكرهوني كره فضيع و هالشيء واضح من طريقة كلامهم و تصرفاتهم معي

الموقف حصل لي اليوم لما كانو بنات القروب يذكرون بعض من محاسن والدي رحمة الله عليه

وكيف كان يتشهد قبل يموت و كيف كان شكله بعد ما توفي و لما كانو يغسلونه

والناس الكثيره اللي شافته على خير بأحلامها

فدخلت وحده مريضه وقالت

( هو مدخن والمدخن لا تقبل شهادته عند الموت )

و ردو عليها البنات و قالو لها ما يجوز تقولين كذا و طال الحديث بينهم و أنا ساكته ما رديت

ولا بحرف واحد

و في الأخير قلبت الهوش علي

و قالت الحين أبوها له شهر متوفي و مسافره تصيف خارج المملكه !!!

على فكره يا بنات هذي المريضه تدعي الدين و الأخلاق و مع الأسف أنها حافظه للقرآن الكريم

لكنها تؤذيني كثير بلسانها حسبي الله هو نعم الوكيل فيها





هذا موضوعي يا عزيزاتي

أعتذر عن عدم تنسيقه بس صدقوني كثير مقهوره