خبز أمي الغالية:أدمنت عليه ونقلت إدماني لزوجي..بالصوووورة

هلا يا بنات :27:
شوفو..هذا خبز التاوة ..كانت الوالدة دايم تسويه بالشتاء..كنا نقوم الصبح نشم ريحته ونتسابق لغرفة الجلوس..ونلاقيه هنااااااك..عند المشب..جنب دلة الحليب وصحن العسل الأصلي...ويم يم يم..
وبعد ما تزوجت صار شي أساسي في بيتي..وصار زوجي دايم يقول لي قبل ينام :لاتنسين خبز خالتي :39: ..
وقلت أبجيب لكم طريقته وصورته..وعليكم بالعافية..
المقادير:
كأسين دقيق بر من الطحّان طااااازج
كأس دقيق أبيض (عشان ما يصر الخبز يابس)
ملعقة خميرة فورية
ذرة بيكينج باودر..انتبهي لا تكثرين
ملعقة حبة سودا
نصف ملعقة صغيرة ملح ناعم

اخلطي المقادير وبعدين اعجنيها بماء داااااااافيء لين تصير زي عجينة الفطاير, ولما تتجمع العجينة وتتشكل أضيفي تقريبا فنجال زيت وكملي العجن.
بعدين قسمي العجينة إلى كور بحجم الليمونة (هالمقدار يبي يسوي لك تقريبا 8 كور)
حطيها في صحن وغطيها بالنايلون واتركيها ربع ساعة بس
حطي في المقلاة مقدار فنجال من الزيت(لازم تكون كمية الزيت غنية حتى ما ييبس وهوما بعد تحمر, وخليه يحتمي فيما إنك تفردين كل كورة (أنا أجيب صحن وأدهنه بالزيت وأحط الكورة وأفردها بيدي) ولا تكون العجينة رقيقة..زي البيتزا أو أرهف شوي..
على طول حطيها في الزيت وهو حامي
قصري عليه, وكل شوي ارفعي طرف الخبزة لين تشوفين إنها أخذت اللون الذهبي اللي تبينه, فيه ناس يحبونها تتحمر بزيادة تصير أطعم.
بعدين اقلبيها وانتظري لين تتحمر..
حطيها في حافظة, والأفضل تحطين بين كل خبزة والثانية ورق القلي عشان يمتص الزيت
بعد ما تنتهين, احفظيها حراة وقدميها مع العسل والحليب..أو ممكن مع الشاهي تصير يم يم..
معليش هذري كثير بس لو قريتي الطريقة مرة وحدة ماراح ترجعين لها مرة ثانية من كثر ماهي سهلة...بس حبيت أعطيكم تفاصيل التفاصيل
ادعو لي :)

وهذي صورة الخبز..ووليدي ما قاومها ومد يدينه وانا قاعدة أصور..أعتذر عن داءة الصور..تصوير جوال ..وماعرفت بصراحة أصغر الصورة :(