خفت و ولدت!!

السلام عليكم جميعا

صبحكم|مساكم الله بالخير.

بكتب لكم يابنوتات قصة ولادتي للي تبي تضيع وقت وتقراء واللي تبي تستفيد واللي تبي تعرف كيف تمت ولادة حرم من صديقاتي بالتجمع.

انا الله يسلمكم يوم الخميس الموافق 22-10-2009 | 3-11-1430

كان موعد ولادتي وكان اخر يوم لي في التاسع وكان موعدي مع الدكتوره<<ياذي ال كان خخخخ

المهم رحت الساعه 10 صباحا وانا مافيني اي بادرة طلق او شي.

يوم دخلت عليها الساعه 11 قالت بكشف عليك من تحت واشوف المهم انها كشفت وقالت مفتوح 2سم

وسوت لي توسعه وقالت يالله روحي غرفة التخطيط

سويت تخطيط ولما شافته بعد اكثر من نص ساعه وانا على جهاز التخطيط قالت والله البنوته كويسه بس

فيه مرات في التخطيط ماكانت دقات قلبها كويسه فيها عشان كذا!!! لازم!!

تطلعين للتنويم الحين طلق صناعي . وكانت الساعه وقتها 12وربع تقريبا

يوم قالت كذا انا طقتني ام النفافيض!!:22:
وقلت لها دامك مصره اجل خليني يادكتوره اروح البيت اجيب شنطتي واشوف بنتي واتحمم واجي قالت تجين الساعه 4

ضروري قلت اوك وعطتني ورقة التنويم وقالت اذا جيتي روحي قسم التنويم.

لما ركبت السياره مع زوجي كني حسيت بشي في ظهري واحسب اني اتوهم وانا قاعده اقص قصتي انا والدكتوره على زوجي

واقوله لازم نرجع بعد 3 ساعات

وقفنا وجبنا غذا ورحنا البيت. ابي اجلس يابنات على حيلي عشان اكل !! ماقدرت قمت احس بشي صدقي!

المهم كلت كم لقمه قلت عشان يصير فيني حيل ادفع اذا جيت اولد (وللمعلوميه يابنات انا مو بكر هذي الولاده الثانيه بس ماعرف الطلق العادي لاني كنت ماخذه صناعي)

المهم قمت تحممت بمويه حاره تقريبا
وتاكدت من اغراضي ودخلت اقوم بنتي والالم كل ماله يزيد وانا احسبه من التحريض اللي سوته لي لاني تالمت شوي يوم سوت لي مع ان يدها خفيفه
وانا قاعده اكلم بنتي وابوسها وافهمها اني بروح اجيب اختها وكذا الا زاد زياده ماعاد قدرت اكلت سبع تمرات
ولبست عباياتي وقلت لزوجي يالله نروح قال تونا الساعه 2 ونص قلت لا شكلي قاعده اطلق!!

قال صادقه؟ توه مافيك شي وبتاخذين صناعي قلت يمكن من الروعه من الصناعي جاني طلق!

اثره من التحريض سبحان الله رحنا ومن حر الطلق مادخلت مع الطوارئ دخلت مع التنويم!!<ذكيه ومطيعه عشانها معطيتني الورقه

قالوا استني بس نص ساعه ننظف غرفتك وبعد ربع ساعه قلت خلاص ماقدر!!

استغربو قالوا كيف ماتقدرين انتي اصلا محوله من الدكتوره عشان نعطيك طلق صناعي يعني مافيك طلق!

قلت لا لا جاني طلق بعد ماطلعت من الدكتوره

قاللو تفضلي طيب نكشف عليك يوم كشفت الدكتوره المناوبه علي قالت هي والممرضات مفتوح 4 سم والدتوره كاتبه 2 يعني تحسين بالم انتي ولاده مافيه صناعي!

قلت ايه هذا اللي اقوله لكم قالو كان قلتي لنا من اول مادخلتي ولا قعدتي تستحملين كذا!

المهم قالوعلى غرفة الولاده ع طول ولا تدفعين ولا تمشين وجابو لي كرسي ودفوني
وبيني وبينكم ارتعبت شوي انا وزوجي بس قريت على نفسي وهديت شوي

المهم يوم زاد الطلق قلت لزوجي ابي ابرة الظهر خلااااااص قمت انتفض مدري برد مدري من الطلق

وطلبناها وجاء الطبيب المختص وعطاني اياها والحمدلله خف الطلق وصارت كنها الام دوره وقعدت اتكلم مع زوجي

لانه داخل معي وكل شوي يجون يشوفون من تحت وانا طبعا معد احس الا بشي خفيف

ولما انتفتح الحم 9 سم تقريبا ونزل الراس مره حسيت بالتلحيط بس ماحس بالدفع
وجت الدكتوره وقالت يالله ولاده حبيبتي انا اشوف شعرها بس ساعديني وادفعي لما اقو لك ادفعي

وراح زوجي عند راسي عشان مايشوف شي<مهددته ومحرصته مايشوف

وبدينا يالله ادفعي وادفع ايوه شاطره اقوى ومن ذا الكلام لحد ماطلعت بنتي بالسلامه وتقطع حلقي من الحر والزحير

والحمدلله .

ملاحـــــــــــظات

انا ولدت في دله مستشفى قمه في الذوق من تعاملهم ونظافتهم ونظامهم وامنهم ونفسياتهم هذا اللي شفته وربي شاهد علي

اللي عطاني الابره دكتور ابوالمكارم شاطر ويده خفيفه الله يجزاه خير وبجد يابنات الابره هذي نعمه من الله تخفف كثيييييييير ولا حسيت منها باي مضاعفات بعد الولاده وسعرها 1650


اخذت الغرفه اللي سعرها الف ريال مرتبه والوانها تفتح النفس ومعقوله مساحتها كثير اذا ماراح تسوين استقبالك في المستشفى

الدكتوره اللي ولدتني شكلها باكستانيه بس تتكلم عربي احسن مني ومنكم هههه والله يجزاها الف خير على تعاملها ونفسيتها

الممرضات مايخلوني حتى اطمن البس شبشبي الله يكرمكم جميع وساعدوني على التحمم بعد الولاده لاني كنت دايخه شوي
واول ماتدقين الجرس تلاقيهم قدامك وابتسامتهم شاقه وجيههم

واخيرا سميت بنتي تـــالين وهذه نايمه جنبي الله يحفظها لي واختها ويرزق كل من تمنت الحمل اميييين يارب العالمين.


اختكم
حـــــــــــرم عبدالرحمـــــــــن.