خلااااااص ما أبي اتزوج

السلام عليكم
كيفكم يا بنات عالم حوا،،،، نبدا بالجد
زي ما قريتوا يا طويلات العمر عنوان موضوعي اليوم هو
‏(‏( انا ما أبي أتزوج ))

اول شي انا بنوتة في بداية العشرينات و أكيد مثل ما أنتم عارفين حلم كل بنت يجي اليوم الي تلبس فيه الفستان الأبيض و تكون هذاك اليوم هي الأميرة و عيون الناس كلهم عليها و يجيها الأمير و يخطفها على الحصان الأبيض >اقول انثبري لا يجيك واحد مفحط على وانيت ابيض مو حصان

المهم ما علينا إلى هنا و الموضوع تمام
طبعا اهتمامات اغلب البنات عن شكل زوج
المستقبل يا ترى هو حلو و الا لا طويل و الا قصير اسمر و الا ابيض
و أعترف اني انا من ضمن هالبنات
لكن قدر الله علي يوم و دخلت قسم الاسرية >> عشان الاكشن
و قريت البلاوي الي تشيب رمش العين
الي زوجها يخونها و الي محتفظ بتذكارات من بطولاته الرجولية مع بنات الحرام الله يمحيهم من على وجه الأرض و الي يكلم قدامها عيني عينك لا و فاتح السبيكر بعد و الي و الي و الي وش اعد وش اخلي
بعدين قلت لا هين هذولي الي ما يخافون الله
بعدها انصدم ان كم وحده تقول زوجي ملتزم و يطالع افلام اباحية زوجي يشتغل في الهيئة و يطلب مني الحرام
خلاص وش بقى اذا هذا الملتزم الي صلاته ما نهته عن الحرام أجل الي ما يصلي الصلاة في وقتها وش بيسوي؟؟
لا و الي يبكي و يقطع القلب ( الشذوذ )
الي ما تخيلت انه منتشر لهالدرجة صاروا مثل الحيوانات يلاحقون شهواتهم كأنهم ما انخلقوا الا لهالشي اعوذ بالله

بس ابي افهم شي واحد لهالدرجة مستهينين بعذاب ربي يعني هم الحين عارفين عقوبة الزنا و الا لا بس ابي افهم...

احس خلاص اقتنعت انه ما في رجال ما يخون و ان ما خان اكيد عنده سوابق
و انا ما ابي واحد عنده ماضي لان الي عنده بيجيه يوم و يحن لماضيه احس لو الله عطاني عمر و تزوجت و خاني و الله لتجيني سكتة قلبية
ابي واحد محافظ على نفسه مثلي ( ما أعتقد انه موجود)
على الرغم من ان اغلب البنات الحين لهم علاقات مع شباب و كانوا حولي في المدرسه و الحين في الجامعه
الله يثبتني و يبعد عني شياطين الأنس و الجن يا رب


و يرزقني و بنات المسلمين الأزواج الصالحين الي تقر بهم اعيننا يا رب العالمين


احس قرقرت على راسكم لين قلت بس .مع ان عندي و الله كلام كثير بس يلا خير الكلام ما قل و دل

انتظر ارئكم