خطيبي ما يحبني

السلام عليكم ورحمة الله، والصلاة والسلام على رسول الله:
مساء الخير يا بنات، انا من زمان اتابعكم وماعندي خوات وانتم خواتي عشان كذا قررت اني اسجل واقولكم مشكلتي.
انا يا بنات امي توفت وانا عمري سنة وابوي تزوج مغربية وراح المغرب وشغلته عني ولا عاد شفته من يومها، اصلا ما اتذكره. عمي هو ابوي عوضني عن حنان الام والاب اللي ما ذقته ولا عرفته ولا شفته. عمي عقيم وانا دخلت حياته ومليتها بعد الظلم اللي عاشه لما تركته زوجته لما اكتشفت انه ما يقدر يجيب عيال. ابوي وزوجته ماشالله خصوبتهم عالية وجايبين ١٢ ولد وبنت وهو مهتم فيهم كلهم وربي معطيه وتاركني لحالي عايشة بالفقر ولا يسأل عني.
مالكم بالطويلة يا بناااات، انا الصراحة مملوحة وانخطبت كثير من يوم ما كان عمري ١٥ سنة. بس دايما ارفض لان اللي يخطبوني اصحاب عمي الشياب. سبب رفضي مو بس العمر، السبب اني اخاف يصيرون زي ابوي ويروحون ويتركوني. لما صار عمري ٢٧ كالعادة جا واحد من اصحاب عمي يخطبني وكان جايب معاه ولده. انا ما كنت ادري لاني كنت اغسل الحوش وشفت الولد بالغلط وبعد شافني وعيني جت بعينه وقلبي دق ما ادري من الخوف ولا منه. وكنت مبسوطة وحسيت بسعادة يا بنات، صحيح انها ثواني بس تسوى العمر كله. بس تفاجأت لما عمي صدمني بخبر انه ابوه اللي جاي يخطبني مو هو وتدمرت احلامي وانكسر قلبي وتبعثرت كلمات الشعر اللي كانت ببالي يوم شفته ولا عرفت وش اسوي وفجأة صارت الدنيا سودا واغمى علي فاضطر عمي انه يخلي الشوفة يوم ثاني.
يوم صحيت وتذكرت اللي صار فكرت بطريقة عشان اوقف هذي الخطبة فقلت لعمي اني مو مستعدة اتركه لحاله واني لازم اشيله زي ما شالني، وبيني وبينكم يا بنات انا كنت صادقة بكل كلمة كنت اقولها خاصة انه الولد ما جاني. مرت السنين وانا انتظر نفس الشخص يجيني ولا جا، وفي يوم من الايام تأخر عمي بعد صلاة الجمعة وما رجع الا الساعة ١٠، يوم رجع شفته مهموم وضايق وعيونه مليانة دموع، سألته وشفيه وتفاجأت انه صديقه هذاك اللي كان بيخطبني توفى الله يرحمه ويغفر له.
بعد ٥ شهور تقريبا، تحقق حلمي وخطبني اللي كنت انتظره طول هالسنين.!!! سبحان الله يا بنات لا تستهينوا بالدعاء وآية الكرسي وسورة البقرة. وكنت من اسعد الناس هذاك اليوم اخيرا ربي فرجها والدنيا ضحكت لي. وكنت مستعدة ليوم الشوفة ولبست فستان اخضر طويل وربطة حمرا بشعري وطبعا ما حطيت مكياج عشان ما يجوز يا بنات وانا اصلا ما احتاج مكياج كثير الحمدلله.
مالكم بالطويلة يا خواتي، انا لاحظت وانا اكلمه بعد الخطبة انه ابدا مو متحمس لي ولا احس يبيني. يكلمني ببرود ولا يرد علي بسرعة اصلا وبسرعة يقفل مني واحيانا يهاوشني وانا اسكت. وبعدين واجهته وقلت له انت ماتبيني؟؟؟ قال لي انه مغصوب عالخطبة من خواله. يا بنات انا ما ادري وش اسوي بحياتي! اللي احبه ما يحبني واللي ابي اعيش معه حياتي ما يبي يعيش حياته معاي!!
وش نصايحكم يا بنات وش اسوي معه؟ كيف اجذبه لي؟؟؟! وش الكلام اللي اقوله!
الله يوفقكم ويسعدكم ياخواتي ويفرج همومكم انا متأكدة اني بلقى الحل معكم وانكم بتساعدوني .