خبرتكم ف فترة النفاس

الله ييسر لج يارب وترجعين مثل العروس ان شاءالله وييسر لي ولكل حامل

شوفي لاتستخدمين خرابيط الاعشاب واللهوم مالها داعي
استخدمي حليب كل يوم وحطي وياه زنجبيل وفلفل اسود وفلفل ابيض وماش اطحنيهم ويا بعض وخذي مقدار ملعقه صغيره كل يوم مع كاس الحليب
وقللي من اكل النشويات ركزي على الخضار بس ابعدي عن الخضروات اللزجه ماتصلح للنفاس
امم وبعد اشربي قشر حلوو ينحف وابعدي عن البارد

غسلي بالمره حلوه تضيق المنطقه واذا قربتي تخلصين الاربعين تبخري بمره وقشر بصل تنظف الرحم وتشيل منج الهوا واهم شي تتدفين وقت النفاس

وعليكم السلام ورحمة الله وبركاته .


نصيحة الأنظمه العشبيه اللي تشوفيها بالنت اتركيها .. كنت نفس حالك بالضبط حملت على طول وتوحمت من زوجي المسكين كرهته . :D


قريت بخور وريجيمات وأنظمه كثير بالمنتديات وشديت الهمه بروح للعطارين اقش السوق , قلت لامي الله يحفظها عن هالخلطات وضحكت علي تقول من وين جبتي هالخرابيط ؟


انا جبتك وجبت اخوانك ما استخدمت من هاللي قلتيه وشوفيني الحمدلله وماشاء الله مافيني الا العافيه .


كنت على اعصابي ومابي اروح لزوجي بعد الأربعين خايفه جدا جدا اببكي لأني اخذت بكلام امي وما استخدمت الا المعروف .. :(


واللهم لك الحمد رجعت مثل السابق لكن يبي وقت شوي مو فورا .. تقريبا 4 شهور مع الرضاعه الطبيعيه .. وكل الحريم كذا انتي اهم شي لاتفتحي عيونه وتسأليه انا تغيرت وش رايك توسعت ... الخ . خليك واثقه من نفسك وراح تعدي الأمور على خير .


في ترمس حطي قشر قهوة مع زنجبيل مطحون وكمون مطحون وقرفه مطحونه واذا حبيتي ورق نعناع واشربيه طول اليوم .


كثري من السوائل المفيده والدافئة خصوصا اذا كنتي ترضعي ,, حطي كمادات دافيه على بطنك كلما حبيتي حتى يدفي بطنك ويخفف التقلصات خصوصا بعد الترضيع في اول اسبوع .. حطيها على صدرك ايضا جهة الابط اذا حسيتي بتحجر واشفطي الحليب الزايد حتى ماتتعبي .


خذي عالفطور تمر او رطب وحليب قليل الدسم او زبادي وحليهم بالعسل , مع بيضتين مسلوقه مع حبه سوداء .


اكلي الصحي المفيد مثل البر والسلطات والفواكه ولحم ومرق الحاشي لأن دهونه قليله او الدجاج ,, مو تقولين انا ارضع وعادي بيروح مع الرضاع لأ .. ولدك يشرب حليب مو دهون .


انا ما استخدمت الحلبه ولا أكلتها لأنها تنفخ الجسم يكفيني اللي فيني :D .. وركزي عالسوائل والعصيرات وحافظي على فيتاميناتك وتعرضي انتي والصغير لأشعة الشمس الباردة .


ابتعدي عن غسول المر والملح او تحاميل غير طبيه .. اذا مصره على الغسول استخدميها اذا قربت الخيوط تطيح او بعد ماتطيح حتى تعطي فرصه للجرح يلتئم , وايضا ابتعدي عن تمرين كيجل حتى تطيح الخيوط وماتشوفي الألام اللي شفتها . :(


بإختصار اعتبري النفاس دورة طويله ,, انتي راح تاكلي اسكريم وغازيات والممنوعات ايام الدورة ؟؟


وبالنسبه للخياط اهتمي فيه ولاتتركيه .. استخدمي مراهم طبيه دهني بها الجرح بعد كل تغيير للفوطه , راح يعطوك المستشفى هالمرهم او تشتريها من الصيدلية اطلبيها منه وهو بيدلك .


حافظي عالمشي ولاتخافي على نفسك منه .. الحركه بركه لاتجلسي بالسرير الا وقت راحه او غفوه .


تقدري تسألي امك او خواتك او ممن تثقين برأيه عن حاجات ثقه تستخدميها وقت النفاس .


هذا انا كان نظامي واللهم لك الحمد ماشفنا هالخراب والدمار اللي حذرو منه الحريم .. خذي الأمور ببساطه ولاتبالغي بالإهتمام ولاتهملي .


الله يسهل عليك ويوفقك .

ضوء حلم كلام جميل

شوفي دامك بكرية باذن الله راح ترجعين زي قبل
انا اتكلم عن نفسي رجعت زي قبل بالضبط
ما كأني ولدت يمكن لان خياطتي مضبوطة
كنت بمستشفى اليمامة و طبعا يهتمون بالبكر ..

