السلام عليكم ورحمة الله وبركاته..
أخباركم حلواتنا بنات حواء؟؟
أغلبنا يحب خبز الزعتر ويتعناله أو يروحله عشان يشتريه..
بس جربوا تسوون طريقتي وبتحبووووووونه جدا جدا لذيذ.. خاصة اذا نوعية الزعتر حلوة ويكون جديد..
والأفضل يكون عدكم نفس المخبز الكهربائي هذا.. وهو متوفر ألحين بوايد أماكن.. أسألوا عنه..
.
أول شي تعجنون أي عجينة انتوا معتمدينها..
أنا معتمدة عجينة العشر دقايق بكل شي تقريبا.. جزاها الله خير فيافي نجد أول من علمتنا اياها بعالم حواء من أكثر من 12 سنة تقريبا.. دايم أذكرها ويارب تكون بصحة عافية..
ومقاديرها:
نخلط كوبين ماي + كوبين طحين + ملعقتين كبار خميرة + فنجان سكر + ذرة ملح + ( ملعقتين حليب بودرة وطبعا فياقي طريقتها بدون الحليب بس اضافته أحلى وتطرى العجين ).
نخلطهم ونتركهم 10 دقايق تقريبا.. وبعدين نضيف:
3 أكواب طحين + نص كوب زيت
ونستخدم العجين على طول ..
ألحين نقطع العجين دواير ونفردهم وسط وبعدين نحطهم على المخبز الكهربائي من فوق.. بدون زيت طبعا..
نرش عليهم زيت زيتون وزعتر ولما تبتدي تحمر شوي الخبزة نشيلها وندخلها داخل المخبز.. ونسكر الغطا شوي وتكون جاهزة.. والغطا أساسا يكون فيه مثل الأسلاك وهي اللي تحمر الخبزة من فوق..
الشغلة يبقيلها سرعة شوي.. من الأفضل تفردون الخبز قبل وبعدين تبتدون تشتغلون على الجهاز لأنه سريع جداااااااااا.. وهذي الخطوات بالصور ان شاءالله تكون واضحة..
وتمتعوا بأحلى خبز زعتر يميييييييييييييييي.. عن جد لذيذ :)
وأي سؤال أنا حاضرة..
حياكم الله..
.