*شريفه* :

اسمعني حبيبتي زيييييييييييييييييييييين .. أكبر غلط تسوينه انك تقولين لاهلك عن اللي يصير بحياتك من مشاكل شوفي كيف جرأتي زوجك وصار هو اللي يشتكي منك عند اهلك ..!!! بصراحه الحركه هذي تفقد احترام الزوجين لبعض .. لاتكونين ضعيفه عند زوجك كل صغيره وكبيره تصبينها في أذن اخوك وفي النهاية أخوك مع زوجك مو معاك يعني بالله وش استفدتي ؟؟ خسرتي موقفك قدام زوجك وطلعتي صغيره بنظره وفي نفس الوقت معاد لك عزوه بنظر زوجك واسمحي لي بهالكلمه لأن صار ضامن أخوك أنه في صفه دائما عشان ماتخسر ين حياتك الزوجيه .. يعني أول خطوه تسوينها أنك تسكرين فمك من الشكوى اللي تزيد الجفاء بينكم خلي عندك ورقه رابحه قدام زوجك خليه يهاب اخوك خلي لأخوك وزن قدام زوجك ! ولاتنسين قول الرسول صلى الله عليه وسلم ..:"استعينوا على قضاء حوائجكم بالكتمان " الخطوه الثانيه .. دوري على مفتاح زوجك .. لا تقولين ماله مفتاح وطول وقته مشغول عند الكمبيوتر وما أدري أيش ودامه عند أشياء عاديه منتديات وبرامج هذا يدل على أنه مال ويهرب من واقعه .. ممكن تكون هوايه لكن ماتوصل لدرجة أنه يفضلهم على الجلوس معكم .. عشان كذا حاولي تجذبينه بالشي اللي يبيه هو مو انتي .. لا تقيسين على نفسك نهائيا المرأه تتمنى أشياء من الرجل مهمه مره في نظرها الرجل يشوف ان الأشياء هذي أشياء تافهه مايلقي لها بال وهنا أكبر نقطة خلاف بين الزوجين .. يوم سوي له حلا مع قهوة سنعه وخليك بسيطه ولا تجادلين ولا تذمينه نهائيا .. سوي له الأكلات اللي يحبها بين فتره والثانيه ولاتطلبين معها شي .. لاتخلين المشوار اللي تبينه مشكله كبيره بينكم خليها تجي منه .. يااختي غيري سوي مره سندويشات وزمزمية زنجبيل واطلعوا تعشوا وانتم في السياره .. يعني لا تتوقعين أن التغير يكون بس في قميص النوم والمفرش لا التغير ييكون في نفسك انتي أولا حبي نفسك بتتغيرين تلقائيا .. الخطوه الثالثه .. نظمي وقتك .. لا يكون وقتك كله لعيالك وبيتك لا عطي نفسك مجال وعطي زوجك وقت نظمي نوم عيالك وترتيب بيتك اذا ماعندك شغاله .. اشغلي نفسك بالنت شوي موكثير .. اقري أخبار من النت وسولفي مع زوجك بها .. اقري عن الأسهم والأخبار اللي تهم زوجك .. مدي جسور للتواصل بينك وبينه بأخبار تهمه تفتحين فيه المجال لزوجك .. الخطوه الرابعه .. لا تطلبين من زوجك اللي ماوفره لك أمك وابوك .. لا تتوقعين من زوجك أنه بينسيك الماضي .. لا تتأملين كثير .. لا تطالبينه بأشياء هو ماله ذنب فيها ... أنت تطلبين منه لا شعوريا .. ولا ألومك تبين العوض .. لكن العوض من الله مو من زوجك صدقيني .. لا تعيشين في جلباب ماضيك .. لاتكملين سيناريو البؤس مع زوجك .. لا حبيبتي هذي حياتك .. وهذي فرصتك تثبتين فيها قدام اللي ضايقوك وذلوك انك أقوى من ذلهم .. أن وقتهم انتهى ووقتك بدأ .. الخطوه الأهم .. ربك .. ربك .. ربك .. اذكري ربك في الرخاء يذكرك في الشده .. ادعي ربك انه يعوضك خير في بدنك وزوجك وصلاح عيالك وجنته أخير وأعظم ... صدقيني ربك مايجمع على مؤمن ضرين .. الله يسخر لك زوجك وييسر أمورك وأموري ويهون علي وعليك .. وهونيها ترى المسأله مسألة نهج حياة يبيلك وقت ورواق على ما تتأقلمين ولا يكون الا كل خير ان شاء الله ..

اسمعني حبيبتي زيييييييييييييييييييييين .. أكبر غلط تسوينه انك تقولين لاهلك عن اللي يصير بحياتك...