حبيباتي اعاقة الابدان اهووون بكثير من اعاقة
القلوب
العاجزه عن الحب والحنان والعطف
واللي ذكرها ربي
وَلَقَدْ ذَرَأْنَا لِجَهَنَّمَ كَثِيرًا مِّنَ الْجِنِّ وَالإِنسِ لَهُمْ قُلُوبٌ لاَّ يَفْقَهُونَ بِهَا وَلَهُمْ أَعْيُنٌ لاَّ يُبْصِرُونَ بِهَا
باخش في موضوعي
خواتي في حرمه من جماعة زوجي ما اشفتها في حياتي الامرتين وانا عمري 11سنه والمره الثانيه قبل سنه واستغربت ايش السالفه ؟؟ ما تحضر المناسبات الا نادرا ولا زواجات بس العزى وفتره بسيطه وتستاذن عمرها في الاربعينات يعني باقي بصحتها وبنشاطها المهم اهلها علموني بوضعها قالوا :هالانسانه ابتليت بزوج مدمن يضربها الصبح والليل ومتحملته وانجبت منه حدود 9 اطفال من ضمنهم بنت معاقه اعاقه شديده ولايهتم ويسال فيهم فلجات بعد الله الى اخوها (ونعم الاخ) فاعطاه جزء من بيته وربى اولادها مثل اولاده وصرف عليهم وتطلقت من زوجها كبروا عياله وتوفقوا ونجحوا ما شاء الله
وبقيت البنت المعاقه وصار عمرها 30سنه والله انها تهتم بها اهتمام الام برضيعها ولاتخلي ابن امه يلمسها تاكلها وتشربها وتنظفها وتلبسها ملابس اغلى من ملابس خواتها وتهتم فيها وقت الدوره الشهريه اهتمام كامل وتشيلها (والبنت وزنها كبير) ايام حملها وولاداتها ونفاسها ومعاناتها مع زوجها من مكان لمكان ولا تامن احد عليها في غيابها نهائيا هذ اذا تغيبت عنها اصلا وحرمت على نفسها ملذات الدنيا كلها ومقابله بنتها ليل نهار حتى الشغاله حرمت تطب بيتها والا تلمس بنتها من شدة حرصها عليها الكل يدعي لها بالجنه لانها سخرت نفسها لخدمة هالمخلوقه الضعيفه العاجزه والاحسان لها
والله يا بنات ان حسيت انها من اهل الجنه جت تعزي دقائق لان بيت اخوها بجنب اهل الميت ومشت بسرعه وكان مربوطه بشئ تقول اختي زرتها ودخلت غرفتها تقول تفوح ريحة العطر وبنتها نايمه على سريرها مثل الملاك وباين الاهتمام والنظافه وصحة البنت ماشاء الله تقولي اختي ما تحملت وبكيت وبكت معها
والثانيه ولد جيرراننا عنده متلازمة داون والله لو تشوفون عناية اهله فيه كيف ؟ برنس دائما اشوفه مشخص الله يسعده بغتره وعقال واللبس نظيف والشكل يفتح النفس ويروح للمسجد مع ابوه وياخذونه اهله معهم في كل مكااااان وحاطين له كرسي برى يطلع مع ابوه ويجلس معه ويتفرجون في الشارع الله يسعدهم مااروع هالاب والام
والثالثه انولدت بنتها بدون كف ما تتخيلون تهتم فيها وزوجها مشاكل واهانات ومع ذلك ما تخلت عنها تخيلوا اهلها يقولون تطلقي ردت عليهم وهي تبكي :وبنتي اللي ما عندها كف اذا انضربت كيف تدافع عن نفسها اذا جاعت من ياكلها من يساعدها تلبس باجلس ولا بيفرق بيني وبينها الا الموت كلنا امهات وماننكر انا نمر بحالات اكتئاب واحباط وضغط من اطفالنا بس لازم نقوم بهم ونسدد ونقارب قد مانقدر مستعينين بالله
وغيرهم وغيرهم فاتقي الله ياللي تستعارين من طفلك او طفلتك المعاقه شفي الغرب ايش يسمونهم ما يسمونهم معاقين يسمونهم (انجل) يعني ملاك ويخصصون لهم دورات مياه لوحدهم ومواقف سياره لوحدهم ومراكز تاهليله بالهبي ماقالوا :معاق مافي امل يشفى بالعكس عندهم امل يتشافون ويتعافون وبعض العوائل في باكستان يعتقدون انهم هبه وبركه اذا سمعوا بعائله عندهم معاق يدفعون لهم فلوس عشان يشوفونه ويلمسونه والمقاطع في اليوتيوب والله يابنات ان شفت مقطع لامريكيه تتبنى حيوانات معااااقه كلاب وقطاوه في بيتها وتاكلهم وتهتم فيهم وتقول انها مسويه اعلان انها مستعده لتربية حيوانات معاقه دون مقااابل تقول : هذه الحيوانات لا احد يهتم بها ولا يرغب بجلبها لبيته وهي كائنات حيه عاجزه تحتاج لمن يطعمها ويرعاه لا توجد جهه تهتم بها فاحببت ان اهتم بها وبعد الاعلان انهالت عليها تبرعات اكراما لصنيعها
ارحمي طفلك او طفلتك المعاقه ادعي الله يقدرك على القيام برعايته خير رعايه اشبعيها حنان بوسيها لبسيها احلى لبس ونوميها في حضنك مثل اي طفل فالدنيا لا تحرميه الكلمه الحلوه ممكن تتفاجئي يوم من الايام ينطق او يتكلم الله قادر على ان يحي العظام وهو رميم قد تكون سببا لدخولك الجنه والفوز برضوانه ونزول رحمته واغداق الرزق عليك ارحمي ضعفه او ضعفها حتى يرحم ربي ضعفك واحمدي الله على تمام عافيتك وصحتك ووظفيها للقيام بما تعجز عنه كم من ام يرزقها ربي باطفال اصحاء وفجاه بحادث او مرض يصبح معاقا فتقبلته وقامت به مثل ام عبداالله بانعمه اللي يقول والله ان حتى في حالات الامساك ان تخرج الاذى مني بيدها عشان ما اتالم وعمار بوقس الولد اللي قالوا :ماراح يعيش اكثر من سنه وعاش وكبر ودرس الابتدائي والمتوسط والثانوي وجامعة الملك عبدالعزيز واخذ الاول على الدفعه بصعوبه يتكلم وانهى الماجستير وتزوج بعد الله يسعده
اسال الله العلي القدير ان يوفقنا لتربية اطفالنا تربيه سليمه وان يفرغ علينا صبرا وثباتا اللهم ارحم المعاقين والمعاقات وحنن قلوب امهاتهم وسخر خلقك للاحسان لهم ياااارب العالمين
وفي النهايه اليكم اصعب حاله واجهت الاطباء في العالم طفله اسمها جوليان ويت مور وشوفا اهتمام اهلها كيف وهم مسيح ؟ مدرينها مع اختها ومدخلينها معاهد للرقص وغيره عشان ما تحس انها حاله شاذه
واهتمامهم بها اكثر من اي شخص ثاني رحمااااااااااااااااااااك يالله احمدي الله واسجدي شكرا بان منحنا صحة وعافيه ولا تشمئزين من الصور
اافتعجبين من الخالق ام من المخلوق ؟
