خصصي 10 دقايق

0بسم الله الرحمن الرحيم
السلام عليكم ورحمة الله وبركاته


مابي ادخل بتفاصيل واسهاب لان الوالدين اكبر من الكلام والكل عارف مكانتهم بس ابي ارتب الافكار مرتبه عشان لاتملون وتقرون الموضوع كله سواء والدينك عايشين او متوفين الله يرحمهم جميعا




1 _ فاجأيهم بمغطس ماء دافيء حطي فيه ملح او خردل ودخليه عليهم بدون مقدمات واحلفي عليهم انه يسمح لك ودلكي اقدامهم ترى كبيرين السن يرتاحون بهالعلاج لان رجولهم تعبانه حيييل
امي ماتوافق بس انا اسبقها واحلف عليها كانت تزعل بالبدايه لانها تحس اني اقلل من قيمتي يوم ادلك رجولها ماتدري ان الجنه بكبرها تحتها


2 تعالي يوم وامسكي المصحف وقولي ياالله اليوم ابي احفظكم السوره الفلانيه وتكون من جزء عم لسهولته ولاتتركينههم الا حافظين لو على اجزاء مايخالف


3_ قبل النوم بساعه مثلا قولي ترى اليوم تسميع السوره الفلانيه جيبيها بدعابه عشان يوافقون ومايملون منك وكل ليله اقعدي تسميع عشان يتحمسون للحفظ ومنها يحسون ان في بنت باره كل يوم متذكرتهم


4_ قبل ماينامون عطيهم جوالاتهم وركبي السماعه وقوليلهم ابيكم تسمعون هالدعاء والا الذكر والا محاضره قصيره عاد انتي وذوقك بس حطيلها شي قصير وممتع لو فتاوي يكون افضل انا اسوي هالطريقه لان امي منفصله ولانها راعية تفكير قبل النوم فصرت اشغلها بشي الين تنام شسوي ذبحها التفكير ونجحت الفكره نجاح بااااهر


5 _شوفي الحلويات الي يحبونهم وسوي زيها بدون دسم مثلا امي تحب الكيك بس الله يشفيها عندها كليسترول وضغط ودهون مرتفعه فصرت اسويلها كيكة الدخن بدون زيوت بس احط باكنج بودر وسكر وشوية منكهات وتطلع نفس الاصليه وتستانس حيل
واشتريت لها شوايه كهربائيه احط اكلها عليها فصارت تاكل كل الي نفسها فيها بدون زيوت وقلي
والله الشوايه تطلع البطاطس زي المقليه بس صحيه اكثر


6 _خصصي 10 دقايق مو ساعه وتعالي جنبهم وسولفي معاهم وتحملي مايجيك ولاتجادلين ترى الكبار يبون احد يسولف معهم الكل لاهي


7 _اذا جاء بيطلعون سوي كيكه والا حلا ياخذونهم معهم يستانسون والله

8_ افتحي الكبت تبعهم ودخني ملابسهم بدون مايدرون


9اذا عندكم مناسبه اهتمي فيهم اول ناس ساعديهم باللبس وعطريهم وحطي لامك روج خفيف حتى لو عجوزه عادي ان شاءالله الروج الي لونه شفاف وشفيها اذا دلعتي امك وحسستيها انها حلوه وزيها زي غيرها انا احط لامي بودره خفيفه واكحلها واحطلها روج زهري مايبان والله لو تشوفون الفرحه احسها تنبسط وتصير فرش فديتها


10 اياني واياك تروحين السوق وماتجيبين لهم شي بيدك لو بعشره ريال المهم تذكرينهم لو محفظه واحيانا شيله والله ماتكلفني مجايبها 20 و30 ريال بس اجرها عظيم


11 تصدقي عنههم بالسر لو بريال انويه لهم وبصحتهم وطولة عمرهم


12 اصبغي شيبات امك هاذي اكبر هديه لامي يوم اقولها يمه ترى شريت صبغه عشان اصبغلك تفرح اذا شافت شعرها كله بلون واحد



13 اهتمي بمواعيد علاجهم وشربيهم الدواء بنفسك

اخيرا ياحسافه والله اني اشوف بعيني البنات لاهيات ووالدينها لحالهم طول اليوم يابغرفتها والا بالمطبخ توسع صدرها بالشغل والكل لاهي وحاط راسه باللاب توب والبلاكبيري ليش يعني عشانهم كبيرين راحت عليهم والا مابنفقدهم الا اذا راحوا وفضى مكانهم وبنقول ياليت
الله يخليكم انشروها ووالدينا بحاجتنا وانا والله ماازكي نفسي بالعكس مقصره كثير واحاول اهتم وابرهم بس وين ووين بس افضل من الاهمال الكلي
الي تستفيد من موضوعي ترفعه لها الاجر ان شاءالله
منقووووووووووووووووووووووووووووووووووول