طبعا اللهوم والخرابيط ذي ما استخدمتها
نظام امي جدا سهل و بسيط
نشويات زي رز مكرونة ما آكلها
و كنت بطة اكتسبت وزن من الحمل
قبل احمل كنت 58 و بيوم الولادة كان 75
لووول ..
الرز موب زين للرحم خصوصا الايام الاولى
الافضل خبز بر و خلي اكلك صحي
فطورك الفجر يكون كوب حليب دافي حطي فيه
ملعقة صغيرة حلبة و حركيه الين يركد الحلبة اشربي
الحليب و بيضة مسلوقة و شريحة توست بر ..
طبعا الحلبة بس عشر ايام علشان عظامك و تقويك
بعدين اتركيها ..
اذا جا الصباح افطري على خبز صاج مع شوي زيت زيتون
طبعا كمان الخبز بر ..
التمر تسوينه معجون مع زيت زيتون و حبة سوداء
و كل ماحسيتي بجوع تاكلين منها .. اشربي حليب
السعودية حطي كذا علبة عندك اذا حسيتي بجوع
كلي من التمر و اشربي حليب ..
الغدا مرق لحم و لازم تاكلين لحم و خضار
تاكلين معه خبز بر .. العصر تاكلين شابورة
او الي تبينه .. لاتنسين فواكة لازم تتغذين كويس
كولي برتقاله لازم عشان تتجنبين الامساك وكوليها
بعد وجبة افضل لانها حامضة .. العشا الي نفسك فيه
ممكن تشتهين شي من برا او جريش او مرقوق
الي تبينه عاد ..
اهم شي دفي رجولك بشراب اذا انتي بمنطقة حارة
عادي البسي صيفي و طفي المكيف و افتحي شعرك
و مو لازم سروال من تحت .. السروال اذا تحممتي
و لفة الشعر كمان اذا تحممتي او اذا شغلتي التكييف
و حسيتي ببرد ..
كل اسبوع تحممي مرة كامل جسمك
و يوميا غيري ملابسك و الداخلية و غسلي جسمك من
فوق .. اذا احد بيجيك غسلي شعرك و سشوريه
وتعطري و خصوصا زوجك اذا جاء ..
مشروبات النفاس عندك قشر القهوة مطحون
مع الشمر و الكمون مو مطحونة هذي
تغلين موية و تحطينها بترنس وتصبين عليها
طبعا انتي تقدرين النقادير الي تبين تبينها خفيفة
ثقيلة او مرة او حالية براحتك ..
كمان المطبوخة زينه بس خوذيها من عطار
ثقة و نظيف هي مجموعة عن اعشاب
عبارة عن مرمرية و بابونج و قشر و مخلوطة مع
بعض تاخذين منها ملعقتين و بالترمس وتصبين
عليها موية وتضيفين لها سكر ..
اممم العشرين يوم الاخيرة تزودين على تمرتك رشاد
و تسوين لك خلطة هذي تنشف الرحم
طبعا هي شوي حارة و عشان كذا تنشف الرحم
عبارة عن رشاد و حبة سودا مو مطحونات
و قرنفل و كمون و فلفل اسود هذي مطحونة
تخلطينها سوا و تسوين خبزة صاج منها
وتاكلينها ع الريق مع كوب حليب دافي
و بس هذا نظامنا
يعني القشر و المطبوخة و الخلطة هذي
و المرة تحطين كسرة مرة ثنتين بموية صحة
تنقعينها و تشربين منها يوميا و تغيرين العلبة
كل كم يوم طبعا تحطينها بالثلاجة عشان ماتخيس ..
و الخيوط لازم تاكلين مضاد حبوب تصرفها لك الدكتورة
ترا اذا ما اكلتيها يجيك التهاااااب و صديد و بلاوي
و استعملي الكريم الي تصرف لك الدكتورة
و تتشطفين ببيتادين مرتين باليوم
و الغسولات حقت الاعشاب احذرررريها
الا اذا تاكدتي ان خيوطك طاحت استعمليها
بس تشطيف من برا .. والتحاميل لا تستخدمين
الا طبي فيه تحاميل البوثيل جدا ممتازة
و الوزن عادي ترا بعد ثلاث اربع شهور تبدين
فعلا تخسرين وزن مو على طول ..
و لاحقه على تتزيل الوزن اهم شي صحتك الحين
و خوذي فيتامينات عشان ماتتععبين بعدين
تقويك و تنفعك .. و كمان تحركي بالتدريج
وحاولي تمشين شوي شوي بالبيت و اجلسي بشويش
و قومي بشويش عشان الخيوط و لاتطولين بالجلسة
او اذا جلستي اجلسي على جنب
طبعا بالسرير على جنب ..
و انسدحي على ظهرك حاولي دايم عشان الرحم
يرجع مكانه .. هذا كلام دكتورتي ..
و الله يقومك بالسلامة ياارب و يسهل علي وعليك
و كل البنات

صحيح نسيت الملين عشان تتجنبين الامساك
جدا شين بالنفاس ..
ملين اسمه دوفالاك خوذيه من الصيدلية ومن تطلعين
من الولادة اقري النشرة الي معه واستخدميه ..
اعذريني على الاخطاء الاملائية اكتب لك من جوالي :(