خطبني وانسحب بعد ماتعلقت فيه وعجزت أنساه

السلام عليكم ورحمة الله وبركاته
كما هو واضح خواتي بالعنوان
أنا من أربع شهور انخطبت بعد طلاقي من رجال ونعم فيه أخلاق ودين بس ماديته شوي ومن عائلة ماشاء الله فيها الخير
وصارت اجراءات الخطبة تمام ‘ وكان مستعجل يبي الملكة والزواج طلب يشوفني وتمت الشوفه وكان كل شيء تمام وجو اهله امه وخواته وكانوا منتهى الذوق ما لاحظنا عليهم اي شي من بكره اتصل على اهلي من شان الفحص ورحت وكان بالصدفه إني شفته وتعلقت فيه أكثر لأني بذيك اللحظه حسيت أن الامور ماشيه تمام ومن بكره اتصل في اخوي وسال عن المهر بعدها انقطع عن الاتصال مر ثلاث اسابيع بعدها ارسل يعتذر عن اتمام الزواج
كانت صدمة حياتي مدري وش اللي صار فيني للحظة ما استوعبت اللي صار
حتى بعد فتره ساله اخوي ان كان المهر ما عجبه قال له لا مو القصد المهر
والتحليل المستشفى قالوا لابوي ان التحليل مو موجود شكله ضايع من عندهم
انا اللحين محتاره في السبب و اللي نفر الرجال مني وش اللي ضيع التحليل
معقلة احد شم خبر وفسد زواجي بطريقته
اللي اتعبني اللحين عجزت انساه ورب البيت انه بين عيوني مايغيب
لا تقولون انسيه مواصفات الرجل ممتازة وما كنت اتخيلها يعني حلم بالنسبه لي ويوم بعد يوم اتعلق فيه اكثر
مشكلة اللي تقدموا لي النطيحه والمترديه قبل خطبتي من هذا الرجال تقدم لي واحد كبير بالسن عمره سبعين وماديته عاديه جدا وخبر ابوي انه طمعان براتبي ويبي جزء منه
والثاني بعد خطبتي تقدم لي واحد يقولون عنه مدمن ومطلق مرتين وكل طلاقاته مشاكل وقضايا بالمحاكم
وانا والله على ثقة كبيره بربي بس مشكلتي ماني قادرة انسى خطيبي السابق
خذيت رقمه ورقم اخته وانا والله مالي اي قصد ولافكرت ابد اتواصل معه باي طريقة كانت لاني بالاول والاخير حاطه ربي قدام عيوني بس قصدي اتابع تحديثاتهم وظهورهم بالوتس لعلي اصيد اي خبر عنهم وربي ضااايقه ضااايقه قد الدنيا
غير كذا عندي مشاكل بعملي ومع اهلي والمسؤوليات علي كثيييره وانا كل يوم حالتي اصعب
واهلي مايسمحون لي لا بالطلعه ولا شوفة احد وروتيننا واحد كل يوم مالي طلعه الا للدوام والدوام مشاكله كل يوم بالزايد
إن سأتوني وش أبي ففأنا والله مدري وش ابي أحس أني ملخبطه ولا عندي اي شيء يشغلل وقتي وينسيني اي شيء يذكرني بالموضوع اذا نسيته
احاول اشغل وقتي بالاستغفار او الدعاء حتى خواتي محد يجلس معي او يكلمني كل لاهي في حياته
أحن انه يكون عندي اطفال وابوهم وعايشين بتفاهم ونرتب امورنا بما يرضي الله
كل وقتي افكر انه لو يتزوجني لا ادلعه واهتم فيه
كل اللي ابيه منكم اللحيييييييين ادعو لي ادعو لي :icon33: وانصحوني كيف مممكن انساه ولا كيف ممكن يرجع لي