خداعه وكذبه وصلنا للطلاق

السلام عليكم بنات بدخل بالموضوع
طبعا انا قريب متزوجه ومن تزوجت اشوف زوجي يدلعني بس يجيني احساس انه يجامل
كلن حاسدني ع الدلع والطلعات والبيت الفخم
واقول ياربي ماحس مااشعر تجاهه اي شي ؟
طيب انا موافقه برغبتي وابيه طيب وطيب ليه احسه يجامل ؟ ليه احساسه مايوصل
ارجع اقول موسوسه وتعوذي من ابليس ..
تجي الايام تونا بعسلنا وايامنا اللطيفه , اكتشف انه ضايف بنات بالسناب , اوك !!!
توك متزوج ؟ ياهو شهر وشوي ؟؟ ماعرفنا بعض باقي ؟؟
تفاهمت معه وتكلمنا واعتذر ولف ودار وعدت السالفه ...
قعدت فتره وصار جدا يطول برى البيت ولا يداوم ؟؟
طيب دوامك حكومي مافيه مزح ؟ ديون فجاه غير قرض الزواج ؟؟
اصحابه اللي كثروا ؟؟ ياهوو ؟؟ شفيك ليه تغيرت حياتنا كذا؟
لازم وقفه للموضوع تعال يابن الناس هذا غلط شفيك انا موجوده بحياتك زوجه وشريكه
مو اي شخص عادي لي حق فيك ؟
وهو لا انا ماكلك مشربك اخرجك مشاويرك خلاص مالك شغل وين اروح واجي !!
وتعدي الشهور والوضع زاد تحصل هواشات ووضعه مريب وكل فتره مغير رقم وسناب
ولا قدرت اصيد عليه شي المصيبه اني بديت اتعلق فيه ؟؟
متخيلين ايهه بديت اتعلق فيه يعني حبه زاد بقلبي ..
لاني احزن عليه يوم اشوف الكل ضده واتضايق على وضعه المادي
وهو بالحيل صاير ذرب وماصار يعصب ابد ولكن مشكلتنا بالتاخير لازالت
حاولت اوقف معه واسانده واكون له عون .....
الى ان جاءت اللحظه اللي كسرت قلبي , وكسرت كل شي بيننا ...






بالصدفه كان الرجال ياخذ شور وعادي جواله رسايل واتصالات ورا بعض ؟ ( الجوال صامت كان )
ورسايل واتس وينك ياقلبي ومن هالحكي واتصالات باسم بنت ومدلعها
والله ثم والله غلط افتح جواله لكن الفضول شدني ..
فتحت الواتس وليتني مافتحت شفت اللي ماينشاف من سوالف +18
ومن صور ومقاطع لهم والديون والمصاريف طلعت عليها كلها وعلى غيرها
اخخ يابنات وربي صدمه صدمممممه قسم بالله
اني جلست اصور اللي قدرت عليه وطاح الجوال مني
وطلع من الحمام مصدوم شافني منهاره ابكي
اطالعه بنظرات عتب ليه كذا ..
وربي اخر ماتوقعت قلت له زوجتك
متزوجها قولي هون علي انا مو مصدقههه
قال تخسى والله مو متزوج غيرك :(
والله جوني اهلي وخلاص ولاعاد قدرت اتحمل عديت كثير
وتخيلوا ولا حاول يصالحني ولا شي مجرد طلبوا اهلي الورقه جابها
ولا اهتم .........
تكفون يابنات مابي منكم الا الدعوه الصادقة ان ربي يهون علي
وابي منكم تعطوني قصص ملهمه تريحني شوي صرت من الصدمه كل شوي ابكي