خففت 10 كيلو ، هنا قصتي تعالي ..

صباح / مساء الخير ولله الحمد قدرت انزل 10 كيلو ولا زالت مستمرة مع التخبيصات اللي لا بد منها هههه ، طبعا كان وزني 86 وأول مرة أوصل للوزن هذا اللي هو 75 والهدف حاليا إلى 69 لأنه لو حطيت هدف اكثر من هذا راح اكسل واحسه صعب جدا .. خاصة بعد الزواج زاد الى هذا الوزن ، مع انه ماعندي اطفال الله يرزقنا من واسع فضله ، وبصراحة لما فحصت عشان تأخر الحمل طلع معي تكيسات والله المستعان وضعف تبويض وقالت لي الدكتورة اعملي دايت وخففي .. والصدمة الثانية صار معي سكر النوع الثاني والآن اخذ منظم جلوكوفاج 750 .. وزوجي ماعجبه جسمي يقول انحفي وكل شوي يذكرني انتي سمينه انتي بس تاكلين انتي مايقعد عندك اكل ، وتعرفون هذا الكلام يجرح بشكل ،، خاصة انو من اهل النادي ويبني عضل ويهتم بالشغلات هذه ، فكان هذا مشجع لي .. وبعد أنا لاحظت نفسي بس اتعب وماعندي طاقة للشغل وبس حاسه بخمول وتعب وكل ماطفشت فتحت الثلاجة وجلست هذا من غير الشبسات والحلويات والمطاعم وبعدها نوم او انسدح عالجوال وكلها عادات خاطئة وبالنهاية وزني زاد والملابس ضاقت علي .. المهم قعدت ادور نظام ريجيم وطبعا مالقيت شيء مناسب ، حاولت اجرب اللقيمات مادري ماتقبلته .. فأول شيء قلت لازم رياضة واشتريت جهاز اوربتراك بمبلغ رخيص وهو 299 ريال مع الشحن طلع علي 334 ريال فقط .. لما وصل تشجعت وصرت أتمرن عليه مع انه صعب علي بالبداية لكن صرت يوميا اتمرن عليه نص ساعه واحيانا ثلث ساعة واذا كان مالي خلق اتمرن عليه ربع ساعة فقط بس احاول يكون يوميا .. وخففت أكل يعني بالعربي سكرت فمي ، تركت الغازيات والشبسات والمطاعم وابتعدت تماما عن الرز هو اساس سمنتي والكرش ، وخففت من المكرونة بأنواعها والله العظيم نزلت خلال يومين الى اسبوع حوالي 3 كيلو .. لما شفت هالنتيجة كان أكبر مشجع لي أكمل وفعلا صرت قد ما اقدر اخفف من الأكل لكن اهم نقطة ماوصلت للحرمان اطلاقا .. يعني وجبة الفطور عندي شبه مفتوحة اهم شيء عندي عشان ما اجوع طول اليوم وبعدين اخربها ويخرب مزاجي كله وكأنك يا بو زيد ما غزيت .. وجبة الغدا محذوفة وان جعت اكل توست وجبن وكوب شاي والحمدلله .. والعشاء خفيف اي شيء آكله بس دسم لا ... اللحم ما آكله نهائيا فقط اطبخه لزوجي والدجاج آكله بس خفيف ويكون مشوي والزيوت مبتعده عنهن تماما .. آكل تفاح كل ماجعت او برتقال او حتى حبتين جزر او خياره .. يعني احاول أكثر فواكه .. كنت سابقا يوميا اشرب قهوة وحلى الآن صرت بالأيام ما اشربها واستبدلت الحلى بالتمر .. واشتريت شاي اخضر بالنعناع هذا اشربه يوميا من كوبين الى ثلاث او كوب واحد واحيانا اسوي بابونج او كمون ويانسون عشان بطني يخف .. احيانا آكل زبادي وليمون يعني عالمتوفر .. عند العزايم احاول امسك نفسي وآكل دجاج مع سلطة .. واحاول ابتعد عن الحلى وآكل تمر .. احيانا اكل مكرونة بس على خفيف ومو دايما لأنها والله مثل الرز تسمن وتكبر الكرشة خاصة ان كانت بشاميل وصلصات وتعرفون المكرونه كيف نتفنن فيها ... ابتعدي كامل عن البطاطا والكابتشينو بالسكر .. واستبدليها بحليب قليل الدسم مع نسكافيه بدون سكر .. ندري انه مُر لكن نتحمل ونتعود عليه .. نجي للتخبيصات .. مرت علي فترة صار فيني كسل للرياضة وصرت آكل لكن على خفيف ويجيني تأنيب ضمير طبعا بس الحلو انه وزني يثبت ما يزيد وان زاد غرامات ارجع للدايت المكثف وانزله .. والحمدلله ماشيه تمام .. جتني فترة وزني ثابت مهما سويت يثبت وهذا شيء مُحبط صراحة .. بس لا تيأسوا ابدا عندي لكم طريقة لكسر ثباته .. وهي مهمة جدا لكن مش دايما تعملوه خلوها مره بالشهر .. وهي انو تعتمدي على نوع واحد من الاكل لمدة يومين فقط .. كمثال وهذا مقبول وهو جيبي بطاطا واسلقيها بماء فقط