يا يمه كيفها حالك انا حالي غدت احزان
عقب ما رحتي يا يمه غديت بكل متاهاتي
يا يمه جابني شوقي وقلبي لشوفتك عطشان
مشيت دروب يا يمه وطالت بي مسافاتي
انا شوقي زها بصدري مثل ما ورّق الأغصان
خذاني الشوق لك يمه وزوّد فيني لوعاتي
يا يمه جيت ابي حضنك وابي عطفك مع التحنان
ابي ابكي على صدرك إلين اجف دمعاتي
وابي اقبل جبين (ن) شع ومواط (ن) تحتها الغفران
ابي اصرخ واخليها تكسر حزن عبراتي
ابي اسولف لك انتي وبس سوالف تروي الضميان
بقول اللي حصلي من رحلتي يا بعد ذاتي
ابندب حظي العاثر وابحكي كان ياما كان
عن ايام مضت ودي تعود لي فمناماتي
ابي اسولف واقول امي واملي بصيتها الأكوان
من حقي اسولف عنك يا ناري وجناتي
من حقي اقول امي واحكي والحكي اشجان
ومن حقي اتنومس فيك يا اول بداياتي
ابي احكي واسولف عنك يا اغلى من الوجدان
ولكن الحكي وقف وخانتني عباراتي
ألا يا لعنبو كل المعاني وقفت قصران
متى توفي واسولف عنك يا امي ياغلى نشواتي
أنا اشهد كل شي عقبك غدى باهت بدون ألوان
فقدت الحب والتحنان ومعها كل راحاتي
اشوف الحزن جا يركض على قلبي وهو ولهان
بيحرق ما بقا بقلبي وينثر باقي رفاتي
ذبحني الشوق يا يمه وعقبك صرت انا تلفان
قتلني بعدك الظالم نحر فيني سعاداتي
غيابك فجر بقلبي زلازل .. زوبعة وبركان
صفير الريح في جوفي كوتني وزادت أهاتي
حياتي انتي وكوني ونور القلب والاعيان
ضناني الشوق لك يمه وانا مدري وش سواتي
بعد ما غبتي يا يمه نحر فيني الزمان ازمان
الا يا من يرجع لي زمان (ن) ولى وفاتي
ما كنت احسب لموتك يا بعد ناسي ابد حسبان
رحلتي في ( الأحد ) واصبح يتيم (ن) مثل حالاتي
في ذيك الليل سولفنا وحكينا والحكي نشوان
ضحكنا ملء هذا الكون ولا ندري وش الأتي
جلست اوكلك بيدي .. وشبعتي يا بعد من كان
مسحت شفاتك وبستك وقلت رضاك غاياتي
مسكت ايدي وقلتي لي عسى تزهد بها النيران
وانا قبلت ما بين العيون وقلت يا ذاتي
عسى ما ني من اللي بدل الطاعة لك بعصيان
رضاك يهمني والله وهو اخر محطاتي
وفجأه كل شي (ن) صار قلب ذاك الفرح احزان
خذاك الموت من يدي وانا ابكي كل لحظاتي
سليت الموت يا يمه وخذاني عنه النسيان
واثاري الموت ما ينسى وهو هادم ملذاتي
يا ليت الموت لو لحظه صبر ما غمض الاجفان
تركلي امي اقول لها بقايا من حكاياتي
حضنت امي وانا ابكي واقبل كل شي (ن) بان
رجيتك لا تخليني خذيني بكل حالاتي
رجيتك يا بعد كلي وكلي لك غدى شفقان
أنا ودي املي منك يمه كل نظراتي
بكيت وصحت باعلى الصوت انا الهايم انا الغرقان
انا اللي في متاهاتي شرقت بكل غصاتي
ألا يا جرحها كبدي بعد ما لفو الأكفان
وراحت مني وغابت وصارت هي نهاياتي
هجرني الفرح يايمه وصرت اعيش انا بحرمان
بكيت وزادت العبره وشقت صدري وناتي
احس اني اعيش بكون فاضي ما به أي انسان
احس بوحشة الدنيا .. بعدها كل شي ماتي
دريت ان الفرح كذبه وحكايه ما لها عنوان
وعرفت ان الزمن غادر ذبحني بصمت وسكاتي
بعد ما غبتي يا يمه هلكت وصرت انا تعبان
ذبحني بعدك الغادر وخيب كل هقواتي
غيابك هدني واصبحت غريب مفارق الاوطان
بعد ما غبتي غاب الفرح واتبعته مسراتي
بكيت بغرفتي وحدي ما بين السقف والجدران
بكيت فراقك اللي هدني وزود بي حسراتي
انادي لك وانا صوتي مثل ورد (ن) غدى ذبلان
ابيك اتجمعي ذاتي و تلمّي كل اشتاتي
زماني خانني واصبح مثال الخاين الخوان
جرحني وانكوى صدري وذابت فيني شكواتي
اشيل الهم من صغري وتزيد حمولها الامتان
وهي تكبر على كتوف الزمن دمعي وشرهاتي
ذكرت وما ذكرت الا طعونه فيّ كما النيشان
يحسبني الزمن بسلا بعدها كل طعناتي
انا فرحي غدى كنه رذاذ (ن) في وسط دخان
زماني بعد ما غبتي تفنن في مذلاتي
انا مدري اعيش شلون بلا زولك مع الأحضان
اسالك يا الولي تجبر مصابي في غلا ذاتي
ألا يا الله يا خالق جميع الانس ويا الجان
يا مجري رياح الكون وكل شي (ن) يبي ياتي
يا معطي بلا منّه وكل شي عندك بميزان
يا زارع بقلبي الصبر ومونس لي وحشاتي
اسالك تغفر لأمي وترحمها أيا رحمان
وتجعل جنة الفردوس مقره اخر ادعاتي
طلبتك يا الولي تجعل قبرها جنه وبستان
وتغسلها بماء وثلج دعيتك كل اوقاتي
يجعلك عند رب (ن) راضين عنك ماهوب غضبان
وعسى ما صابها تكفير دعاتي كل ساعاتي
عسى ريحك .. مسك .. عنبر .. وروح مع بعد ريحان
يعطر قبرك الخالي طلبتك في مقاماتي
اسالك تسقي تراب القبر من وابل (ن) هتان
وتجعل قبرها روضه وتجمعها بملاقاتي
وتجمعني بابوي اللي معه عشره من الأخوان
الا يا الله انا سالك تهونها الى جاتي
وعسى ما ني من اللي طالع (ن) من دنيته خسران
خسر دنياه واخرته وتساوت كل مساواتي
رضا الله من رضاك انتي حقيقة ما تبي برهان
عساني كاسبه رضاك يا غاية كل غاياتي
حلوووووووووووووو:(
يلزم عليك تسجيل الدخول أولًا لكتابة تعليق.
سجايا الروح"
•
حرفك رائع كروعة خلقك,,
الصفحة الأخيرة