الحمد لله لا شغالة تحط لي السم في الاكل

و الحمد لله لا سواق اجنبي اجلس معه في سياره لوحدنا

الحمد لله لا شغل يلهيني عن واجباتي او مسؤلياتي تجاه بيتي

كلامكم صحيح الخادمات مشكلة أنا من الناس اللي عانيت منهم مع إني مو مظفة ولا شي وعندي بنتين وظليت 14 سنة بدون خادمة بس بعد البنت الثانية حسيت الشغل زاد عن حده وخصوصا زوجي يحب النظافة بكل شي وهواشنا كله على الترتيب والنظافة والأكل فأمه نصحته ييب خادمة وفعلا يبت واحدة فلبينية مسيحية لأن الكل ينصحون بالمسيحية أنظف من المسلمة ومن ناحية اللغة الانجليزية للبنات وكانت وايد زينه وتحب البنات وطيبة بس الدلع الزايد خلاها ما تعرف حدودها وسفرتها مع إنها اعتذرت وكانت تحب البنات وايد بس زوجي ما كان يحبها لأن كانت تعاني من عاهه بريلها ( أسلوب الغش من المكاتب) ويبت واحدة ثانية هم فلبينية مسيحية بالأول كانت زينة وبعدين مع الدلع لأن هذا طبعي الطيب مع الناس بس للأسف ما ينفع معاهم فعانيت منها وايد وبالآخر بعد مشاكل لا تعد ولا تحصى واللي يعرف موضوعي وقرأه يعرف شنو سوت فيني والحمد لله بالآخر اشتغلت عند ناس ثانيين وارتحت منها والحمد لله ما تمت عندهم أشهر شان يسفرونها على حسابها بعد من عمايلها بس اللي زاد الطين بله الحين هي طالعه من بيتي سنة كاملة بالضبط وتوه بنتي تقولي عن عمايلها مع إني ما كنت أطلع برة أبدا وأتركها بالبيت إلا يمكن أربع مرات مع البنات للضرورة القصوى ومع ذلك قالتلي البنت وقت اللي أطلع كانت تفسخ ملابسها كلهم وجدام البنات وتبول بالأرض وبكل البيت وبعدين تمسح الأرض وتنظف و تلعب بأغراضي وكانت تتكلم مع اللي ينظف العمارة من الدريشة وكانت تقص شعر بنتي الصغيرة وكنا لما نسأل البنت منو قص شعرك كانت تقول أنا طبعا بأيامها كان عمرها 5 سنين تقريبا وكانت تبي من بنتي الكبيرة تطلع وياها الفجر وتروح تقابل واحد وكانت إذا شافت أية قرآنية أو بالجريدة شي يدل اسم الله أو الرسول أو آية كانت تحطها بالحمام ( وأعوذ بالله ) وشافت شي كانت تلفه ومكتوب عليه وملفوف عليه شعر وحطته بالبيت بس بنتي ما تدري وين بالضبط . سألت بنتي الكبيرة ليش ما قلتيلي من الأول قالتلي كانت تهددنا بتحط سم في الأكل وتذبحنا وكنت أخاف منها وكنت صغيرة والحين عرفت إنه خطأ هذا غير اللي كانت بعد تقول لبنتي الكبيرة قولي لأمك إن أبوج ما يبيها ويبي يطلقها ونفس الكلام تبيها تقوله لزوجي يعني كانت تحاول ترمي فتن بس البنت ما كانت تقول شي وتقص على الخادمة وتقولها قلتلهم والحين أنا طايحة بمشكلة عويصة مع زوجي صرلي أكثر من شهرين ولا يواطني أبدا ولا يبي يشوفني وأنا بصوب طول الوقت مع البنات وأنام بغرفتهم وهو بروحه بغرفة النوم ويسكر الباب عليه طول الوقت وما يطلع إلا للضرورة والله وأعلم إذا بصير في انفصال ولا لأ وكل هذا من ورا هالخدم الله يريحنا منهم إلهي . طبعا ما أخفي عليكم كل هذا بسبة الغيرة وحبها لزوجي وفهمكم كفاية . أعذروني على التطويل بس والله من كثر ما أحبكم حبيت أكتب تجربتي علشان تفتحون عيونكم وتديرون بالكم منهم ترى ما من وراهم إلا المصايب . والله يرحمنا برحمته آمين .

جزاج الله خيرا عالتنبيه
والله نحن بعد انا واختى نحاول نساعد الوالده عشان ما نحتاج لهم لكن المشكله ان عندنا اطفال صغار فالبيت ,فقمنا نعتمد علي الطباخ وهو الحمدلله مسلم وهى تهتم بالغسيل والنظافه

dinas mather
نفس اللي صار لج صار معانا عورتي قلبي ذكرتيني بالذي مضى ):

والله لما اقرا موضوع عنهم ومصايبهم احس بغصه بقلبي...
والله اني كارهتهم سواء الفلبينية او الاندونيسية وماتدرين اي الافضل لان من كل الفئتين فيه الطيب وفيه الردي لانعمم..
يعني الوحدة فينا ماودها ترتاح منهم ومن تطفلهم على بيتها وحياتها ولبسها وزوجها لكن الشكوى لله...
اللي مربوطة بوظيفة وش تسوي؟؟؟ ماتقدر تترك وظيفتها لان الدنيا مالها امان بصراحة.. ياما وياما حريم تركوا وظايفهم وارتاحوا بس لما جا وقت الجد تحسفوا...
اما اللي مو موظفة وبيتها صغير او شقتها طبعا مالها عذر بالشغالة..