خايفة من الحمل والولادة!!وعندي مشاكل صحية.

السلام عليكم يا بنات ورحمة الله وبركاته
يمكن تلاقوا مشكلتي غريبة شوي وحابة آخد رايكم فيها
يابنات انا متجوزة من عشر شهور ولسه ما حملت
وانا عايشة في بلد غير بلد اهلي واسرتي ولكني مع زوجي
ماما عطول تتصل فيني وتسالني شو صار وحملتي ولا لاء ومتضايقة من هالموضوع خصوصا انه وانا بنت كان عندي مشاكل صحية ممكن انها تعيق الحمل والكل على نار اخواتي وصديقاتي وخصوصا ماما زي ما قلتلكم
انا للحين ما حاولت احمل بجد تاركتها هيك هبل
وبصراحة خايفة
شوي بقول لنفسي انا خايفة من الولادة وشوي بقول انا خايفة على ابني او بنتي اللي جايين عالدنيا اللي صارت تخوف
وشوي بقول بركي قصرت معهم بشي وما كنت ام كويسة بيصير الوضع نقمة بدل نعمة
وبعدين احاكي حالي واقول يا بنت لا تخافي او تفكري انه ما بدك اولاد علشان الله لا يحاسبك ويحرمك وتصيري تركضي عشان تحملي وما تقدري علشان رفضتي النعمة
ومشكلة كمان انه انا اصلا ما عارفة اذا كنت رح احمل ولا لاء (تبعا لمشاكلي الصحية اللي كنت فيها ولا زالت موجودة)
المشكلة كمان انه حابة احمل عشان اهلي وعشان اتطمن انه فيني احمل وعشان ما اندم بيوم من الايام وبنفس الوقت خايفة كتير
لذلك لحد الان ما سعيت ورا موضوع الحمل وتاركته هيك مع العلم انه كل شهر اعرف فيه اني مو حامل اتضايق شوي (لمدة يوم )وبعدين كان شيئا لم يكن
انا لما كنت راجعت دكتورة عشان وضعي الصحي قالتلي انه انا بكير علي وانهم ما بيتخذوا اي اجراءات قبل مرور سنتين على الزواج بس اللي حوالي مستعجلين اللهم الا زوجي يا حرام ما بيجيبلي اي سيرة لحد الان ولا بيقول انه انا تاخرت لانه اول ما تجوزنا هو كان ياجل موضوع الحمل لبعض الظروف لكن هلا بيقول انه صار لازم نفكر باه
وانا لا زلت خايفة
خايفة اني احمل
وخايفة اني ما احمل
شو رايكم يابنات؟؟؟


شو رايكم؟؟؟