والله موضوع راااااااااااائع

بارك الله فيج الغاليه على طرح مثل هالموضوع ..

أنا الحمدالله ما عندي خدامه ... وأرعى بيتي بنفسي ..
وأهلي الله يبارك فيهم ويحفظهم من كل شر .. يراعون الخدم ويعتبرونهم مثل عيالهم ..
ياكلون من أكلنا ويشربون من شربنا ولبسهم علينا وأي شي يشتهون بامكانهم ياخذونه من الثلاجه وبدون استئذان دام الاكل موجود ومتوفر الحمدالله ليش البخل ... وملابسهم طبعا علينا ..
والبطايق بعد علينا ... و حتى بالطلعات مرات يطلعون ومرات لا ... يعني حسب الطلعه .. اذا كانت للمراكز ما نشلهم الا نادر علشان ما يضيعون عنا أو يشردون الله لا قال .. واذا طلعنا البر أو للحدايق نشلهم يرفهون عن نفسهم ويغيرون جو ويرتاحون اشوي من الشغل ...
يعني الحمدالله نعاملهم أحسن معاملــه .. لدرجه انه أكثر الخدم يتمون يشتغلون عندنا خمس وست سنوات ولولا شوقهم لأهلهم جان تمووا على طوووول ...

لكن الطاااااااااااااااااامه الكبرى في بيت أهل زوجي ... وبالاخص عند أمه .. الله يهديها ..
تعامل الخادمه بقسوه وتعذبها جنها حيوانه ... لا والله الحيوان نرحمه أكثر منها .. تعاملها جنها آله تشتغل وبس ..
ترقد الساعه 12 ونص أو 1 بالليل وتقوم الساعه 5 ومرات اذا كان عندها شغل اضافي تخليها تقوم الساعه 4 ونص .. وطبعا ممنوع النوووم بتاااااااتا طوال اليوم .. ولا حتى قيلوله
من تقوم الصبح تغسل الملابس و تعطيها مفارش تغسلها أو بطانيات أو سجادات .. المهم كراااف ع الصبح
وبعد ما تخلص غسيل على طووووول تروح تغسل حمامات البيت مع انه كل الغرف فاضيه ومحد وياها في البيت غير هي وعمي بغرفه وحده و4 غرف فاضيات كلهم متزوجين ...
المهم .. تغسل الحمامات وتخم الغرف يوميا حتى لو محد دخلهم .. وتمسح السلالم و أطرافها ..
وتمسح الدرايش ( الشبابيك ) ولاازم تخلص كل هالشغل قبل الساعه 8 ..!!
ومن تستوي الساعه 8 تروووح على طول تجهز الفطور لعمي لانه ريال كبير بالسن ..
وبعد تجهيز الفطور تروح على طول تكمل مشوار التعذيب من غسيل الثلاجات اللي طار لونها من كثر الغسيل .. و تنزل الستاير من كذا غرفه حسب الجدول الاسبوعي وتروح تغسلها و تشل كفرات التكيات والمخدات وتغسلهم .. و تنظيف سطح البيت لو ما في شغل ..!!!!!!!
المهم تشغلها لين تصير الساعه 11 ونص .. ومسكينه مرات تقولها بسير الحمام تقولها سيري بسرعه ولا تتأخري .. والمسكيينه تروح تسويلها كوب شاي عن تموت من اليوع أو تاكل خبزه ناشفه على السريع .. وطبيعي بتاخذ وقت ع الاقل 5 دقايق .. هالوقت تااااااااااااكل روووووووحها عليه
المهم بعد ما تسير تطبخ الغدا .. ترجع على طول وتييب الغدا لعمي لأنه أول واحد يتغدا .. ما يتحمل اليوع بسبب كبر سنه .. وبعدها تروح المسكينه تغسل المطبخ والغاز والفرن وكل شي لمسته في المطبخ أو ما لمسته .. لانه عمتي بترجع بتشيك على كل شي ولو شافت غبره وحده بتسويلها مصيبه ..
وبعد ما تاكل تتغدا عمتي تروح هي المسكينه تتغدا .. وتقريبا تكون الساعه استوت 2 ونص
وبعد الغدا لازم تكوي الملابس وتخلصها
وبعد الكوي لازم تخم الحوش وتنظفه عدل وتسقي الزرع وما شاءالله حوشهم كبير وانترلوك بعد .. والزرع يوصخ وايد .. وعندهم طيور في البيت .. لازم تنظف بيتهم يوميا .. وهم في غرفه كبيره مب قفص صغير .. وتحط لهم أكل وتغير الماي .....الخ
المهم صار المغرب .. تروح تغسل الحمامات مره ثانيه ...؟؟؟ مع انه محد دخلها ...؟؟؟؟
وتنظف الصاله وبعدها تروح تطبخ العشا ...
وبعد ما تجهز العشا .. ويتعشون . تروح تغسل الصحون وادوات الطبخ وتغسل المطبخ والغاز مره ثانيه ..!!
المهم بعد هالشغل تروح تكوي باقي الملابس و حتى الستائر والمفارش وغيره ..
وبعد ما تخلص تكون الساعه صارت 11 ونص أو 12 أو حتى 1 .. المهم لازم تكون الساعه تعدت 11 ونص وبعدها تخليها لين تصير الساعه 12 أو فوق وتروح ترمي الزباله برع ..!!!
على قولتها لو خليتها ترميها قبل بترقد بوقت ..؟؟؟؟ وما ادري شو المشكله ..؟؟؟؟؟؟

