و الصلاة و السلام على رسول الله و على آله و صحبة أجمعين
اليوم حنزل وصفة خبز الفوكاتشيا الإيطالي ... هالخبز بجد من أروع ما يكون مع كاسة شاي ..
و انتي بتخبزيه ريحتو حتملي البيت لئنو معجون بالاعشاب العطرية ..
خاصة ريحة زيت الزيتون لما يمتزج مع الاوريجانو و الزعتر البري ممممممم رووووعة
المهم نبلش بالمقادير ,,, بس بحب احكي انو هالوصفة اخدتها من موقع اجنبي و ترجمتها مع بعض التعديلات ...
ان شاء الله يعجبكم
المقادير :-
كاسة و نص طحين
معلقة صغيرة ملح
معلقتين صغار سكر
معلقة كبيرة خميرة فورية
معلقة صغيرة توم بودرة و لا تخافو ما حيطلع للخبز ريحة توم
معلقة صغيرة اوريجانو ( انا زدت الكمية لئني بحبو مع المعجنات)
معلقة صغيرة زعتر ناشف ( برضو زدت الكمية)
معلقة صغيرة روزماري ( اكليل الجبل) انا استغنيت عنو لئني ما بحبو
معلقتين كبار زيت زيتون (حسب الرغبة)
كاسة مي دافية ( ممكن تزيد او تقل )
هلأ الطريقة : -
بنخلط المقادير الناشفة سوا بعدين بندير المي شوي شوي و بنعجنها
و ضلي اعجني و اعجني لحد ما تسير العجينة طرية
هون بعد ما عجنتها و تركتها تخمر
هلأ بعد ما تخمر ساعة مديها بصينية مستطيلة و غطيها اتركيها كمان نص ساعة تخمر
هلأ حطي اطراف اصابعك عليها و اضغطي عشان تاخد شكل خبز الفوكاتشيا
و حطي عالوش زيت زيتون ( انا كترت لئنو زاكي مع الخبز هاد)
و اضفت من عندي شوية اوريجانو و زعتر ناشف و زيتون اسود حلقات
يـــتـــبـــع
هلأ بنخبزو و بنحمر الوجه و حتلاحزي انو حيطلع الوجه قاسي شوي
ازا حابة يكون طري غطيه ربع او نص ساعة و قطعيه و قدميه كاسة شاي و كم نوع جبنة
تـــم بحــمــد الــلــه
دعــــواتـــــكـــــم