خاطري افهم نفسي دخيلكم ساعدوني والله تعبت...

خاطري افهم نفسي اعرف انا شوه من البشرة وشوه اللي قاعد يصيرلي هل هذا ابتلاء من الله والا عين والا شوه بالضبط...ترا انا جد ضايقة على الدنيا وما اعرف شو اسوي بنفسي تعبت من كثر ما ابكي واحاول افهم نفسي تعبت من حيرتي وحزني وكل يوم اقول باجر راح يكون يوم جديد وكل مشاكلي راح تنحل بس ما في شيء فحياتي بغيته توفقت فيه والغريبة اني ما تمنيت شيء وصارلي بس اذا دعيت بدعاء لغيري صار ليش ما ادري ..؟؟؟و ليش انا مش متوفقة فحياتي انا صح ما اقدر افهم نفسي بس انا اعرف اني طيبة وعلى نيتي والكثير يمكن لمس هالشيء فيني يوم طرحت مشكلتي قبل مع خطيبي وترا اللي فيني الحين هو امتداد لمعاناتي مع هالانسان اللي يحمل تناقض غريب فشخصيتة رغم طيبته واخلاقه وكل ما ذكرته فيه من قبل الا انه هو السبب ورا اني حاسة بحزن مش طبيعي هالمرة واحس خلاص قربت اني اخسره مع اني عندي يقين بداخلي اني لوخسرته مستحيل القي شراته بس هو جد تغير وما صار يعاملني شرات قبل وانا السبب انا اللي غيرت حياته للاسوء بعد ما كان شاب بشوش مقبل على الحياة من كثر نكدي ونظرتي السودة للدنيا خليته يشوف الدنيا بنفس نظرتي كله امبوز ونادرا ما يسولف ويضحك وكل مااحاول اغير الجو وايب شيء يديد يقولي انتي ممله وانا استانس مع ربعي اكثر من القعدة معاج تعبت والله تعبت ما عاد قلبي فيه مكان لجرح جديد وكل ما اقرر ابعد واقول ياله ما في فايدة يتغير ارد واقول انا ليش اشتكي واعذب نفسي ترا هذا اللي جنيته انا على نفسي انا اللي غيرته انا اللي خليته يعاملني جية بسلبيتي واسلوبي بس وربي انا حاولت اغير من نفسي واثقف نفسي واقرأ وادرب نفسي واحاول اطبق بس ما يبن فعيونه ما يشوف جدامه الاصورة جديمة مني بعدها محفورة بداخله ومهما حاولت اتغير عشان اسعده ما فيه تقدير كله يقلل من شأني ويحسسني انه مافيني ميزة حلوة تستحق انه يلتفتلي بتقولون شو اللي مصبرنج عليه هذا ما يحبج ترا هذا اللي اقوله لنفسي انا مرات جد احسه ما يباني وما يحبني وانه مل من صبر 3سنين خطوبة وكل ماتمر سنة تتعقد الامور وكله من ناحيته وانا مالي ذنب في اي شيء انا من كل قلبي قدرته وحبيته وقفت معاه من الصفر تحملت مادياته وظروفه وكل شهر اقول راح يتعدل وضعه ومن تعدل وضعه وقام راتبه وصار يستلم راتب محترم ارهقوه اهله بمصاريف كبيرة وديوان عشان البيت اليديد وهو ما يقدر يقول حق ابوه وامه لا وما يصفي من راتبة غير 2000 من 9000 ومع هذا ما فتحت حلجي وقالي اصبري بنأجل موضوع زواجنا وانا دايمن اصبر نفسي واقول اصبري الله بيفرجها واصبر لاني واثقة انه يباني اليوم قبل باجر وما اقدر رغم اللي يسوية فيني اظلمه واقول اني ما المس معاناته لانه مب قادر يتزوجني ومب قادر يعيش شرات باقي الشبا ب اللي في سنه وانه تحمل كل الحمل بروحه ومحد من اخوانه واقفه معاه لانه كلهم متزوجين الا هو كله على راسه.. بس انا شو ذنبي على الاقل يقدر مسألة صبري عليه وتحملي لظروفه ومواقفي اللي صح يمكن تكون بسيطة بس ربي عالم انها من قلبي ومن حرصي اني ما ازيد الحمل عليه لاني متأكدة انه تعبان من الضغوظات اللي عليه وانه قام يشتغل شغلة بعد العصر عشان يقدر يجمع لزواجنا بس بعد مب ملحق وكل ما تضيق عليه الدنيا ما ينفس عن اللي بداخله اللي فيني انا يقعد يعاملني باسلوب جاف وتغير ما عاد كلامه مثل قبل وكله يفكر وانا احاول اواسيه بس كله يجلب ويختلق مشاكل من لا شيء وصار قربي منه مثل مايقول ثجيل على قلبه واليوم توفي حد من اهله وحاولت اواسية واتصل واطرشله مسجات اني حاسه فيه وانه هذا امر الله ومن هذا الكلام وعقب فترة اتصل وتم ساكت وعقب قعد يعصب ويقولي ليش ادقين واطرشين مسجات انا ما اقدر افج شوي عنج ما تحملت سكرت الخط وعقب طرش مسج وقالي (احسن بفتك) ما تتخيلون كيف عورت قلبي هالكلمة يعني هذا جزاي اني احاول اخفف عنه واحسسه اني قريبه منة
تعبت صرت محتارة ما اعرف شو اللي مصبرني عليه وكل مااقول لخواتي اني خلاص تعبت وما عاد فيني صبر اتحمل يقولولي انتي مستحيل تحصلين شراته هو يمكن مضغوظ شوي من ظروفه تحمليه والله بيفرجها انزين متى قوليلي ليش انا جية حظي والله انا عمري ما تمنيت الشر لغيري والا عمري ضريت حد ليش محد يحبني ومحد يقدر قلبي وكل حد يبعد عني انا شوف فيني والله اني عايشة لحالي وعمري ماشلت فقلبي ليش محد يحب قربي خاطري بس اعرف انا شوسويت فدنيتي عشان جية يصيرلي والله انا كل ما تضيق على الدنيا قمت وصليت ودعيت وكل ما ارتحت حمدت الله بس ليش عمري ما تمنيت شيء ولقيته واذا تمنيت لغيري ودعيت صار والله والله اني احاول عقد ما اقدر اني ما اذنب واذا اذنبت استغفر ربي والله اني يوم اذنب مرات استحي من ربي اني اوقف بين ايده واقوله سامحني اقول في قلبي انتي ما تستحين لين متى وانا اذنب رغم اني احاول مااذنب عشان الله يحبني واتوفق فحياتي وادش الجنة انا مليت ودي حد يفهمني انا شوه من الناس وليش مالي حظ وليش اذا دعيت ربي الله ما يقبل دعوتي والله اني احب ربي وما احب طريق الخطأ واحاول واجتهد صح مرات انجح بس مرات افشل بس استغفر قولولي انا لهدرجة سيئة انا شو عيبي وين طريقي كيف اقدر ارتاح قوليلي والله ما لي حد غير ربي وغيركم انصحوني الله يجزيكم الجنة ولايحرمكم من شيء تتمنونة..