هذا كله بصوووووووب واللي بقولكم اياه أحين بصوب ثاني ...
والله تقطع قلبي .. كله تشتغل بالحر .. تطبخ بالحر ... تكوي بالحر... ممنوع تشغل المكيف الا وقت النوم وبس .. علشان ما تبطر على قولتها ..!! مع انه الجو نااااااار والمسكينه كم مره تحسس جسمها من الحر ..!!!
والاكل ... الله ايعينها على ما ابتلاها .. ثلاجه الفواكه والخضروات مقفوله و وقت الطبخ تعطيها على قد حاجتها وتقفل الثلاجه .. تخاف تاكل شي من وراها ...!!!
حتى البيض والحليب والنيدو والجبن وكل كل شي في ثلاجه داخل غرفتها .. تعطيها للطبخ اللي تحتاجه وبعد تهاوشها عليه .. مثلا قالت لها سوي فطاير .. تقولها اوكي يباله نص كوب حليب نيدو .. تقولها يييبي الكوب وتحط حقها ربع الكوب تقولها بس هذا يكفي ما بتقصين علي انتي ..؟؟؟
ويوم ياكلون .. ممنوع تاكل قبل لا يخلصون كلهم أكل .. ولو كان الباقي وايد .. تشل هي النص وتحطه في صحن وتعطيها شي قليــــــــــــــل والله ما يسد اليوع .. ومرات المسكينه من اليوع تخش حقها عيش من الغدا عشان تتعشاه لانها مرات ما يتم حقها عشا وعاااادي الوضع عندها والله ما تسأل فيها كلت والا لاء .. والله عمرها ما شفتها حطت حقها شي حالها حال باقي الناس ..
والله كم مره كنا نتعشى وأنا أشوفها تييب كل اللي طبخته و يخلص الاكل وهي ما يتم حقها اي شي ولا تسأل فيها ..!! لدرجه انها مرات تطلب من اي حد يشتري حقها كيس صمون وجبن من السوبر ماركت لانها ممنوع تطلب اي شي ولا حتى تفاحه ...!! بالعكس لو طلبت تطيح فيها وتقولها انتي بس تبين تاكلين ومب فالحه للشغل...؟؟ ما ادري كيف تبغيها تشتغل وهي لا ترتاح مثل الناس ولا تاكل عدل ..
يعني كل اكلها وجبه الغدا وكله بقياس .. تعطيها قطعه دياي صغيره أو قطعه لحم صغيره .. يعني المهم هي توزن الاكل عدل قبل لا تعطيها .. وعلى فكره حتى لو كانوا ياييبين أكل من المطعم مستحيل تعطيها الا الباقي من تناتيف الاكل .. والفواكه اذا خربت وخاست تعطيها وتقولها شوفي لو تبينه قطعي وين زين وكليه والباقي ارميه في الزباله .. تقولوا عنز ...استغفر الله

الله يهديها بس شو بنقول ..

