خالتي زوجها بيتزوج عليها.. اقول لها والا أسكت؟؟؟

السلام عليكم ورحمة الله وبركاته

خواتي بنات حواء.. عندي مشكله محيرتني ومو عارفه ايش التصرف الصحيح
خالتي متزوجه من تقريبا 20 سنه وربي مارزقها عيال .. وهي وزوجها ماخذين بعض
عن حب هي تموت عليه وهو كذلك.. وطبعا كالعاده امه دايم تزن عليه بالزواج من وحده
ثانيه وهو ما يقبل ( وعلى حسب علمي ان مشكلة عدم الانجاب مش بس من خالتي وهو بعد
قدرته على الانجاب ضعيفه جدا)..
المهم قبل 3 سنوات تقدم لوحده وتم عقد القران ولما درت خالتي بالسالفه زعلت وطلبت الطلاق
وصارت سالفه وطلق خالتي.. ولانه يحبها موت بس كم يوم ورجعها وطلق البنت المسكينه..
ونفس الشي ملك على وحده ثانيه وبس كم اسبوع وطلقها..
قبل شهر تقدم لبنت أعرفها.. والبنت وافقت عليه , واللي يساعده بالسالفه
ومتكفل باقناع العروس الجديده بنت اخوه .. بس باقي اهله وخواته محد يدري بالموضوع
( عمره 50 والعروس 29) وهو مستعجل يبي الزواج يتم خلال اسبوعين يمكن عشان يحطهم تحت الامر الواقع..
وهو وبنت اخوه ما خلو مذمه ما حطوها بخالتي وانه مو مرتاح معها وانه رجعها المره اللي فاتت
لانها كسرت خاطره ومالها أحد وانه طلق البنتين اللي قبل لانهم ما عجبوه..

انا محتاره ومو عارفه شسوي.. هل اقول لخالتي والا أسكت وما كأني ادري؟؟
أخاف اقول وأظلم الرجال وأخاف أسكت وأظلم خالتي ( تخيلت نفسي بهالموقف وبنت اختي تدري وما تخبرني:icon33::()

اشرايكم بنات؟؟؟ شالحل؟؟