خطيبي بيجلطني

السلام عليكم ورحمة الله
كيفكم يارب تكونون بأتم الصحة والعافية
طبعا زي مانشوف مؤخرا انتشرت ثقافة البوصلة والأنماط الشخصية واللي ماتعرفه تكتب في قوقل البوصلة الشخصية وتقرأ ..
لذلك اللي عندها خبرة بالأنماط ترد علي وأكون شاكرة..
من كثر ما اقرأ بالأنماط اتوقع انه خطيبي شمالي شرقي بس مو متأكدة .. راح اتكلم عنه وحددوا لي نمطه وابغا حل بعد ..
انا مخطوبة والزواج راح يتأخر شوي بسبب دراستي وهذي اخر سنة إن شاء الله ..
خطيبي صفاته واثق من نفسه لدرجة يقول لي انا متكبر ومغرور وشايف نفسي ودايم يكرر علي هالشي .. يضحك بصوت عالي حتى لو المكان هادي وراعي طقطقة وفرفشة دايم نطقطق ع بعض واقوى أنواع الذبات ونضحك وعادي الأمور ماشية مافيه زعل ..
يقولون الشمالي مايعبر بس هو يعبر لي مع انها مرات قلييييلة مثلا يقول (هبلتي بي .. ما عاد فيه احد من بعدك )
يحب عمله وسرعته متوسطة بس عموما فيه سرعة بالحركة .. لما يجيني ونجلس نسولف وكذا بعدين يمسك جواله أصير كأني اكلم جدار .. عادي اتكلم بعدين فجأة يقول هاه .. فصرت ما أكلمه وهو مفهي ع جواله.. احس عنده فضووول ويبغا تفاصيل ويسأل اسأله دقيقة مالها داعي يعني مثلا اذا طالعة يسأل وينك اقول برا .. برا وين وش تسوين وكيف وليه ومتى وانا ماحب كذا واحاول اسايره والف فيه بس يصر ع سؤاله او يتظاهر بالزعل الغير مباشر.. دقيق ع المواعيد بالدقيقة يحاسب (وينك)
لما نكون طالعين وأضحك مع شخص غريب على شي عادي يعني وضحكة باحترام مو سخافة يعاتبني بهدوء مثلا يقول (حلو الضحك.. اشوفك تضحكين)
مرات يكذب علي باشياء تافهه مادري ليه! مثلا يقول باخذ اجازة وهو ما أخذ ويداوم! مادري وش الفايدة!
اللي يقهرني فيه باررررد مايبادر ابدا يبغاني انا اللي دايم أبادر بالسؤال عنه وعادي سمعت كلامه ويوميا اصبح عليه بس المشكلة وين .. اخر مرة كلمنا بعض صوت طلب مني طلب تافه وانا رفضت .. قال لي ما راح ارد عليك (قصده اذا صبحت عليه) قلت له براحتك وسكرنا .. اليوم الثاني صبحت عليه ملاحظة صوتية بالواتس ولا رد .. طنشته اسبوع تقريبا بعدين جا عيد الاضحى وعيدت عليه ورد بكلمتين بس .. بدون ما يسأل حتى وش اخبارك حية ميتة .. ماعلينا..
من بعدها لحد اليوم بنتم اسبوعين مانحاكي بعض بسببه وبسبب جفاه .. ولو حاكيته بيحسبني ميتة عليه .. وبنفس الوقت اشتقت له والله .. مادري شسوي قولوا لي .. زعل على شي سخيييف والظاهر يبغا يعاقبني بغيابه .. انا افكر اني أكلمه بالواتس اسأل عن أخباره بدون عتاب ولا شي .. الا اذا هو فتح الموضوع .. قولوا لي اتركه واطنشه فترة زيادة وبعدين أكلمه ولا شسوي .. المشكلة والله لو اطنشه الدهر كله مستحيل يجيني يسأل ..
خصوصا انه يشتغل بمنطقة بعيدة عني يعني حتى رضاوة بالأفعال ماقدر..
اللي عندها خبرة بالأنماط ايش نمطه؟ هل فعلا شمالي شرقي؟ وكيف نرجع حبايب وحلوين زي قبل؟