يا ما نصحوها عيالها وبناتها .. لكنها ما تسمع لحد و تعاند اكثر .. تقولهم والله تبون تخربونها علي ..
وأنا أدفع لها راتب ما تشتغل ببلاش ..؟؟؟؟

تصدقون انه حتى في الشتا كانت تشتغل بملابس الصيف ...؟؟؟ كانت ترتجف من البرد وكسرت خاطري وريلي بعد يوم شافها كان اشوي وبييصيح على حالها وقالي عطيها جاكيتي خل تتدفا فيه لو انه كبير عليها ... والله عطيتها جاكيت ريلي وفرحت فيه وااااااااااايد و كل ما تلبسه تيلس تشكرني لانها صج كانت محتاجتنه ... كنت بعطيها من ملابسي لكن جسمي نحيييييف مول و جاكيتاتي ما بتدفيها عدل ..
وطبعا ريلي كان بيشتريلها لكن ميزانيته ضعيفه وما قدر يشتريلها وعطاها ماله ..

شو أقولكم والا شو .............؟؟؟؟ والله تقطع القلب .. لولا الحاجه والله ما بتتحمل هالعيشه ..
تدرون عاد انه كل شي يخترب تطيح فيها سب ولعن وشتم .. وياما هانتها وما خلت عليها كلمه بسبب أشياء تافهه .. مرات تتأخر يوم تناديها .. لانها مثلا تكون في الحمام ... تاااكل قلبها وتقولها انتي تطنشيني ما تسمعين ...... ويبدا المواااااااااال اللي ما يخلص ...

يا ما خوفناها من عمايل الخدم وانه بعضهم اذا عصبوا ممكن يرتكبون جرايم ... وهي لازم تحاسب لانه ابروحها في البيت وعمي ريال كبير ولا يقدر يتحرك ولا يسوي شي .. لكنها والله ولا تحس وتعصب بعد...

خلوني ساكته يكفي اللي قلته ...

هاي مأساه خادمه ............ والله العالم بمآسي العالم الآخر

للعلم لم أسرد هذه المأساه رغبه مني بالتشهير أو الاساءه لأحد لكني أحببت أن يتعظ أولى القلوب القاسيه وأن تلين قلوب الناس على من هم تحت رحمتهم .. فالله يمهل ولا يهمل ..

فلولا الحاجه ولقمه العيش ما تغربت عن أهلها واشتغلت بهالمهنه المشينه ..

وأسأل الله العفو والعافيه لي ولكم ولجميع المسلمين ..

جزاك الله خير على موضوعك الهادف مع اني الحمد لله ماعندي ولاعند اهلي ولاحمولتي الله مغنينا عنهن وان شاء الله نكون بغنى عنهم

كلامك صحيح جزاك الله خيرا

عطر الكادي
الحمدلله ان المسلم كل خير يسويه يلقاه عند ربي
مشكورة على اضافتك
كتكتو
(لأن يهدي الله بك رجلا واحدا خير لك من حمر النعم)
مين يحصله مثل هالاجر
الله يجزا امك خير
وحياك اختي
كنز المحبة
حياك اختي وبارك الله فيك

اللومي




خخخخخخ

وانا بعد معك المعاملة تكون بحدود
انا قصدي من موضوعي اننا نعطيهن طلباتهن الاساسية
اما مسألة تسمكر وجهه او مكياج اوعطور
لاوالله بهذي مانطيعهن
لانهن جايات يشتغلن ماجن يستعرضن
وشغالتك هذي جريئة زيادة عن اللازم وكل شي له حد
اهم شي اذا اكلنا مانخليها تشوفنا ومانعطيها
يعني انا قصدي نعطيها من اكلنا وشربنا
بعض الناس مايناظر لهذي النقطة وخاصة في المناسبات
يقدمون للضيوف كل شي والشغالات حقهم بس الرز
والمشكلة انهن يشوفن الاكل قدامهن رايح جاي
وماياكلن
والله اقولك اني يوم رحت لمناسبة ان الحلى كان كثير وانا جايبة معي وكان وقت عيد
وخلصن الحريم ورفعوا الحلى والشغالات ما اكلن
بصراحة اعتبر هذي انانية منا اننا ناكل ومانعطيهن
هذولي بشر مثلنا يحسن ويشتهن
ومثل ماقلتي نعاملهن بحدود
حياك الله اختي ومشكورة على المداخلة