ثم قشريها واكليها وخليها فطورك وغداك وعشاك مع الماء .. فقط فقط فقط بطاطا مسلوقة ووزني بعد يومين وشوفي كيف راح تنزلي كيلوين او كيلو ونص وعلى حسب طبيعة جسمك طبعا .. بس لازم تكسري هالريجيم لانه اذا طولتي فيه تفتقدي عناصر غذائية مهمة ويتسبب بشحوب الوجه وتساقط الشعر .. انا مثل ما قلت لكم ما احب اتقيد بريجيم معين لانو احيانا ماتتوفر لي مقادير الريجيم ومو كل الناس تقدر تشتري الاكل الخاص بالدايت كل اسبوع .. لهذا ريجيمي فقط تخفيف اكل مع رياضة وان كسلتي لك يوم عن الرياضة وابتعدتي عنها شهر عالاقل خففي اكل وانتبهي لا تزيدين اللي خسرتيه .. وبعدها ارجعي للرياضة .. وقت العزايم هي الكارثة وان اضطريتي كلي حلى على قد الملعقة وقهوه فقط والاكل اذا كان رز كلي ملعقتين رز وكثري دجاج وسلطه ... اعرف انه صعب بس كل هذا عشان الريجيم ونكسب جسم رشيق وصحة عالية .. والله ملينا من التسدح والتبطح والكرش والسمنة والملابس اللي تفشل علينا .. راح اذكر لكم عاداتي اليومية بالأكل : 1- يوميا اشرب كوب الى كوبين حليب مع نسكافيه واخفف السكر فيه وهذا شيء اساسي عندي .. 2 - بعد كل وجبة اشرب كوب شاي اخضر بالنعناع واحيانا مش دايما زنجبيل مع كمون .. 3 - الفطور مفتوح عندي وهي جبنة وخبز وزيت زيتون وزعتر واحيانا مكدوسة وحده واحيانا جبن قريش وايام اكل توست محمص مع جبن او دهنة زبدة فول مع كوب شاي ، وبعدها اشرب شاي اخضر هذا لازم .. 4- الغدا محذوف وان جعت اكلت اي شيء خفيف مثل زبادي او صحن سلطة .. 5 - العصر مش دايما اشرب قهوة عربية مع تمر او معمول التمر .. 6 - العشا محذوف او بالأحرى خفيف يعني توست او فواكه او خبز وجبن وكوب شاي وبعدها كوب شاي اخضر .. 7- اخر الليل تعودت وعودت زوجي معي نشرب زنجبيل وكمون واحيانا يانسون واحيانا بابونج او كراويه .. كلها تخفف من الكرش وتريح المعدة .. 8 - انتبهي ثم انتبهي تنامي او تنسدحي ومعدتك مليانه خاصة بعد وجبة دسمة .. هذه كارثة وتكبر الكرش .. 9 - الرياضة ما اكذب عليكم احيانا اتنشط فيها اسبوع واسحب خمس ايام يعني متذبذبة بس بستمر ان شاء الله خاصة انه اشغل اليوتيوب او قدام التلفزيون واتمرن نص ساعة والوقت يروح ما احسه ثقيل .. 10 - شرب الماء بكثره اهم شيء من لترين الى ثلاثه .. وصراحة انا قليل اتقيد بالشيء هذا لكن صرت اتعود على لترين يوميا واغصب نفسي حتى تطرد السموم من الجسم واكون احس بالشبع .. 11 - تمر علي اوقات اجوع فيها واشتهي شيء دسم لكن اسوي لي كوب حليب من غير سكر عالاقل يسد جوعي شوي واحس بالشبع .. 12 - احيانا اكل كورن فليكس مع حليب قليل الدسم يشبع صراحة ومغذي لكن مش دايما .. 13 - الشابورة مع الشاي حلوة وتسد الجوع .. 14 - حاليا بعتمد عالشابورة والشاي من غير سكر وبراقب نزول الوزن .. 15 - اتمنى يكون ريجيمي سهل عليكم والحمدلله قدرت انزل عشره كيلو خلال 3 شهور وبشرتي ممتازة ومافيها شحوب او باين اني مريضة وصحتي ممتازة .. 16 - صار كل من شافني يقول لي نحفانه وهذا واضح على مقاسات ملابسي .. 17 - انا عندي فيتامين دال 10 واكل كبسولات ، اضافة الى جلوكوفاج وكبسولات كروميوم لانها تساعد عالنزول وتخف من التكيسات كذا قالت لي الدكتورة .. 18 - خسارة الوزن بالنهاية انا الكسبانة وان شاء الله بعد نزول وزني الى 65 ابدأ بكورس منشطات ويارب احمل ادعوا لي بالله .. وقبل لا انسى : الدجاج انا انزع الجلد منه وبالطبخ لما اشوح البصل فقط رشة زيت خفيفة لا تُذكر ، واحاول اقلل من الماجي قد ما اقدر واستخدم ملح البحري المكرر ملوحته مش عالية ، واحيانا اذا جعت وماحبيت اكل دسم اعمل لي شوربة عدس او شوربة خضار .. وابتعدوا تماما عن الذرة والموز والمانجو هم اعداء الريجيم .. واي سؤال انا حاضرة وفي امان الله :)