السلام عليكم ورحمة الله وبركاته
قبل مااكتب موضوعي ودي اشكر كل من ساهم في اقناعي منكم باستخدام ابرة الظهر للولادة
لاني كنت مترددة طبعا واقتنعت بعد قرآءة مكثفة لتجربة بعض العضوات الله يجزاهم كل خير
اما بالنسبة لموضوعي هذا مو عشان اذكر تجربة وبس
ابغى انبه من ترغب في استخدام هذه الابرة وتبغى تستفيد منها صح بعد تيسير الله سبحانه وتعالى
هناك خطوة تسبق ابرة الطهر وهي تحتاج الى ( ساعة ونصف )وهي اعطاء كيسين محلول في الدم عشان ماتدوخي بعد الولادة
يعني لازم تروحي المستشفى والالم والطلق في اوله عشان يمدي تآخذي المحلول ويعطوك الابرة قبل مايوصل الم الطلق مرحلة ما تستفيدي من الابرة تمام
إلي صار معاي (( رحت مستشفى دلة بعد ماحسيت بالالم بساعتين كنت ابغى اتأكد انها الم ولادة ,,, حسبت إني بأوصل وعلى طول ابرة ظهر مثل مااتفقت مع طبيبتي ... لكني وصلت ودخلت للطوارئ وقالت الطبيبة : الرحم مفتوح 4 سم ... قلت : نادي طبيب التخدير عشان ابرة الظهر....قالت الرحم مفتوح 4والعنق طري ويمكن تولدي بعد ساعة .....
طلعتني لقسم الولادة وطلبت من الطبيبة الثانية نفس الطلب (ابرة الظهر) قالت :لازم تآخذي علبتين محلول مغذي ويمكن تولدي قبل
وافقت على المحلول طبعا لاني وقتها كنت احس بآلام وابغى الابرة تخفف عني ... بعد مرور ساعة ونصف كان مازال الم الطلق يروح ويجي كشفت الطبيبة لقيت الرحم مفتوح 6سم...جاء طبيب التخدير واخذت الابرة ذات المفعول السحري :o واختفى عني الالم بالتدريج حتى كشف الطبيبة مااحسه ....اول شي تخدير موضعي ثم ابرة تدخل ظهرك يمرر من خلالها قصدرة رقيقة ثم يخرج الابرة وتتم معاك القصدرة في ظهرك طول الولادة ماتحسي فيها ... ولما صار الرحم مفتوح 10 سم نقلوني غرفة ثانية وكنت بآخر مرحلة من الولادة كنت احس بضغط الجنين مع الم مثل الم بداية الطلق ولما سألت انا الطبيبة : ليه احس بألم ؟؟ قالت : انتي تأخرتي شوية
تمت الولادة بسرعة ولله الحمد وأبرة الظهر خففت ألمها بنسبة 70% وهذي النسبة كبيرة عندي لاني جربت
الولادة قبل بدونها في طفلي الاول كانت ذكرى مؤلمة
اما في ولادتي الثانية مع ابرة الظهر هي تجربة تجعلني انصح باستخدام هذه الابرة بكل صدق
انا لي ثلاث اشهر بعد الولادة ولم اعاني الم في ظهري (ماشاءالله تبارك الله) إلا في الشهر الاول كنت احس بوخز مكان الابرة وهذا طبيعي ... لان الابرة الاولى بطول 4 او 5 سم تدخل في ظهرك فطبيعي تحسي بوخز مكانها يدوم هذي المدة ... بعد كذا الحمد لله تجربتي كانت اهون بكثييييييير من تجربة ولادتي الاولى مثل ماقلت اول اختفى 70% تقريبا من الالم الفعلي
بس انا تأخرت في روحة المستشفى لاني اجهل الم بداية الطلق .... والسبب ان بطفلي الاول ولدوني غصب بطلق صناعي لاني تأخرت بحملي
نسيت اقول لكم انهم اعطوني طلق صناعي في ولادتي الثانية بس ماحسيت فيه الحمد الله بسبب الابرة وتيسير الله اولا وأخيرا
عشان كذا يأخواتي تبغي تستفيدي من الابرة 100% روحي بدري واطلبيها على طول عشان يلحقوا يعطوك المحلول ثم الابرة
ولادتي كانت في مستشفى دلة بسعر (5500) تقريبا في غرفة خاصة وابرة الظهر 1850ريال .. كشف علي ثلاث طبيبات الاولى في الطوارئ والثانية في غرفة بقسم الولادة والثالثة في غرفة مثل غرفة العمليات وهي الغرفة الي ولت فيها وكانوا كل الثلاثة والقابلات مثل العسل حنونات مرة
اهم شي لاتخربطين على نفسك وعلى الخياطة .... سوي مثل ماتقول لك الطبيبة وخياطتك تكون تمام بإذن الله
ختاما الله يهون على كل بنات حواء حملهن وولادتهن يارب
توأم الجود @toam_algod
عضوة جديدة
يلزم عليك تسجيل الدخول أولًا لكتابة تعليق.
دفاء روح
•
رفع
الله يعطيك العافيه والحمدلله عالسلاااامة
بجد اقنعتيني ودي اخذها والله يهون علينا جميعا
وهي اصلا تعتمد على شطارة دكتور التخدير اللي يعطيك الابرة
بجد اقنعتيني ودي اخذها والله يهون علينا جميعا
وهي اصلا تعتمد على شطارة دكتور التخدير اللي يعطيك الابرة
الصفحة الأخيرة