خايفه من عملية التنظيف شوفو وش سويت !!

حبيباتي السلام عليكم ورحمة الله
اسأل الله أن يرزق كل منكم باللي تتمنى دعواتكم نزلت زي الثلج على صدري
اسأل الله العظيم اللذي بيده ملكوت السموات والأرض أن يرزق كل محرومة ومتاخره بالحمل السليم التام اللي يفرح قلبها.
اليوم جايه اقولكم وش سويت بنفسي وبغيت اجيب العيد بس ربي لطف فيني.
الحمدلله صحصحت وقمت بالسلامة وأبغى أعطيكم علومي.
قالتلي دكتورتي الحمل خربان وقفي حبوب التثبيت قلبي ماطاوعني اتركها ورحت لكم دكتوره استشيرها بالموضوع ورحت لحريم يعالجون وكلهم قالو نفس الكلام
آخر شئ قلت الحمدلله وان شاء الله فيه خير لي يمكن ربي راد عني فيه شئ والحمد لله على كل حال.
قالتلي دكتورتي أبغى أسوي لك تنظيف ورفضت وأعطتني مهله أسبوع قالت إذا مانزل خلال هـ الأسبوع راح تجئ السبت ونسوي التنظيف
رجعت البيت وبديت اشرب أعشاب ومافيه شئ ما حطيته بالبرادي ( قرفه - ميراميه - زنجبيل -قرنفل- قشر قهوه - كمون ) والله وأنا استخدم الأعشاب هذي استخدم معاها المثبت قلبي ماهو مطاوعني اتركه :frown:
المهم هذا الكلام بدا من يوم الخميس وجا يوم الأحد ولا صار شئ
وأصلي وأدعي يارب إذا فيه خير انك تحفظه لي
ضغطت على نفسي وتركت المثبت ويوم الأحد بالليل جبت عشبة المدينة وما إدراك ما عشبة المدينة
كسرت العيدان غليت مويا وشطفتها فيه وحطيتها بكوب وصبيت عليها المويا المغلي
شربت كوب واحد وانتظرت ساعه ماصار شئ
رحت وسويت لي كأسه ثانيه برضو ماصار شئ
المهم هذا الكلام الساعه 4 الفجر سويتها وأمي ماتدري لأني عارفه أنها ماراح توافق
جاني النوم ونممممممت
صحيت الساعه 6 ميته من البرد والمكيف مقفل بعد شوي استوعبت ان فيه بلل واناظر ملابسي إلا الدنيا رايحه فيها الدم الله يكرمكم عادم الدنيا بس أروح جري لغرفة أمي وأصرخ من عند باب غرفتها الله يجزاها خير قامت مفجوعه الله يسامحني
دخلتني دورة المياه الله يكرمكم وانفجعت المسكينه مره واتصلت على زوجي يجي يودينا المستشفى.
أسمعها تقوله تعال بسرعه البنت تنزف مره والله كأننا ذابحين بعير بالحمام هههههههههههههههه التشبيه قتلني
ورحت المستشفى والحمد لله كشفو علي قالو عنق الرحم مقفل وسوو لي تصوير قالو الرحم نظييييييف وهذا كان أكثر شئ مسبب لي قلق خايفه يبقى شئ ويسوون لي تنظيف بس الحمدلله
تنومت يومين تحت الملاحظة وطلعت بعدها بصحه وعافيه
والحمد لله على كل حال .....
على فكره عشبة المدينة معروفه أنها تنظف وتفك السدد تستخدم الثلاث الأيام الأولى من الدوره
بس نصيحه لاتسوون مثلي اللي بتستخدمها تحرص يكون عندها احد وإلا تكون بالمستشفى لانه تنظف من قلب ويمكن تدوخين لان الدم اللي ينزل كميته تخوف ويمكن ما تناسب أي احد وتسبب مضاعفات لاتغامرون ب أنفسكم ،

لاتنسوني من دعواتكم بالعوض ...