حينما وقفت على مشارف الموت .. ( قصتي )

السلام عليكم بنات

انا بنت وعمري 24 ومتزوجه من 3 سنوات

قبل 6 سنوات بالضبط صار لي موقف برمضان ومن بعده وانا موسوسه بالموت

هالموقف وشو ؟؟

عقب ماافطرتبرمضان وانسدحت جاني شي حااار دخل مع رجولي وطلع لصدري

مدري وشو قمت واقفه احاول اتحرك وانكتمت وجاني خفقان وخفت كثير

اول ماجاء ببالي انه الموت وهذي الروح تبي تطلع

طبعا ع طول رحت للطوارئ وعطوني اكسجين وهناك صار شي ماكان ع البال ولا الخاطر

وقت ماحطوالي الاوكسجين ومنسدحه ابكي واصارخ تشششنجت

وصارت اصابعي متجمده ومتعكفه ويديني داخله جوا

واصارخ اقول فكوها فكوها وامي جنبي حاضنتني وتصارخ وتقرا قران وتهاوش الممرضه فكي يدينها


هديت نفسي لين استرخيت وفكت يديني ورجولي وخلوني تحت الملاحظه نص يوم وبعدين طلعوني

من هنا بدات المعاناه

كل يوم بنفس الوقت اتعب

واروح المستشفى واتشنج

رحت الشيخ قال مس طائفي ولاعاد رحت له مع انه قال تعالي مره ثانيه

يابنات خلاص كرهت الدنيا صرت تعبانه واوسوس ومعدلي انخفض من ممتاز لين جيد
تزوجت وانا نفس انا ماتغيرت ويمكن تعبت زود مع الزواج

اللحين يابنات صرت جلد ع عظم وزني 38 وتعبت ماانام اواصل بالايام عشان لااموت وقت النوم والصلاه اقطعها لاجيت اصلي احس انخنق ومره بمكه جيت بصلي صلاة الجنازه لا اله الا الله بغيت اموت وطحت من طولي


مواقف كثير كادت تقتلني

اقوم من عد نومي اشاهق ادور هوا

اتعب لما اجلس لحالي افكار واخواجيس

اكره المساجد والخطب والمحاظرات لانها تذكرني بالموت

اتصدق كثير واستغفر واصلي وادعي بس الحمدلله للحين ماتحسنت

السنتين الاخيره استفحل الوضع لدرجة صرت افكر انتحر

راجعت شيوخ ومستشفيات سليمه

العله نفسيه نفسيه نفسيه

وش ازين وش اسوي ياعالم ياامه محمد


تعبت اعيش كل يومي ترقب وقلق وخوف وبكاء

اللي زود تعبي مشاكلي مع زرجي وعدم حملي

طز بكل شي الا الصحه يابنات


الطبيب النفسي خليته اخر اختياراتي لاني مالي قدره عالمصاريف والمواعيد والمستشفيات ووجع الراس

بنات كل يوم اموت الف مره من الحسررره

تمفون ادعولي ودلوني عالحل الله ياخواتي لايجعلكن تجربن ماجربت ولاتذوقن ماذقت

وادعولي بظهر الغيب مابي ردود والله ابي دعوه بطهر الغيب لعل فيكم من اقسمت على الله لابرها


استودعتكم الله